Hwèwulùwèlì 15 - Mokpwe: Bakwery (New Testament)

Yòwanìrzɛ̀ a ɛni lìrzamba la aŋgèlì na kàndɛ lìrzamba

¹ Nà ma ɛnɛ o ŋmanyu yà lohwà ehvɛhvɛ embànelì ndɛnɛ ndèŋgànɛ̀lɛ̀ nà mà tàmà. Nà ma ɛnɛ aŋgèlì lìrzamba ema i ma ohva lìrzamba la kàndɛ ja lìrzùkù. Ini kàndɛ i ma hwɛ e jà lìrzùkù ehwànja jɔ ndi jo ondìrzɛ̀ hwètàtò hwe ama Lohwɛ̀.

² Nà ma ɛnɛ yoma nàa ŋmànja ema mo àyɛ̀kɛ̀nɛ̀ lìyɛ̀ni, ema mo hviyànɛlɛhwɛyi na mùnya. Ndeŋgànɛ̀lɛ̀ nà mà ɛnɛ hwatò hwa tɛmì o toŋgoŋgo ya eŋge yoma ema e ma hwɛ ndi nàa ŋmànja hwa tɛ̀tì indiŋga ja ama Lohwɛ̀. Hwàŋga hwatò hwa hwèlì ndi hwatò ema hwà mà rzuwàna eŋge èembè, na èrzìrzà ya eni, ndèŋgànɛ̀lɛ̀ hwà mà rzuwàna hvɛ mɔ̀rzɔ̀ŋgi mo lìinà la eŋge èembè ya worzo.

³ Hwà mà hwɛ lì emba mɔ̀rzɔ̀kɔ̀ mo ama Morzè e mògbèèlì hwa ama Lohwɛ̀ na mɔ̀rzɔ̀kɔ̀ mo ama e Ŋguma ya Mɔ̀lɛ̀ŋgù nanù ema, “Rzàŋgo Lohwɛ̀ lì Kàrzàmi, hwègbèèlì hwe aŋgɔ hwe olo ndeŋgànɛlɛ hwe hwèlì hwètàmirzelì. Kìŋgɛ ya hwèkòmè, hwègbèèlì hwe aŋgɔ hwe hvomɛ̀nɛ̀, ndèŋgànɛ̀lɛ̀ o hwèlì jɔ̀kɛ̀.

⁴ Ìi Rzàŋgo, njɛnɛ a rza o oka wɔ̀ŋgɔ̀ e? Njɛnɛ a rza o ŋgba èluhwe e? O wà witi mɛnɛ ndi o hwèlì wòtani. Hwàto hwa hwèkòmè hwe arzɛ hwe e rze ya mɔ̀nyɛ̀ hwa o jà o lì o kànɛ. Èhwànja hwègbèèlì hwe aŋgɔ hwe ehve-ehve hwe ma wulùwahwà.”

⁵ O mburza ene, nà mà ɛnɛ hwa lìhvo lìwondo la ama Lohwɛ̀ o tenì ya e ndawò yà Lohwà.

⁶ O tenì ya eŋge ndawò yà Lohwà o ma wurza lìrzamba la aŋgèlì ema i ma tɛtɛ ikàndɛ lìrzamba. Hwà mà wɔ̀tɔ̀ màatù ma mbɔ̀mi emà ma mà hvànya, Hwà mà kàkà hvɛ ŋgolì ja gòòlù o iŋgèŋgè ja awu.

⁷ Rzìi mɔ̀kɔ hwa hwèŋge hwèembè hwe aniyɛ ema hwe ma hwɛ lòŋgɛ, e ma ŋgba lìŋgi lìrzamba la aŋgèlì hwewoki lìrzàmba hwe gòòlù ema hwe ma ondìrzɛ̀hwɛ na hwètàtò hwe ndɛnɛ hwe ama Lohwɛ̀, mɔ̀ ema a hwèlì natɛ̀ɛ na o gbìndèyà.

⁸ Rzìi Yùutùtù ya èluhwe ya ama Lohwɛ̀ na màyìmbi ma ama Lohwɛ̀ hwe onda e Ndawò ya Lohwà. O eŋgànɛlɛ tɔ̀ mòtò a rzi tànɛ lì kpèeyà o tenì ya lìŋgi lìwondo, natɛ̀ɛ iŋgi kàndɛ lìrzàmba ja iŋgi i aŋgèlì i kuwa.