Lukàrzɛ̀ 11 - Mokpwe: Bakwery (New Testament)

Hwèyòkòwèlì lì hvòmɛ̀nɛ̀ màkanɛ̀

¹ Wùnyà wɔ̀kɔ, Yerzù à mà hwɛ èki ò lì kanɛ̀. Nà òmà a mà kulɛ lìŋgi lì kanɛ̀, rzìi mòòkòwèlì wà èni mɔ̀kɔ a mò òhweyà nanù ema, “Rzàŋgò e, ò jò òkòlɛ̀ nɛ ì hwɛnì lì kanɛ̀, nà òmà Yòwanìrzɛ̀ mɔ̀ hvɛ a mà òkòlɛ̀ hwà-òkòwèlì wa eni.”

² Yerzù à mà hwa òhweyà nanù ema, “È àrzà tɛ lì kanɛ̀ e òhwe nanù èma, ‘Ìi Tatɛ̀, inyɛ lìinà la aŋgɔ̀ lì lòkɛ̀hwɛ̀. Inyɛ̀ lìkànèyà la aŋgɔ̀ lì jèe.

³ O jò ŋgbe lì làa la arzu la wùnyà tɛ.

⁴ O jò làkìrzɛ̀ wòhwe wò arzu, nà òmà irzɔ hvɛ ì làkìrzɛ̀ wòhwe wò hwaŋga ema hwa jò gbeyànà wòhwe, O rzì emeyà nanù ema, ì kpèeyà ò màkèkìrzɛ̀nɛ̀.’”

⁵ Yerzù rzìi a hwa òhweyà nanù ema, “È hwèlì tɛ ema mɔ̀kɔ wà ànyu à òhvì mbunda, rzìi ò mò ɛ̀ndeya ò ìtììtènì jà wuu ò ndawò yà èni, rzìi ò mò òhweyà nanù ema, ‘Ŋmàyi kòkò ò nò hwalɛ hwèhvòòtò hweyàwò,

⁶ nà ò rzòrzòmelì nà lùu ŋmɛ̀ni à uwɛ̀lɛ̀lɛ̀yi hvòòhvò, mbunda wà amì wà mèrzìrza. O rzà ènje tɔ̀ yòmà ò ndawò ò lì mò ŋgbà.’

⁷ Oŋgò mbunda wà aŋgɔ̀ rzìi a wà alàhwɛ̀ ò ndawò nanù ema, ‘Ò rza nò kàyìrzɛ̀. Nà mà màa lì umba lìyòhva la ami, ìmba nà hwàanà hwa amì ì ma màa lì nàŋgà. O èŋgànɛ̀lɛ̀ nà rza tanɛ̀ lì tɛ̀mɛ̀ ò lì ò ŋgbà tɔ̀ yòmà.’

⁸ Nà è òhweyà nà è jɔ̀kɛ̀ ema rzèketɛ è mbunda yà aŋgɔ̀ nà mɔ̀ ndì è gbeyà a tɛ̀mɛ̀nɛ ò lìnɔ̀ŋgɔ̀. Ndi lì nina ò mò nina ndi lì mò gbeyà a tɛ̀mɛ̀ ò lìnɔ̀ŋgɔ̀ ndeŋgàna à ò ŋgba mamɛ ema ò arza.”

⁹ Nà è òhweyà nanù ema, “Ijòwa Lohwɛ̀, a ò ŋgbà. O arze, Lohwɛ̀ a gbeyà ò e ɛnɛ, ò kumbe lìyòhva, Lohwɛ̀ ò e lìhvòweya e lɔ.

¹⁰ Èhwanja tɔ̀ njɛnɛ ema a ijòwi Lohwɛ̀, à è lùwà. Òŋgò hvɛ ema à àrza yòma, à è ɛnɛ̀. È mɔ̀ hvɛ ema à kùmbi lìyòhva, Lohwɛ̀ à mò lìhvòweyà è lɔ.

¹¹ Ima rzàŋgò ema e ŋmanà a mò arzanì tɛ nyàmà yà màlìhwa rzìi a mò ŋgbà ndi ŋgbààhwà e?

¹² Tɔ̀ è ŋmanà à ijòwi tɛ ŋmèyò mò wuhwà rzìi à mò ŋgbà ndi lìwòhwɛ̀ là mèhvèndò e?

