Matiyò 18 - Mokpwe: Bakwery (New Testament)

Njɛnɛ a hwèlì e mòndɛnɛ ò lìkànèyà la ŋmanyu e?

¹ O ŋmanà hvòka hvònda, Hwà-òkòwèlì hwa ama Yerzù rzìi hwa mò jèeyà hwa mò ijòwa nanù ema, “Njɛnɛ à hwèlì e mòndɛnɛ ò lìkànèyà là ŋmanyu e?”

² Yerzù rzìi a hwɛlɛ ŋmanà mòrzàlì a mò tɛ̀yirzɛ̀ ò ìtììtènì ja awu,

³ rzìi à òhwa nanù ema, “Nà è jɔ̀kɛ̀ nà è òhweyà nanù ema, è rza tikòhwi tɛ mòŋgɛ mà anyu rzìi è hwɛ nàa ini njuma ŋmanà, è rza ò tànɛ̀ lì kpeya ò lìkànèyà là ŋmanyu.

⁴ Tɔ̀ njɛnɛ rzɔ ema arzìirzɛ mɔ̀ ŋmìti ò lì hwɛ nàa ònò ŋmanà mɔ̀ ndi à hwɛ è mòndɛnɛ ò hwatò ema hwa hwèlì ò ìtììtènì ja lìkànèyà ema lì hwèlì ò ŋmanyu.

⁵ Tɔ̀ njɛnɛ hvɛ ema à kàrzɛ̀yi ene nyàyi yà ŋmanà ò lìnà là ami, nanù òma imba ndi à kàrzɛ̀yi.”

Màkèkìrzɛ̀nɛ̀ ema mà kemba mòtò ò wòhwe

⁶ Tɔ̀ njɛnɛ ema à gbèyi ema mɔ̀kɔ wà hwanù hwàrzàlì, ema à nò lòkɛ̀yì ò lì gbeyà wòhwe, ò lɔ̀wu nanù ema òŋgò mòtò à kakahwè lìŋyàyi lì ndɛnɛ ò lìwɔ là eni, rzìi hwa mò indirzɛ ò èki ema è rzɔ̀ŋgɔ̀ ò tenì yà ŋmànja.

⁷ Mòjèmà nà è rze, èhwanja è òhvi hweyà ema hwe lùkɛ̀lɛ̀ hwatò ò lì gbeyà wòhwe. Makèkìrzɛ̀nɛ̀ mà hwɛni lì jà, ndi è ò hwɛ wòhwe nà òŋgò mòtò ema à ò gbeyɛ òhvɛhvɛ mòtò ò lì gbeyà wòhwe.

⁸ È hwèlì tɛ ema lìya là aŋgɔ̀ tɔ̀ lìtaŋgà lì aŋgɔ̀ lì ò undìrzɛ̀ tɛ ò wòhwe ò lì kɛ ò lì hvimbe ɔ̀nɛyi. Ò lɔ̀wu nanù ema ò òhve lòŋgɛ nà lì hwɛ èhvàrzù yà nyò, lì aka ò lì hwɛnɛ màà màhwàkɛ̀ nà mèèndè mèhwàkɛ̀ rzìi hwa ò hvimba ò tenì yà mùnya ema mò rza lìma.

⁹ Lììrzɔ̀ là aŋgɔ hvɛ lì ò undirzɛ tɛ ò wòhwe ò lì ulɛ ò lì hvimbe ɔ̀nɛyi! È hwèlì gbamù ema ò òhve lòŋgɛ nà lìrzɔ̀ lɔ̀kɔ lì aka ò lì òhva mìrzɔ̀ màhwàkɛ̀ rzìi hwa ò hvimba ò tenì yà mùnya ema mò rza lìma.

Ŋmàna mò mɔlɛ̀ŋgù ema mò ma wɔ̀

¹⁰ “È aŋgòwe rzɔ nanù ema e rzi ndinda tɔ̀ mɔ̀kɔ hwa hwànù hwarzàlì. Nà e òhweyà nanù ema i aŋgèlì ema i hwa ɔŋgeya i hwèlì ò wòrzò wò ama Tatɛ̀ wa ami ema a hwèlì ò ŋmanyu yà lohwà.

¹² Mamɛ inyɔ e lùteyà ema mòtò à gbeyà à hwɛnì tɛ ègbe yà mɛ̀lɛ̀ŋgù rzìi mɔ̀kɔ mò wɔ̀ɔ̀ e? À rza ò lìya menìlùùwà nà lùùwà ema mè lèeyà ò mòòlì rzìi à ɛ̀ndɛ lì arza è mɔ̀ ema mò wɔ̀ e?

