Ɛ̀hvìrzìyà 2 - Mokpwe: Bakwery (New Testament)

I hwèlì lòŋgɛ na oma i hwèlì mɔ̀kɔ na Krirztò

¹ Ò mòlòmɛ̀ ì mà hwɛ̀ɛ ndi nàa hwatò ema hwa mà ŋwɛ̀ɛ̀ èhwanja è rzi hwɛ lì gbeyà hweyà ema Lohwɛ̀ à mà ohwe ema è gbèye, ndèŋgàna è mà hwɛ lì gbeyà wòhwe.

² Ò eŋge hvonda è mà nɔ̀ŋgɔ̀ hweyà hwe wòhwe hwe hwatò hwa ene rze. È mà hwɛ lì hweyàna è mòkànèlì ema à kànèyà hwèlìŋgɛ̀ hwe wòhwe ema hwe hwèlì ò yululì. Nàtɛ̀ɛ nà yàwònò, eŋge èlìŋgɛ̀ è hwèlì è kànèyà hwatò ema hwa gbeyà mamɛ ema Lohwɛ̀ à ohwi nanù ema hwa rza gbeyà.

³ Irzɔ hwa arzɛ hvɛ i mà hwɛ ndi nàa wɔ̀. I mà hwɛ hvɛ ndi lì gbeyà hweyà o lì òkìrzɛ̀ e nyàma nyo mɔ̀nyɛ̀ŋgì. I ma hwɛ lì gbeyà hweyà hwe wòhwe na oma inyo ja arzu i ma arze nà e hweyɔ hvɛ ema màlùtèyà ma arzu ma mà arze. Wono wòhwe ema i ma hwɛ lì gbeyà, wo ma hwɛnɛ lì gbeyà Lohwɛ̀ o lì jo kɔ̀kìrzɛ̀ molemilemi na oma a kɔ̀kìrzɛ̀ hwatò hwa arzɛ.

⁴ Ndi Lohwɛ̀ ema a ondi na ììlì, na lì jo hwɛneya hvɛ ndìŋgɛ ndɛɛnɛ̀,

⁵ mɔ̀ à mà jò gbeyà o lì hwɛ lòŋgɛ na oma i hwèlì na Krirztò, tɔ̀ nɛ i ma hwɛ ndi nàa hwatò ema hwà mà ŋwɛ èhwanja i rzi hwɛ lì gbeyà hweyà ema Lohwɛ̀ à mà ohwe nanù ema e gbeye. O lì akeyà na e ndèli ya àma Lohwɛ̀ ɔ̀ndeŋgàtɛ̀ i rzuŋgàhwì.

⁶ Nà oma i hwèlì na Krirztò Lohwɛ̀ à mà jò hvùmùlɛ̀ na mɔ̀ rzìi a jo lìilɛ nà mɔ̀ o lìkànèyà la ŋmanyu.

⁷ Lohwɛ̀ à mà jo gbèeyà ene eyà ya gbamù, o lì jo uŋmɛ̀lɛ̀ ŋmèma mo eni mo gbamù lì akeyà nà Yerzù Krirztò. Aŋga nanù o hvonda ema e o jɛ̀ɛ̀, hwatò wo ɛnɛ nɛ e ndèli ya eni ya ehwàŋgì e àkàyi hweyà hwe arzɛ.

⁸ È ndèli ya ama Lohwɛ̀ yɔ ndi ye e rzuŋgi, èhwanja e lòkɛ̀ Krirztò ɔ̀ndeŋgàtɛ̀ e lu lìŋgi lì oŋgirzɛ. Rzeketɛ hweyà ema e gbèeyà ndi hwe gbèyi e lu lì oŋgirzɛ. Li oŋgirzɛ ema e lu, lì hwèlì ndi jàhwèyà ja ama Lohwɛ̀.

⁹ Lohwɛ̀ a rza jo rzuŋgi ndi o nyòla hwèwòlò hwe gbamù ema i gbèeyà, o èŋgànɛ̀lɛ̀ o rza enje tɔ̀ lìtiŋga o tɔ̀ ima mòtò o lì ayèkirzɛ.

¹⁰ Lohwɛ̀ à mà jo wèka o lì hwɛ mamɛ ema i hwèlì naŋgɛ. Nà oma i hwèlì mɔ̀kɔ na Yerzù Krirztò, mɔ̀ à jo ŋgbelì lòŋgɛ aŋga nanù, i gbeyà hwèwòlò hwe gbamù nanù ndi Lohwɛ̀ à mà tɛ̀yirzɛ natɛ̀ɛ na e hvonda ya koohwa ema i luwa ene tumba ɛ̀ɛ̀mɛ̀ o lòŋgɛ.

Irzɔ hwa arzɛ i hwèlì ndì mòtò mɔ̀kɔ na Krirztò

¹¹ Inyɔ ema e rza enje hwatò hwa wònyà Yudà e ɔ̀ŋgɛ̀lɛ na oma o marzalɛ wònyà Yuda ema hwa ahwɛlɛ wɔ̀ hwiti nanù ema, “hwatò ema hwa endahwi,” hwà mà hwɛ lì e hwɛlɛ nanù ema, “hwatò ema hwa rza endàhwɛ̀.” (Ndi lì endàhwà la anyu la nyo lì hwèlì ndi mamɛ ema e mòtò hwa hwènàmà a gbeyàna lìya la eni).