¹³ Hwatò hwa wòhwe nàa inyɔ è ŋgbà tɛ hwàànà hwa anyu hwema hwe gbamù, ŋgèlì iti nà Tatɛ̀ wà ànyu ema a hwèlì ò ŋmanyu yà Lohwà. Nɛ a rzà ŋgbà Èlìŋgɛ̀ yà Wòtani ò hwatò ema hwa mò ijòwi e?”

Yerzù à rza enje mɔ̀kɔ nà e kiŋgɛ̀ yà hwèlìŋgɛ̀ hwe wòhwe

¹⁴ Wùnya wɔ̀kɔ, Yerzù à mà ulɛ̀ èlìŋgɛ̀ ya wòhwe ò nyò yà mòtò ema e mà tìmbìrzɛ̀ mbùke. È hvònda ema èŋge èlìŋgɛ̀ ya wòhwe e mà ànjiye òŋgò mòtò, rzìi a wòteyà lì òhwa. Ènè eyà e mà tàmìrzɛ̀ è ŋgìndì ya àrzɛ.

¹⁵ Ndi lòŋgò la hwatò hwa mà òhwa nanù ema, “À gbeyànà ndi è wònjà yà ama Bɛ̀lrzɛ̀bùlì è Kiŋgɛ̀ yà hwèlìŋgɛ̀ hwe wòhwe ò lì hvayànà hwèlìŋgɛ̀ hwe wòhwe.”

¹⁶ Hwahvɛhvɛ hwatò wɔ̀ hvɛ hwa mà àrza lì mò kèkìrzɛ ema, a hwa uŋmɛ̀lɛ̀ eèmbànèlì ò ŋmanyu yà Lohwà.

¹⁷ Ndi Yerzù à mà hwiya mɔ̀ŋgɛ̀lɛ̀ mà awu, rzìi à hwa òhweyà nanù ema, “Tɔ̀ ima èkòmè ema è akahwanɛ ema è rzà òhwa eyà yɔ̀kɔ, è hwenì ndi lì hvaŋgeyà. Lìtumba hvɛ ema lì rza ahweyànɛlɛ lɔ̀ hvɛ lì hwɛnì lì wùhweyà.

¹⁸ Èkòmè yà ama Mòkarzɛ̀ lì akahwanɛ tɛ, nɛ lì tànɛyi ò lì tɛ̀mɛ̀ e? Nà òhwi ndi nanù, èhwanja è òhwi nanù ema nà gbeyànà ndi è ŋginyà yà ama Bɛ̀lrzɛ̀bùlì, ò lì hvayànà hwèlìŋgɛ̀ hwe wòhwe ò hwatò.

¹⁹ È hwèlì tɛ ema è ŋginyà yà ama Bɛ̀lrzɛ̀bùlì ndi nà gbeyàna, ò lì hvayà hwèlìŋgɛ̀ hwe wòhwe ò hwatò, è ŋginyà yà ama njɛnɛ hvɛ ema hwatò hwa anyu hwa gbeyàna ò lì hvayànà hwèlìŋgɛ̀ hwe wòhwe e? Wɔ̀ ndi hwa è gbeyà e tuwa ŋmaŋgò.

²⁰ Ndi nà òmà na gbeyàna ndi è ŋginyà yà ama Lohwɛ̀ ò lì hvayànà hwèlìŋgɛ̀ hwe wòhwe, e uŋmɛ̀lɛ̀ ema Lìkànèyà là ama Lohwɛ̀ lì ma è jèeyà.

²¹ Mòtò ema à imbami a àkpatɛ tɛ, ò lì ɔ̀ŋgeyà èwòka ya eni, tɔ̀ erzàŋgò yà eni, à rza ɛ̀ndɛ tɔ̀ èki.

²² Ndi è mɔ̀ ema à imbami lì mò akà, à mò urzuhwèlì tɛ, rzìi a mò lùwa rzìhwɛ, à mò wòwànà hwɛ̀ɛ̀kɛ̀ hweni hwe njùma. À ɛ̀ndɛ̀ lì hwàà hwèŋge hwemà ema a mò wòwanì.”

²³ “Tɔ̀ ima mɔ̀ ema a rza enje na imba òma a nò teŋgɛ̀nɛ̀yi, tɔ̀ è mɔ̀ hvɛ ema a rza nò òŋgòwànà ò lì rzàŋga, òma a hwèlì ndi ò lì bùulɛ.