¹³ Nà è òhweyà ndi è jɔ̀kɛ̀ nanù ema à mò lù tɛ à òhva mɔ̀nyɛ̀ŋgì mò jɔ̀ɔ̀-jɔ̀ɔ̀ nà eŋge ehvòwà yà mɔ̀lɛ̀ŋgù lì aka mènìlùùwà nà lùùwà ema mè rza wɔ̀.

¹⁴ Nànù mɛnɛ hvɛ ndi e hwèlì nà Tatɛ̀ hwà anyu wà è ŋmanyu yà lohwà, ema a rza arza ema tɔ̀ mɔ̀kɔ wà hwànù hwarzàlì a wɔ̀.”

Ŋmànyàŋgò wà aŋgɔ̀ ema a ò gbeyànì wòhwe

¹⁵ “Ŋmànyàŋgò wa aŋgɔ̀ a ò gbeyànì tɛ wòhwe ɛndɛ ò mò uŋmɛ̀lɛ̀ lìwurze la eni ò wòrzò wò inyɔ hwahwàkɛ mɛnɛ, a ayèmbɛ tɛ lùurzè la eni aŋga nanù ò ma ò wa na ŋmanyàŋgò wa aŋgɔ̀ e ma rzeeya.

¹⁶ Ndi a rza emelì tɛ nanù ema a ò tònani, wòwa òhvɛhvɛ mòtò mɔ̀kɔ tɔ̀ hwahwàkɛ ò lì arza nanù ema, ‘Tɔ̀ ima wòhwe ema ò òhwa nanù ema a ò gbe e ò hwiyahwa na mbòŋgi ihwakɛ tɔ̀ iyàwò.’

¹⁷ A rzi imanɛlɛ tɛ mamɛ ema imbòŋgi jò òhwi, ò mò ɛ̀ndɛnɛ ò mìitelì, a rza emelì hvɛ tɛ lì hweyàna e hwaa mìitelì ò mò wòwe nàa mɔ̀kɔ ema a rza lòkɛ̀yì tɔ̀ e mòrzaŋgelì wa e njàŋge ya lìkànèyà.

Hwà-òkòlèlì hwa hwɛni wònja ò lì kiya tɔ̀ lì emeyà ema eyà e gbèyɛ̀nɛ

¹⁸ “Nà e òhweyà ndi e jɔ̀kɛ̀ nanù ema, Mamɛ ema e kakahwi ò rze, e kakahwa hvɛ ò ŋmanyu yà lohwà mamɛ hvɛ ema e kanɛ̀lɛ̀hwɛ̀yi ò rze, è kanɛ̀lɛ̀hwɛ̀ hvɛ ò ŋmanyu yà lohwà.

¹⁹ Nà e òhweyà hvɛ e jɔ̀kɛ̀ ema hwatò hwahwàkɛ anù rze hwa kaki tɛ ò lì ijòwa tɔ̀ ima lìtumba la eyà ò màkanɛ̀, Tatɛ̀ wa ami wa e ŋmanyu yà lohwà a hwa gbèeyà e yɔ.

²⁰ O èŋgànɛ̀lɛ̀ rzɔ, tɔ̀ ima èki ema hwatò hwahwàkɛ tɔ̀ hwàyàwò hwa arzàŋgànɛ̀yi ò lìna la ami, imba hvɛ na hwèlì ò ìtììtènì ja awu.”

Ŋmàna mò è mògbèèlì ema à rzi làkìrzɛ̀ ŋmanyàŋgò wà eni

²¹ Pètrò rzìi a jèeyà Yerzù a mò ijòwa nanù ema, “Ìi Rzàŋgò, ŋgelì iti na tànɛyi lì làkìrzɛ̀ ŋmanyàŋgò wa ami e hwèlì tɛ ema a nò gbeyànì wòhwe e? È hwèlì ndi lìrzamba la ŋgelì e?”

²² Yerzù rzìi a mò alàhwɛ̀ ama, “Rzeketɛ lìrzamba la ŋgelì mɛnɛ, ndi menì lìrzamba na lìrzamba la ŋgelì.

²³ O èŋgànɛ̀lɛ̀ rzɔ nanù ndi e hwèlì ò lìkànèyà là è ŋmanyu yà Lohwà. Lohwɛ̀ a kànèyà ndi nàa kiŋgɛ ema e hwɛlɛ hwàgbèelì hwe eni ema hwa kɔ̀ke wòlì ema tɔ̀ ima mɔ̀ wà awu a etàhwà.

