1 Тимофейлӧ 4 - Бур Юӧр 2019

¹ Лолыс веськыта висьталӧ: медбӧрья кадас мукӧдыс кежасӧ веритӧмсис. Пондасӧ кывзыны ылӧтлісь ловвесӧ да сэрпӧсь ловвеслісь велӧтӧмсӧ.

² Сэтшӧм велӧтӧммес локтасӧ бӧбӧтчиссезсянь, ылӧтлісь отирсянь. Нылӧн чорзьӧм сьӧлӧмныс бурсӧ да умӧльсӧ оз вежӧрт.

³ Нія озӧ лэдзӧ гӧтрасьны. Озӧ лэдзӧ сёйны Еныслісь аркмӧтӧм сёянсӧ. Но Еныс аркмӧтіс сёянсӧ, медбы быльсӧ тӧдісь веритіссес сёйисӧ сійӧ Енсӧ буркывтӧмӧн.

⁴ Еныслӧн эд быд аркмӧтӧмыс бур. Енсӧ буркывтӧмӧн кӧ сёян, сэк верман быд сёян сёйны повтӧг.

⁵ Сёяныс сӧстӧммӧ эд Еныс кылӧн да кеймӧмӧн.

Тимофейӧс туйдӧтӧм

⁶ Пондан кӧ этаӧ воннэтӧ велӧтны, сэк тэ лоан Кристос Исусыслӧ бур уджалісьӧн. Вынсьӧт асьтӧ веритӧм йылісь кыввезнас да бур велӧтӧмнас. Тэ сія велӧтӧм сьӧрті и пондін овны.

⁷ Нёштӧм да ковтӧм басниэзӧ кадсӧ эн ӧшты. Асьтӧ велӧт овны Енлӧ юрбитӧмӧн.

⁸ Вывтыр вынсьӧтӧмись етша бурыс, а Енлӧ юрбитӧмӧн олӧмыс быдлаын бур. Сэтӧн эд Еныслӧн кӧсйӧмыс, кӧда сетӧ олансӧ ӧні да и локтан кадӧ.

⁹ Этна кыввес быльӧсь. Бур лоас, босьтан кӧ нійӧ сьӧлӧмат.

¹⁰ Мийӧ эд сы понда и уджалам, миян вылӧ усьӧм видӧмсӧ нуӧтам. Мийӧ эд ловья Еныс вылӧ надейтчам. Сія ─ быдӧннысӧ Мездӧтісь, ӧддьӧнжык мездӧ веритіссесӧ.

¹¹ Этаӧ велӧт да тшӧкты сы сьӧрті овны.

¹² Тэ том, но некинлӧ эн лэдз пуктыны тэнӧ абутӧм туйӧ. Ов сідз, медбы тэ вылӧ видзӧттӧн веритіссес керисӧ тэ моз: тэ моз баитісӧ, олісӧ, радейтісӧ, вынсьӧтісӧ ловнысӧ, веритісӧ, видзсисӧ сӧстӧма.

¹³ Локтытӧдззам лыддьӧт Вежа Гижӧттэсӧ, веритіссесӧ велӧт да туйдӧт.

¹⁴ Видз тӧдвылат тэныт сетӧм верман-кужан козинсӧ. Сія сетӧм Енсянь юӧртісь кыв сьӧрті, вичкуын веськӧтліссеслӧн ки пуктӧм пыр.

¹⁵ Быдӧс эта йылісь тӧждісь, сы сьӧрті ов. Сэк быдӧнныс казяласӧ тэнчит кужӧм-вермӧмытлісь вынсялӧмсӧ.

¹⁶ Видзӧт ас сьӧрат: кыдз олан да велӧтан. Пыр сідз кер. Сідз керӧмнат мездан асьтӧ да и тэнӧ кывзіссесӧ.