Èlìŋgɛ̀ yà wòhwe e timbelì tɛ mòtò ò nyò

²⁴ “Èlìŋgɛ̀ ya wòhwe e wurzi tɛ̀ mòtò ò nyò, ya amàmìyɛ̀nɛ̀ɛ ndi ò mòrzanjɛ̀ ò lì àrza èki ema ya Arzìyòlɛ̀. È rzà lù tɛ èki, e àwòhwànɛ̀lɛ̀ yɔ yiti nanù ema, ‘Nà tìmbà hvɛ ò èŋge ndawò mɛnɛ ema nà mà hwɛ.’

²⁵ È tìmbi tɛ, e ùŋmànɛ̀lɛ̀ èŋge ndawò è rzàŋgi nà lì rzeyàhwɛlɛ.

²⁶ Èŋge èlìŋgɛ̀ e ɛ̀ndɛ̀ ò lì jànà hwehvɛhvɛ hwèlìŋgɛ̀ hwe wòhwe lìrzambà, ema hwe hwèlì wòhwe lì mò àka, rzìi hwe jà ò lì kpèeyà òŋgò mòtò, rzìi hwe arzɛ̀kɛ̀lɛ̀ aŋga. Lìŋgi lìrzàkò rzɔ, òŋgò mòtò a hwɛ wòhwe lì aka mamɛ à mà lòme lì hwɛ.”

Malìŋgò ma è jɔ̀kɛ̀

²⁷ Èŋge hvònda ema Yerzù a mà kulɛ̀ lì òhwà nanù, mòlanà mɔ̀kɔ ema à mà hwɛ ò ìtììtènì ja hwatò rzìi a òhwa nà lìlò lì karzami nanù ema, “Mònàmɛ̀ mò hwɛ nà lùùŋgà ema lì ò ŋya, nà mahwɛ hvɛ ema mà ò nyɔ̀ŋgìrzɛ.”

²⁸ Yerzù rzìi a mò alàhwɛ̀ nanù ema, “Mònàmɛ̀ mò hwɛ ndi nà hwaŋga ema hwa hweyà Eyà ya Lohwà, rzìi hwa gbeyà nà òmà ya òhwì.”

Hwatò hwa ène nyɔ̀ŋgɔ̀nì hwa àrza ndi emɛ̀nɛ̀nì

²⁹ Èŋge hvònda ema è ŋgìndì e mà kòke, aŋga ndi Yerzù, à hwa òhweyà nanù ema, “Ène nyɔ̀ŋgɔ̀nì yà hwatò è hwèlì ndi nyɔ̀ŋgɔ̀nì yà wòhwe. È àrza ndi lì ɛnɛ̀ mànyàkà mà amà Lohwɛ̀. Ndi hwa rza ò ma lùwa, lì akà tɛ èmɛ̀nɛ̀nì ya mànyakà mà ama Jona.

³⁰ Nà òmà Jona a mà hwɛ emɛ̀nɛ̀nì ya hwatò hwa Nìnìhvɛ̀, nanù hvɛ ndi è Ŋmanà wà e Mòtò wà Hwènàmà mɔ̀ hvɛ a ò hwɛ nàa ène nyɔ̀ŋgɔ̀nì yà hwatò.

³¹ O wùnyà wò hwèkàyìrzèlì è mòkànèlì wa mòlanà ema à ma hwɛ lìkànèyà èkòmè ya Rzebà mɔ̀ hvɛ à ò hvùmùwà ò rzɔ̀ŋgɔ̀ nà ène nyɔ̀ŋgɔ̀nì yà hwatò ò wùnyà wò hwèkàyìrzèlì. A ò tɛ̀mɛ̀ mbòŋgi ema e ò gbeyà ema hwa tuwe ŋmàŋgò. Hwa ò tuwa ŋmàŋgò èhwanja a uwɛ̀lɛ̀lɛ̀yi èki hvòòhvò ò lì òkànèyà hweyà hwe lìhwiyè ema Rzòlòmɔ̀nì à mà hwɛ lì òkòlɛ̀. Ndi yàwònò, ò hwèlì mòtò mɔ̀kɔ ema à akàyì Rzòlòmɔ̀nì.

