1 Kɔ̀rintìyà 2 - Mokpwe: Bakwery (New Testament)

Ŋmɛ̀ndì mò lì wòmàwɛlɛhwɛ̀ la ama Yerzù o mbarza

¹ Wònyamòwè è hvònda ema nà mà e jèeyà, ò lì e ùkirzɛ̀lɛ̀lɛ̀ ŋmɛ̀ndì mò Wòtani mo ama Lohwɛ̀, na rzì e ohwane tɔ̀ mbɔrzi e mà e mà imbama tɔ̀ lìhwìyè hvɛ ema lì mà karzama.

² Nà omà nà mà hwɛ na inyɔ, nà mà àwòhwànɛ̀lɛ̀ na imba mbiti nanù ema na rza gbeyà hvɛ tɔ̀ eyà lì aka tɛ o lì ohwa lì hvomɛ̀nɛ̀ Yerzù Krirztò na e kpelì ema à mà ŋwèeyà o mbarza.

³ Nà mà hwɛ̀ nà inyɔ ò e mbowà ya anyu ndɛɛ̀ndɛ nà rzi tanɛ o lì gbeyà ene èwòlò, èhwanja ŋmèmà mà ami mo ma tumeya na wɔ̀ŋgɔ̀.

⁴ Nà oma nà mà hwɛ lì e okolɛ̀, na lì ohweyà Ŋmɛ̀ndì mò Gbamù, ŋmɛ̀ndì nà mà hwɛ lì e ohweyà, mo rzi ohve tɔ̀ mbɔrzi ya lìhwiyè lì ndɛnɛ. Ndi na oma nà mà hwɛ lì e ohweyà Ŋmɛ̀ndì mò Gbamù, hweyà ema nà mà hwɛ lì ohwa, hwe uŋmɛ̀lɛ̀ ema e ŋginyà ya Èlìŋgɛ̀ yà Wòtani ema hwɛ na imba.

⁵ Nà rzi arze ema e lòkɛ̀ Ŋmɛ̀ndì mò Gbamù èhwanja mòtò mɔ̀kɔ a mà gbeyàna lìhwiyè la eni la mòtò wà hwènàmà o lì e ohweyà e mɔ̀. Ndi nà mà arza ema e lòkɛ̀ mòŋgo Ŋmɛ̀ndì mò Gbamù na oma Lohwà Mɔ̀ ŋmìti a gbeyànì e ŋginyà ya eni o lì e gbeyà ema e lòkɛ̀ Ŋmɛ̀ndì mò Gbamù.

Lìhwiye ema lì uwɛ̀lɛ̀lɛ̀yi o ma Lohwɛ̀

⁶ I hwèlì tɛ na hwaŋga ema hwà mà jɛ̀ɛ̀ hwàmbaki o malòkɛ̀ ma awu na Yerzù, e hwèlì tɛ ema i ohwa ndi Ŋmɛ̀ndì mò Gbamù, i mo ohwàna ndi na lìhwiyè. Liŋgi lìhwiyè lì rza enje ndi lìhwiyè ema mòtò wa ene rze a gbeyàna. Tɔ̀ e lɔ ema e wɔ̀ hwa kànèyà ene rze, ema lìkànèyà la awu ŋmanà mbɔ lì kùwa.

⁷ Lìhwiye ema i gbeyàna, lì hwèlì ndi lìhwiyè ema Lohwɛ̀ a jo ŋgbelì. Lìhwiye ema lì ma ùtàhwa natɛ̀ɛ na ò hwèwòtelì, o lìhwiyè la arzu ema Lohwɛ̀ à mà tɛ̀yirzɛ ndèŋgàna hwewòtelì hwe rze.

⁸ Ndi, e wɔ̀ hwà kànèyà ene rze hwà rzi rzɔ̀ŋgìtɛ̀nɛ̀ lìni lìhwiyè lì ndɛnɛ̀ la ama Lohwɛ̀. Hwà mà rzɔ̀ŋgìtɛ̀nɛ̀ tɛ mamɛ ema Lohwɛ̀ ama hwɛ lì gbeyà, oma hwa rzi wòmeyà e Rzàŋgo wa èluhwe o mbàrza.

