Yòwanìrzɛ̀ 2 - Mokpwe: Bakwery (New Testament)

Yerzù à mà eŋgòhwa malìhwa ò lì timba mììmba

¹ O mèenya meyawò ò mà gbeyàhwa lìhwa ò mbòwà ya Kena, ò erzòòkà ya Galìlì. È nyàŋgò ya ama Yerzù è ma hwɛ aŋga.

² Yerzù nà hwà-òkòwèlì hwa enì, wɔ̀ hvɛ hwa mà yòwɛ̀hwɛ ò lìŋgi lìhwa.

³ Mììmbà ma mà kuwa, rzìi Yerzù nyàŋgɛ a mò jèeya a mò òhweyà nanù ema, “Mììmbà ma awu ma mà kuwa.”

⁴ Yerzù à mà mò alàhwɛ̀ nanù ema, “Ìi mòlanà kòkò, ò rza àŋgàmɛ̀nɛ̀ lì nò òhweyà mamɛ ema na hwɛni lì gbeyà. Ndi e hvònda ya ami e rzi ɔlɛyi.”

⁵ Yerzù nyàŋgɛ rzìi a òhweyà hwàgbèèlì hwa eŋge ndèma nanù ema, “È gbeye tɔ̀ mamɛ ema a e òhweyà ò lì gbeyà.”

⁶ O ma tɛ̀mɛ̀ hwèyɔ̀ŋgɔ̀ mòtòhwa aŋga ema hwe ma hvòmàhwa na màŋyàyi. Lìŋgi lìtumba la hwèyɔ̀ŋgɔ̀ lɔ̀ ndi hwatò hwa Yudà hwà mà gbeyàna ò lì arzòrzɛ ndèŋgàna hwe e kànɛ̀. Tɔ̀ ima jɔ̀ŋgɔ̀ ima tànɛ lì hwanɛ̀ eyà ya egbe yɔ̀kɔ ya malìtà mà màlìhwa.

⁷ Yerzù rzìi a òhweyà hwaŋga hwàgbèèlì hwa ndèma nanù ema, “È òndìrzɛ̀ hwenè hwèyɔ̀ŋgɔ̀ na màlìhwa.” O èŋgànɛ̀lɛ rzɔ̀ hwà mà hwe òndirzɛ natɛ̀ɛ na ò njɛ̀ŋgɛ.

⁸ Rzìi à hwa òhweyà nanù ema, “O naŋgɛ nanù, e kòohwe lòŋgò, e ɛ̀ndɛneya e mɔ̀ɔ̀ŋgèlì hwa hweleelì na hwènyɔ̀ɔ̀nì.” Hwàŋga hwàgbèèlì hwà mà gbeyà nanù.

⁹ Oŋgò mɔ̀ɔ̀ŋgèlì à mà keke maŋgà malìhwa, ema ma mà tìmbìrzɛ̀hwɛ mììmbà. A rzi tanɛ lì emba èki ema ma mà uwɛlɛlɛ (tɔ̀ nɛ hwàgbèèlì ema hwà mà mò ŋgba e mɔ̀ hwà mà hwìye). Oŋgò mùnyanà rzìi a hwɛlɛ e rzàŋgò ya mɔ̀ɔ̀mbì ò tòŋgòŋgò,

¹⁰ rzìi a mò òhweyà nanù ema, “Tɔ̀ ima mòtò a lòma ndi lì akɛlɛ hwàyɛ̀nì hwa eni mììmbà ma gbamù. Hwatò hwà mà nyɔ tɛ rzayi-rzayi, rzìi a wurzirzɛ e mɔ̀ ema mà rza lɔ̀. Ndi ò wa ò uti mììmbà ma gbamù natɛ̀ɛ na nàŋgɛ.”

¹¹ Manù mànyakà ndi ma hwèlì embànelì ya wòrzò, ya hwètàmìrzèlèlì ya ama Yerzù ema à mà gbeye ò mbòwà ya Kena, ò erzòòkà ya Galìlì. Anu ndi à mà awùlùhwɛ èluhwe ya eni rzìi Hwà-òkòwèlì hwa eni hwa ika lìlòkɛ̀ lì awu na mɔ̀.

Yerzù à mà hvaya hwatò hwa nyòŋga ò Ndawò ya Lohwà

¹² O mburzà ya ene eyà, Yerzù à mà ɔ̀ndɔ̀ ò mbòwà ndɛ̀ɛ̀ndɛ̀ yà Kàpɛ̀nàwɔ̀mì na nyàŋgò wa eni, na wònyanyàŋgò wà eni, na Hwà-òkòwèlì hwa eni. Hwà mà lìya aŋga ò ŋgurzu ja hwèyù.