³² O wùnyà wò hwèkàyìrzèlì, hwatò hwa Nìnìhvɛ̀ hwa ò hvùmùwà ò rzɔ̀ŋgɔ̀ nà ène nyɔ̀ŋgɔ̀nì yà hwatò. Hwa ò tɛ̀mɛ̀ mbòŋgi ema è gbeyà ène nyɔ̀ŋgɔ̀nì yà hwatò è tuwà ŋmàŋgò èhwanja hwatò hwa Nìnìhvɛ̀ hwà mà rzɔ̀njɛlɛ wòhwe wò awu è hvònda Jona a mà hwɛ lì hwa òhweyà Eyà ya Lohwà, ndi na òhweya nanù ema mòtò a hwèlì anu naŋgɛ ema à akayi Jona.

Ètùlù yà mòtò wà hwènàmà hwe nyò

³³ “Mòtò à rza tanɛ̀ lì hvààlɛ̀ ètùlù rzìi a e uta, tɔ̀ lì e utà ò rze ya èwòkì. À e ikà ndi ò mbòkò ema ètùlù e tɛ̀mɛ̀ ò lì arza nanù ema tɔ̀ njɛnɛ ema a kpèeyà ò ndawò, a ɛnɛ ŋmàye mò èŋge ètùlù.

³⁴ Mììrzɔ̀ ma aŋgɔ̀ ma hwèlì ndi nàa ètùlù ya è nyò yà aŋgɔ̀. Mììrzɔ̀ ma aŋgɔ̀ ma hwèlì tɛ gbamù, è nyò yà aŋgɔ̀ ya àrzɛ è òndà na ŋmàye. Mììrzɔ̀ ma aŋgɔ ma rzà ɛnɛ tɛ, è nyò yà aŋgɔ̀ ya àrzɛ è òndà jìtìtì.

³⁵ O aŋgòhweyà rzɔ nanù ema ŋmàye mò aŋgɔ mò nyò mò rzì tìmba jìtìtì.

³⁶ È hwèlì tɛ ema è nyò yà aŋgɔ̀ ya àrzɛ, è òndì ŋmàye, e rzi hwɛ ema tɔ̀ ènàmà ya aŋgɔ̀ yɔ̀kɔ e hwèlì ò jìtìtì, è nyò ya àrzɛ è hvàyeyà nàa ètùlù ndi e hvànyeyà hvànye-hvànye.”

Yerzù à mà lòmeya hwà-òkòlèlì hwa mbenda nà ì Hvàlìrzàyì

³⁷ È hvònda ema Yerzù a mà hwɛ lì òhwà rzì hvàlìrzàyì hvɔ̀kɔ e mò yòhwɛ ema a jèe a lee ò ndawò yà èni.

³⁸ À mà ɛ̀ndɛ nà mɔ̀, rzìi hwa lìya ò tehwèlì. Èŋge Hvalìrzàyì è mà tàmà ò lì ɛnɛ̀ ema Yerzù à wòtelì lì làa e rzì hwɛ lì àtùtɛ̀ màà.

³⁹ Aŋga ndi e Rzàŋgò è mà mò òhweyà nanù ema, “Inyɔ Ihvalìrzàyì, è rzaŋgìrzɛ̀ e mburzà ya lìwònde na mɔ̀njɔ̀ mò anyù ndi ò tenì ya anyu, lì lùmba la hwèèmà na wòhwe wò è òndì ò mèèmà me anyu.

⁴⁰ Inyɔ ndɔ̀ki ja hwatò! È mòtò ema à hwèki è mburzà, rzèke mɔ̀ hvɛ ndi à hwèki è tenì e?

⁴¹ Ndi inyɔ è wòwe hwèèmà ema hwe hwèlì ò tenì yà luku la mɔ̀njɔ̀, e ŋgbè mèlìrzà me hwatò, aŋga ndi hwèèmà hwe anyu hwe àrzɛ hwe rzàŋga.

⁴² “Èwòma na inyɔ Ihvàlìrzàyì! È ŋgbà Lohwɛ̀ lòŋgò lɔ̀kɔ la lìyòmɛ̀, màrzèhvu, e ndòwu nà hwenɛyi hwèwùlè hwe àrzɛ. Ndi è rza àrza lì uŋmɛ̀lɛ̀ mèèmà me gbamù nà è ndìŋgɛ yà ama Lohwɛ̀. È hwɛnì lì gbeyà hwenè hweyà hwe àrzɛ e rzì hwɛ lì lìyà hwenɛ̀yi.

