Ɛ̀hvìrzìyà 5 - Mokpwe: Bakwery (New Testament)

Ɛ̀ɛmɛ̀ ema e wɔ̀ ema hwa oŋgama Krirztò hwa hwɛni lì hwɛnɛ

¹ Ɛ̀ɛmɛ̀ ya anyu e hwɛni ndi lì hwɛ nàa e ya ama Lohwɛ̀ èhwanja e hwèlì ndi hwàanà hwa eni ema mɔ̀ à lìŋgàni rzayi-rzayi.

² Inyɔ e lìŋgàne hwahvɛhvɛ hwatò, ŋgànà hvɔ̀kɔ nàa oma Krirztò a me e lìŋgàne rzìi a jo ŋwèeyà. A ma aŋgbɛ̀ɛ mɔ̀ ŋmìti o ma Lohwɛ̀ nàa làhweyà na jàhwèyà ema i ma lìŋgìrzɛ Lohwɛ̀ rzayi-rzayi.

³ Nà oma e hwèlì ndi hwatò hwa ama Lohwɛ̀ o rza lɔ̀wu nanù ema e gbeye mòrzònje, tɔ̀ inyɔ o lì gbeyà hweyà hwe mbindo tɔ̀ lì hwɛ wɔ̀ɔ̀. Ini nyayi ja hweyà i rza lɔ̀wu lì hwɛ̀ɛnɛ o ìtììtènì ja anyu.

⁴ È rzi keka hvɛ tɔ̀ lì tuhwa mendeŋga me ndɔ̀ki, tɔ̀ lì ohwa hvɛ èèti ya mbɔrzi, tɔ̀ lìkohwi ema lì àŋgayi. Ndi inyɔ e àŋgàmɛ̀nɛyi ndi lì ŋgbà Lohwɛ̀ jeka.

⁵ È hwɛnì lì hwiya nanù ema tɔ̀ ima mòtò ema a hwèlì mòrzònje, rzìi a à gbeyà hweyà hwe mbindo tɔ̀ ema a hwèlì wɔ̀ɔ̀, a rza o kpèeyà o lìkànèyà la ama Krirztò na Lohwɛ̀, ndèŋgàna a rza o luwa hwèèmà hwe gbamù ema Lohwɛ̀ a ohwi nanù ema a ŋgba. È mòtò ema a hwèlì wɔ̀ a gbèyi ndi nàa mòtò ema a kànɛ̀lɛ̀lɛ̀ ma hvɛhvɛ mohwà.

⁶ Tɔ̀ mòtò a rzi keka lì e ɔ̀njɔ na mbɔrzi ya èèti. Lohwɛ̀ a o kɔ̀kìrzɛ̀ hwatò ema hwa rza gbèeyà na oma mɔ̀ à àrzeyà, ndi hwa gbeyà ndi hwene hweyà hwe wòhwe.

⁷ O èŋgànɛ̀lɛ̀ e rzìi keka lì alàtànɛ na iŋgi nyàyi ja hwatò ema i gbèeyà ini nyàyi ja hweyà hwe wòhwe.

⁸ Èhwanja o ma hwɛ hvonda hvɔ̀kɔ ema inyɔ e ma hwɛ ndi o jìtìtì, ndi nàŋgɛ ema e hwèlì na e Rzàŋgo mɔ̀ à mà e gbèeyà ema e hwɛ o ŋmàye. O èŋgànɛ̀lɛ̀ rzɔ ɛ̀ɛ̀mɛ̀ ya anyu e hwɛ ndi nàa hwaŋga hwatò ema hwa hwèlì o ŋmàye.

⁹ Nà ohwa ndi nanù ehwànja hwatò ema hwa hwèlì o ŋmàye wɔ̀ hwa gbèeyà ndi hweyà hwe gbamù, hwa gbèeyà ndi hweyà ema hwe hvomɛ̀nɛ̀yi na hweyà ema hwe hwèlì jɔ̀kɛ̀.

¹⁰ O èŋgànɛ̀lɛ̀ e keke lì hwiya mamɛ ema e lìŋgìrzɛ e Rzàŋgo.