¹³ Nà òma e hvònda ya è Ndèma yà lì Akà Ɔ̀nɛ̀yi yà wònyà Yudà e ma kòmbɛ̀nɛ̀, Yerzù à mà agba ò mbòwà yà Jèrurzalɛ̀mù.

¹⁴ Nà òma à mà uke aŋga rzi à ɛndɛ ò è Ndawò yà Lohwà. Yerzù à mà ùŋmanɛ̀lɛ̀ hwatò ema hwa mà hwɛ lì àhwirzɛ̀, inyàkà, mɛ̀ɛ̀lɛ̀ŋgù nà imbèŋga. Lòŋgò là hwatò hvɛ, hwa mà lìya ndi ò itèhwèlì, rzi hwa kenjirzɛ wòkòndò.

¹⁵ Ò èŋgànɛ̀lɛ̀ rzɔ, Yerzù à mà òŋga hvònji nà mɛ̀yɔ̀lì, rzìi à è hvàyanà hwaŋga hwatò hwa arzɛ, nà mɛ̀ɛ̀lɛ̀ŋgù nà inyàkà ò eŋge ndawò yà Lohwà. À mà wùùlɛ̀ wòkòndò wò hwaŋga hwatò ema hwa mà hwɛ lì kenjirzɛ wòkòndò nà lì nòŋgòlɛ̀ hvɛ itèhwèlì ema hwa mà hwɛ lì kenjirzɛ wòkòndò hwa awu ò ŋmanyu.

¹⁶ À mà òhwèyà hvɛ hwaŋga hwatò ema hwà mà hwɛ lì àhwirzɛ̀ imbèŋga nanù ema, “È ulɛ hwenè hwema anù. Nɛ rzɔ inyɔ e tànɛyi lì timbirzɛ e Ndawò ya ama Tatɛ̀ wa ami èki ya èlùwà e?”

¹⁷ Nà òma Hwà-òkòwèlì hwa ama Yerzù hwà mà ɛnɛ nanù, rzìi hwa ɔ̀ŋgɛlɛ na òma e ma tìlahwe ò kààtì ya ama Lohwà nanù ema, “Ìi Rzàŋgò, e nyìrzɛ ema na hwɛni nà è Ndawò yà aŋgɔ, e tànɛyi lì nò òŋwirzɛlɛlɛ.”

¹⁸ Hwàkànèlì hwa wònyà Yudà rzìi hwa timba lì mò ijòwa nanù ema, “Ima ŋgàna ya embànelì ema ò tànɛyi lì jò uŋmɛ̀lɛ̀ aŋga nanù i hwiya nanù ema ò hwɛni wònja ò lì gbeyà ene nyayi eyà e?”

¹⁹ Yerzù rzìi a hwa alàhwɛ̀ nanù ema, “È wùùlɛ ène ndawò yà Lohwà. Imba na e òŋga hvɛ ò hweyu hweyàwò.”

²⁰ Wònyà Yudà rzìi hwa mò alàhwɛ̀ nanù ema, “Ène Ndawò yà Lohwà e jò wòwani mènìmenì me meya na mòtòhwa ò lì e òŋga. Yɔ̀ ndi ò wa ò wòwa ndi hweyu hweyàwò ò lì e òŋga e?”

²¹ Ndi e ndawò ema Yerzù mɔ̀ à mà hwɛ lì òhwa, e ma hwɛ ndi e nyò ya eni.

²² O mburzà ya hvònda ema Yerzù à mà ŋwe rzi Lohwɛ̀ a mò hvùmùlɛ̀, ɔ̀ndi Hwà-òkòwèlì hwa eni hwa a ɔ̀ŋgɛ̀lɛ̀ mamɛ ema mɔ̀ à mà òhwe. Aŋga ndi wɔ̀ hwa lòkɛ̀ hwètìlèlì hwe eyà ya Lohwà na e mbɔrzi ema Yerzù à mà òhwe.

Yerzù a hwi mèèmà me hwatò hwa arzɛ

²³ Nà òma Yerzù à mà hwɛ ò Ndèma yà lì Akà Ɔnɛ̀yi, ò Jèrurzalɛ̀mù, rzayì-rzayì ja hwatò hwà mà ɛnɛ hweyà hwe mànyàka ema à mà gbeye, rzìi hwa mò lòkɛ̀.

²⁴ Ndi Yerzù a rzi hwa aŋgbɛ mɔ̀ ŋmìti, èhwanja mɔ̀ à mà hwa hwiya ò tenì.

²⁵ Tɔ mòtò a rzi tànɛyi lì mò òhweyà tɔ̀ eyà lì hvòmɛ̀nɛ̀ òhvɛhvɛ mòtò, èhwanja mɔ̀ à mà kuwa lì hwiya mèèmà me hwatò hwa hwènàmà hwa arzɛ.