⁴³ “Èwòma na inyɔ Ihvàlìrzàyì! È lìŋgàni lì lìya ò mbòkò ja hwèluhwe ò ndawò ja màkanɛ̀. È lìŋgàni hvɛ ìikɔ̀mi ja hwèluhwe ò hwèlùwà.

⁴⁴ Èwòma na inyɔ! È gbèe ndi nàa ì rzɔ̀ŋgɔ̀, ema ì rza òhvɛ màyembelì ema hwatò hwa akeyà, hwa rzà ja emba.”

⁴⁵ Mòòkòlèlì mɔ̀kɔ wà mbenda, rzì a mò òhweyà nanù ema, “Mòòkòlèlì, ò òhwa tɛ nanù, ò ma ò jò hwɛnyi irzɔ hvɛ.”

⁴⁶ Yerzù rzìi a mò tìmbirzɛlɛlɛ nanù ema, “Èwòma na inyɔ hvɛ hwà-òkòlèlì hwa mbenda! È ihwàlɛ̀ hwatò miyuuna ema me lìti lì hwa aka, ndi tɔ̀ inyɔ hwìti è rza tòmbirzɛ tɔ̀ lìya lɔ̀kɔ, ò lì hwa òŋgòwànà.

⁴⁷ Èwòma nà inyɔ! Èhwanja hwà-òhwèlì hwa hwèlìŋgɛ̀ ema irzàŋgo ja anyu ì ma òŋwe, è hwèlì e hwa òŋgeyà ìrzɔ̀ŋgɔ̀ ja awu.

⁴⁸ È hwɛ mbòŋgi nà lì imanɛ̀lɛ nanù ema irzàŋgo jà anyu ima gbeyà gbamù ò lì òŋwa hwà-òhwèlì hwa hwèlìŋgɛ̀. Inyɔ hvɛ ndi e hwa òŋgelì irzɔ̀ŋgɔ̀ ja awu.

⁴⁹ Nànù ndeŋgàtɛ Lohwɛ̀ ò lìhwiyè la eni à mà òhwa nanù ema, ‘Nà hwa òmeyà hwà-òhwèlì hwa ami hwa hwèlìŋgɛ̀, nà i àpɔ̀rzìtòlò. Hwa hwɛnì lì òŋwà lòŋgò la hwaŋga hwatò. Lòŋgò hvɛ hwa takìrzɛ̀hwɛ.’

⁵⁰ Ène ŋgàna è gbèyi ema, ène nyɔ̀ŋgɔ̀nì yò ò kɔ̀kìrzɛ̀hwɛ̀ ò nyòla màyija ma hwà-òhwèlì hwa hwèlìŋgɛ̀ hwa àrzɛ ema màyija ma awu ma mà rzòweyà ò hwèwòtelì hwe ène rze.

⁵¹ Lìwòteya nà màyija mà amà Abɛ̀lì natɛ̀ɛ nà è màa ama Rzàkàriyà ema à mà òŋwahwa ò ìtììtènì ja lììyɔ̀ là màkanɛ̀ nà ò èki yà Wòtani. Nà è òhweyà è jɔ̀kɛ̀ ema ène nyɔ̀ŋgɔ̀nì ndi è kɔ̀kìrzɛ̀hwɛ̀ ò nyòla hwenè hweyà hwe àrzɛ.

⁵² “Èwòma nà inyɔ hwà-òkòlèlì hwa mbenda! Inyɔ è ùti hwèlìhvòwànì hwe lìyòhva la è ndawò yà lìhwiyè. È rza àrza lì kpèeyà, è rza emeyà hwahvɛhvɛ hwatò hwa kpèeyà.”

⁵³ Nà òmà Yerzù a mà ànjiye èŋge èki, hwà-òkòlèlì hwa mbenda nà Ihvàlìrzàyì hwa mà mò tèŋgɛnɛ ŋginyà rzìi hwa mò ijòwa rzayì-rzayì ja mìijòwelì.

⁵⁴ Hwa mà hwɛ lì mò rzɔ̀rzɛlɛ mène mìijòwelì nanù, ò lì mò lùwàna lùrze.