⁹ Èya èŋge ema e tìlahwì o kààtì ya wòtani nanù ema, “Tɔ̀ mòtò a rza ɛni, tɔ̀ mòtò a rzi hweyi, tɔ̀ mòtò a rzi lutelì hwenè hweyà Lohwɛ̀ à rzɛ̀ŋgɛnɛ hwaŋga hwatò ema hwà mò lìŋgàni.”

¹⁰ Ndi, Lohwɛ̀ à mà gbeyàna Èlìŋgɛ̀ yà Wòtani o lì jò uŋmɛ̀lɛ̀, hwènè hweyà hwe arzɛ. Èlìŋgɛ̀ ya ama Lohwà è arzìrzɛ̀ hweyà hwe arzɛ, ndèŋgàna e hwi hweyà hwe arzɛ, na ìwùndɛ̀ ja ama Lohwɛ̀ ema mòtò a rza tànɛyi lì rzɔ̀ŋgìtɛ̀nɛ̀.

¹¹ Tɔ̀ mòtò à rzà tanɛ̀yi lì hwiyà mɔ̀ŋgɛ̀lɛ̀ ma mòtò. Èlìŋgɛ̀ ema e hwèlì o tenì ya mòtò, yɔ ndi e hwi màlùtèyà ma ama òŋgo mòtò. Nànù mɛnɛ ndi tɔ̀ mòtò tɔ̀ mɔ̀kɔ à rza tànɛ lì hwìyà mɔ̀ŋgɛ̀lɛ̀ ma ama Lohwɛ̀, lì aka tɛ èlìŋgɛ̀ ya eni mɛnɛ.

¹² I rzà ohvì ndi èlìŋgɛ̀ ya ene rze, i ohvi ndi èlìŋgɛ̀ yà wòtani ema Lohwɛ̀ a jo ŋgbèli, oma i ma rzɔ̀ŋgìtɛ̀nɛ̀ hweyà hwe arzɛ ema hwe jo ŋgbààhwì nà Mɔ̀, ò ŋgùndù.

¹³ I rza gbeyàna ndi è mbɔrzi ema e mòtò wà hwènàmà a gbeyàna lìhwiyè là eni o lì okolɛ̀nɛ hwatò. Ndi i gbeyàna ndi mamɛ Èlìŋgɛ̀ yà Wòtani e jo lìyɛlɛ o lì ohwa. I gbeyàna ndi e mbɔrzi ema Èlìŋgɛ̀ yà Wòtani e jo òhweyà lì hvomɛ̀nɛ̀ hwèŋge hweyà.

¹⁴ È mɔ̀ ema a rza ohvɛɛ Èlìŋgɛ̀ yà Wòtani a rza o lùwa hweyà ema hwe uwɛ̀lɛ̀lɛ̀yi o Èlìŋgɛ̀ ya ama Lohwɛ̀. Mɔ̀ a rza tànɛyi lì rzɔ̀ŋgìtɛ̀nɛ̀ hwèŋge hweyà, hwe hwèlì ndi hweyà hwe mɔ̀lɔ̀kɔ̀rzɔ̀ na mɔ̀. A rza tanɛ lì hwe rzɔŋgìtɛ̀nɛ èhwanja Èlìŋgɛ̀ yà Wòtani yɔ ndi e òŋgòwàna hwatò ò lì rzɔ̀ŋgìtɛ̀nɛ̀ hweyà hwe ama Lohwɛ̀.

¹⁵ È mɔ̀ ema à ohvi Èlìŋgɛ̀ yà Wòtani a tànɛyi lì rzɔ̀ŋgìtɛ̀nɛ̀ o lì hwiya hweyà hwe arzɛ. Ndi, tɔ̀ mòtò tɔ̀ mɔ̀kɔ a rza tanɛ lì hwiya mɔ̀ŋgɛ̀lɛ̀ ma eni.

¹⁶ Nà oma è tìlàhwì ò è kààtì yà Lohwà nanù ema, “Njɛnɛ à hwi màlùtèyà mà ama Rzàŋgo e? Njɛnɛ à tànɛ lì mò ŋgba màyòwà e? Ndi irzɔ jo ohvi màlùtèyà mà ama Krirztò.”