¹¹ È rzìi keka lì ohva tɔ̀ eyà o lì gbeyàna hweyà hwe wòhwe ema hwatò ema hwa hwèlì o jìtìtì hwa gbeyà. Ndi tɔ̀ nanù e uŋmɛ̀lɛ̀ hwatò nanù ema ini nyàyi ja hweyà i rza lɔ̀wu.

¹² O hwèlì hvɛ ndi erzàmbo ò lì ohwa lì hvomɛ̀nɛ̀ hweyà ema hwahvɛhvɛ hwatò hwa gbèeya o jùtuta.

¹³ Mòtò a wurzàni tɛ hwene hweyà o ewoka, hwatò hwa hwɛni lì ɛnɛ kɔ̀yi-kɔ̀yi nɛ hwene hweyà hwe hwèlì.

¹⁴ Ŋmàye ndi mo wuluhwa hweyà hwe wòhwe. Ɔ̀ndeŋgàtɛ̀ e ohwahwi nanù ema, “O wa ema o nàŋgaa imòwa, hvùmùwà o kpelì. Ŋmàye mo ama Krirztò mo uŋmɛ̀lɛ̀ o nyo ya aŋgɔ̀.”

¹⁵ O èŋgànɛ̀lɛ̀ rzɔ e aŋgòwè nɛ e lìiya. È rzi lìya ndi nàa hwèètì hwe hwatò. È lìya ndi nàa hwatò ema hwa aŋgo.

¹⁶ È gbeyàne ihveyo ja arzɛ ema e lùu o lì gbeyà gbamù, ehwànja mene mèènyà wòhwe wo àkɛ̀lɛ̀nɛ̀yì.

¹⁷ O èŋgànɛ̀lɛ̀ rzɔ è rzì hwɛ nàa hwèeti hwe hwatò. È àŋgàmɛ̀nɛ̀ ndi lì rzɔ̀ŋgìtɛ̀nɛ̀ eyà ema e Rzàŋgo e arzà nanù ema e gbèyè ndèŋgàna ye e gbeyà.

¹⁸ È rzì woma mboma yà mimba, èhwanja mà è tìmbìrzɛ̀ ndi hwèèti hwe hwatò. Ndi tɔ̀ nanù, inyɛ Èlìŋgɛ̀ yà Wòtani e hwɛ o tenì ya anyu.

¹⁹ È à èmbànɛ mɛ̀rzɔ̀kɔ̀ mè Lohwà, ò lì àyètìrzɛ̀nɛ̀ mɔ̀kɔ nà ɔ̀nɛyi. È embe mɛ̀rzɔ̀kɔ̀ ema mè uwɛ̀lɛ̀lɛ̀yi ò kaàtì yà ama Lohwɛ̀ ya mɛ̀rzɔ̀kɔ̀ ndeŋgànɛ̀lɛ̀ è embe hvɛ tɔ̀ ima mɔ̀rzɔ̀kɔ̀ ema mò uwɛ̀lɛ̀lɛ̀yi ò Èlìŋgɛ̀ yà Wòtani ò lì eka Lohwɛ̀.

²⁰ È eke Lohwɛ̀ Tatɛ̀ yà arzu ò ihvonda ja arzɛ ò tɔ̀ mamɛ ema è hwɛni lì gbèyɛ̀nɛ. È mò eke ò lìinà là ama Rzàŋgo yà àrzu Yerzù Krirztò.

Màyòwà mà ama Pàwolò o mèjòmɛ̀ nà ijòjìyɛ̀

²¹ È aŋgbɛ inyɔ hwiti o lì gbèeyà mɔ̀kɔ nà ɔnɛ̀i o nyòla ya èluhwe e ma i ŋgbelì Krirztò.

²² Inyɔ ijòjìyɛ̀, e arzìhwìrzɛ̀lɛ̀lɛ̀ mèjòmɛ̀ me anyu, ŋgànà hvɔ̀kɔ nà omà o hweyànà Rzàŋgo.

²³ Mòjòmɛ̀ mo hwɛnì è wònjà yà hwèkànèlì oma jòjìyɛ̀ wà èni, ŋgànà hvɔ̀kɔ nà omà Krirztò a hwɛnì è wònjà yà hwèkànèlì o lì arzàŋgànɛ la hwatò hwa Lohwà hwa àrzɛ̀. Ndèŋgànà lɔ̀ ndi lì hwèlì nàa e nyo ya eni ndèŋgàna mɔ̀ ndi à hwèlì lì oŋgirzɛ la lìŋgi la arzàŋgànɛ la hwatò hwa Lohwà.