¹² È ɔ̀ŋgɛ̀lɛ hvɛ ema o eŋge hvonda inyɔ e rzìi hwiye Krirztò. Inyɔ e rzi ahvìyànɛ̀ mondeŋge na hwatò hwa Irzàyɛ̀lì ema wɔ̀ ndi Lohwɛ̀ à mà hvɔ̀rzì. È rzi hwɛnɛ tɔ̀ eyà o lì gbeyàna yòòmbò ema Lohwɛ̀ à mà ohwe nanù ema a gbeyà mamɛ a hwɛni lì gbeyà. Nà oma e ma hwɛ o rze e rzi hwɛnɛ tɔ̀ lìhvìtà, ndèŋgàna e rzi hwiye Lohwɛ̀.

¹³ Ndi o naŋgɛ ema e ma hwɛ mòtò mɔ̀kɔ na Yerzù Krirztò, inyɔ ema e ma rzɔlɛnɛ Lohwɛ̀ e ma jà naŋgɛ lì kombɛnɛ Lohwɛ̀ èhwanja màyija ema Yerzù à mà kome o nyòla anyu.

¹⁴ Krirztò mɔ̀ ŋmìti mɛnɛ, mɔ̀ ndi à hwèlì e mɔ̀ ema a jo janelì ɛ̀yɔ̀lɛ̀. A ma gbeyà hwatò hwa wònyà Yudà na hwaŋga hwatò ema hwa rza enje wònyà Yudà o lì hwɛ mòtò mɔ̀kɔ. È kpelì ya eni e ma ulɛ ɛ̀kɔ̀wù o ìtììtènì ja anyu. Èŋge ɛ̀kɔ̀wù e ma hwɛ ndi nàa erzù ema e ma jo kahwa.

¹⁵ À mà gbeyà è mbenda yà wònyà Yudà è rza ohvi ŋginyà hvɛ. À mà gbèeyà ndi nanù, aŋga nanù, à rzàŋga wònyà Yudà nà hwaŋga ema hwa rza enje wònyà Yudà ò lì tìmba nàa mòtò mɔ̀kɔ mohvènya ema nà wɔ̀ hwa hwɛ ndi mòtò mɔ̀kɔ nà Krirztò. Ò èŋgànɛ̀lɛ rzɔ nà oma à gbèyi ene eyà nanù, mɔ̀ à mà jànà ɛ̀yɔ̀lɛ̀ ò ìtììtènì jà wònyà Yudà nà hwaŋga ema hwa rza enje wònyà Yudà.

¹⁶ Ò èŋgànɛ̀lɛ̀, nà oma à mà ŋwèeyà ò mbarza, è mà jò gbeyà irzɔ ò lì hwɛ mòtò mɔ̀kɔ nà Lohwɛ̀, ò èŋgànɛ̀lɛ̀ rzɔ à mà jò tìmbìrzɛ̀ nà Lohwɛ̀.

¹⁷ Krirztò à mà jà hvɛ ndì ò lì è ohwà inyɔ ema è rza enje wònyà Yudà Ŋmɛ̀ndì mò Gbamù mò ɛ̀yɔ̀lɛ̀, inyɔ ema è mà rzɔ̀lɛ̀nɛ̀ Lohwɛ̀. À mà ohweyà hvɛ wònyà Yudà nanù mɛnɛ, wɔ̀ ema hwa mà kombɛ̀nɛ̀ Lohwɛ̀.

¹⁸ Èhwanja ò mamɛ ema Krirztò à mà jò gbèeyà, irzɔ hwa arzɛ i hweni è njiya ò lì ɛndɛ ò mà Tatɛ̀. Èŋge Èlìŋgɛ̀ yà awɔ̀kɛ mɛnɛ yɔ̀ ndi è jò oŋgòhwànà ò lì gbeyà nanù.

¹⁹ O èŋgànɛ̀lɛ̀ rzɔ, inyɔ hwatò ema e rza enje wònyà Yudà, e rza enje hvɛ ndi hwàyɛ̀nì tɔ̀ hwatò ema hwa uwɛ̀lɛ̀lɛ̀yi hvoohvoo. Ndi inyɔ na hwatò hwa ama Lohwɛ̀ e hwèlì ndi hwatò ema e uwɛ̀lɛ̀lɛ̀yi o èki yɔ̀kɔ. Inyɔ hwa arzɛ e hwèlì ndi nàa hwatò ema e hwèlì ndi o lìtumba la ama Lohwɛ̀.

²⁰ È hwèlì ndi nàa hwèèmà ema hwa gbeyàna o lì oŋgà e ndawò. I àpɔ̀rzìtòlò na hwà-òhwèlì hwa hwèlìŋgɛ̀ hwa gbèyi ndi nàa mɔ̀nɔ̀ŋgɔ̀ mo e ndawò. Yerzù Krirztò mɔ̀ ŋmìti ndi à hwèlì lìwondi la tina.

²¹ Mɔ̀ ndi à gbèyi ema e ndawò e tɛ̀mɛ̀. Mɔ̀ ndi à e nyàlirzɛ̀ o lì uka e ndawò ya wòtani ya ama Rzàŋgo.

²² Nà oma e hwèlì mòtò mɔ̀kɔ na Krirztò, à mà e lata na hwahvɛhvɛ hwàlòkèlì hwa Krirztò. Nà oma e hwèlì naŋgɛ nanù, e hwèlì ndi nàa wòoŋgi ema Lohwɛ̀ a lìiyaà o tenì. Lohwɛ̀ ema a hwèlì ndi nàa Èlìŋgɛ̀.