²⁴ Nà òma à mà wòteya lì kɔ̀kɔ̀ wòlì ema wɔ̀ hwe etàhwà, hwà mà mò jàneyà mògbèèlì mɔ̀kɔ ema à mà etàhwà wòlì wò hvèeyi.

²⁵ Nà òma e mògbèèlì a rzi tanɛ lì taŋga lìŋgi lìyɛmɛ, eŋge kiŋgɛ ya eni rzìi e kànèyà nanù ema, òŋgò mògbèèlì, jòjìyɛ̀ na hwàànà hwa eni hwa arzɛ hwa àhwirzɛ̀hwɛ̀ nàa hwàkòmì na erzàŋgò ya eni ya arzɛ e àhwirzɛ̀hwɛ̀ ò lì taŋga lìyɛmɛ la eni.

²⁶ Oŋgò mògbèèlì rzìi a rzùmeya e kiŋgɛ màwɔ̀ŋgɔ̀ŋgɔ̀ ò matàŋgà ma eni a mò atɛkɛ ama, ‘O nò àjùlɛ̀nɛ̀ na ò rzaweya lìyɛmɛ la aŋgɔ̀ la arzɛ.’

²⁷ Eŋge kiŋgɛ ya ama òŋgò mògbèèlì e mò kpeya ììlì rzìi e mò làkìrzɛ̀ ò lìŋgi lìyɛmɛ rzìi à mà hwɛmɛ ema a ɛndɛ.

²⁸ Ndi na òma òŋgò mògbèèlì à mà wurze aŋga a ùŋmanɛlɛ òhvɛhvɛ mògbèèlì ema mɔ̀ hvɛ à mà hwɛ lì gbèeyà ò eŋge kiŋgɛ. Oŋgò mògbèèlì à mà mò eta ŋmanà mbumbu a wòlì. A ma mò hvùma rzìi à mò agba tahwa, a mò òhweyà ama, ‘Onò taŋgeya lìyɛmɛ la ami.’

²⁹ Ŋmanyàŋgò wa eni wa mògbèèlì a mò rzùmeya màwɔ̀ŋgɔ̀ŋgɔ̀ a mò atɛkɛ ama, ‘Onò àjùlɛ̀nɛ̀ na ò taŋgeya lìyɛmɛ lì aŋgɔ̀.’

³⁰ Ndi a rzìi mò làkìrzɛ̀. Mɔ̀ a ɛndɛ ndi lì mò aŋgɛ ò hwèwòwà ò lì hwɛ aŋga natɛ̀ɛ a mò taŋgeya lìyɛmɛ la eni la arzɛ ndèŋgànà a e mò hwɛmɛ.

³¹ Nà òma hwanɛ̀yi hwàgbèèlì hwà mà ɛnɛ mamɛ ya arzɛ ema e ma gbèyɛ̀nɛ hwà mà tata rzayi-rzayi, rzìi hwa ɛndɛ lì òhweyà e kiŋgɛ ya awu mamɛ ya arzɛ ema e ma gbèyɛ̀nɛ.

³² O èŋgànɛ̀lɛ̀ e kiŋgɛ e ma hwɛlɛ òŋgò mògbèèlì, rzìi e mò òhweyà ema, ‘O wa e mògbèèlì wa wòhwe ema ò rza làkirzɛ̀ nà mà ò làkìrzɛ̀, lìyɛmɛ là aŋgɔ̀ la arzɛ ema na ò eta èhwanja ò ma nò atɛkɛ.

³³ Oma ò rzi òhvanɛ ŋmanyàŋgò wa aŋgɔ̀ wa mògbèèlì ììlì na òma imba hvɛ nà mà ò òhvane ììlì e?’

³⁴ È kiŋgɛ e ma tata rzayi-rzayi, ò èŋgànɛ̀lɛ̀ e ma aŋgɛ òŋgò mògbèèlì ò hwèwòwà ema hwa mò tàkìrzɛ̀ natɛ̀ɛ a ò rzawa lìyɛmɛ la eni la arzɛ.”

³⁵ Yerzù rzìi a umba eŋge mbɔrzi ò lì òhwa nanù ema, “Nànù ndi Tatɛ̀ wa ami wa e ŋmanyu yà lohwà à ò gbèyɛ. O rza làkìrzɛ̀ tɛ ŋmànyàŋgo wà aŋgɔ̀ nà ŋmèma mò aŋgɔ̀ ma arzɛ eŋge ŋgàna e hwèlì ndi nanù ema Lohwɛ̀ a ò kɔ̀kìrzɛ̀ ndi na òma eŋge kiŋgɛ e ma kɔ̀kìrzɛ̀ òŋgò mògbèèlì.”