²⁴ Ò èŋgànɛ̀lɛ̀ rzɔ i jòjiyɛ̀ i hwɛnì lì hweyàna mèjòmɛ̀ me awu o hweyà hwe arzɛ, ŋgànà hvɔ̀kɔ nà omà lì arzàŋgànɛ la hwatò hwa Lohwà lì hweyàna Krirztò.

²⁵ Inyɔ mèjòmɛ̀ è lìŋgàne ìjòjìyɛ̀ ja anyu, ŋgànà hvɔ̀kɔ nà omà Krirztò à lìŋgàni lì arzàŋgànɛ là hwatò hwa Lohwà, rzìi a aŋgbɛ̀ lòŋgɛ là eni ò lì hwa ŋwèeyà.

²⁶ À mà hwa ŋwèeyà aŋga nanù hwa hwɛ worzaŋgi. À mà gbeyàna malìhwa nà è mbɔrzi yà eni ò lì rzaŋgirzɛ là arzàŋganɛ là hwatò hwa Lohwà.

²⁷ À mà gbeyà ndi nanù aŋga nanù lì arzàŋganɛ là hwatò hwa Lohwà lì hwɛ gbamù ò worzo wò eni. À mà arza lì jànà lìŋgi là arzàŋganɛ là hwatò nà mɔ̀, è rzìi hwɛ tɔ̀ lìtɔ̀tì là mbindo, tɔ̀ etɛndɛ, tɔ̀ è hvɛhvɛ eyà yà wòhwe ò lì hwɛ ò nyo ja awu. Ndi hwa rzàŋga ndèŋgàna hwa rza hwɛnɛ tɔ̀ eyà yà wòhwe ò inyo ja awu.

²⁸ Ò ene ŋgàna mɛnɛ, mèjòmɛ̀ me hwɛnì lì lìŋgàna ijòjìyɛ̀ ja awu nà omà ja alìŋgànɛ inyo ja awu. Tɔ̀ ima mòjòmɛ̀ ema mo lìŋgàni e jòjìyɛ̀ yà èni nanù ò ma a alìŋgànɛ̀yi mɔ̀ ŋmìti.

²⁹ O rzà ènje tɔ̀ mɔ̀kɔ hwà àrzu ema à kɔ̀wu è nyo yà èni. Ndi a e lìrzɛ̀ na lì e womba. Molemilemi nà omà Krirztò a gbeyàna la arzàŋganɛ la eni la hwatò hwa Lohwà.

³⁰ Irzɔ ndi i hwèlì hwatò hwa e nyo yà èni.

³¹ Nà omà è tìlàhwì o kààtì yà Lohwà nanù ema, “Ène ŋgàna ɔ̀ndeŋgàtɛ̀ ŋmanà wa munyanà a hwɛ̀mɛ̀ rzàŋgɛ na nyàŋgɛ rzìi a uŋma jòjìyɛ̀ wa eni rzìi hwahwàkɛ hwa alàtànɛ̀ o lì hwɛ mòtò mɔ̀kɔ.”

³² Ène eyà e hwèlì ndi eyà ndɛnɛ ema tɔ̀ mòtò a rza tànɛyi lì rzɔ̀ŋgìtɛ̀nɛ̀. Ndi na lòkɛ̀ nanù ema hwene hweyà hwa hwe ohwa ndi lì hvomɛ̀nɛ̀ Krirztò nà la arzàŋganɛ la hwatò hwa Lohwà.

³³ O eŋgànɛ̀lɛ̀ rzɔ, tɔ̀ ima mòjòmɛ̀ à hwɛnì lì lìŋgàna e jòjìyɛ̀ yà èni nà omà a alìŋganɛ mɔ̀ ŋmìti, rzìi tɔ̀ ima jòjìyɛ̀ mɔ̀ hvɛ à hwɛnì lì ŋgbàà mòjòmɛ̀ mo eni èluhwe.