1 Jon 1 - Somba-Siawari

Malmal köhöikŋaŋgö keuŋi mi Jisös Kraist

¹ Nöŋön malmal köhöikŋaŋgö keuŋi jimamgöra kimbi ki ohozal. Mutuhök malmalgö keu Toŋan maliga miaŋgö könaŋe öröyuai pakpak asuhuyök. Yaŋön mala kota gölmenöŋ eriga i jeninan eka böröninan sileŋi misiriinga keuŋi jii möta malin.

² Oyaeŋkoyaeŋ malmalgö Toŋan asuhuiga neŋön i eka könaŋi naŋgöba jiba dangunu ewö kinjin. Malmal teteköŋi qahö miaŋgö Toŋan Iwibuk mala kota eta asuhum neŋgiyöhi, neŋön miaŋgö Buŋaŋi jim asariba uruŋini kuŋguzin.

³ Neŋön Iwi aka yaŋgö Nahönŋi Jisös Kraist yetpuk urunini jöhöba mohot maljin. Iŋini mewöyök uruŋini nembuk jöhöba mohot malbingöra yuai eka mörini, mi jim tuarim eŋgizin.

⁴ Sösöŋgainöŋ urunini kokolak qei malbingöra keu ki jim tuariba ohozin. Mewö.

Kembugö asakŋe malmal

⁵ Buŋa keu yaŋgö Nahönŋaŋgöreŋök möta jim tuarim eŋgizini, mi kewö: Anutunöŋ asakŋaŋgö Toŋi akza aka yaŋgöreŋ söŋaup kun qahö ahöza.

⁶ “Neŋön yambuk urunini jöhöba mohot maljin,” mewö jitnöŋ jiba töndup aiakaninan jipjap aka söŋaupnöŋ maljin ewö, mönö keu muneŋ jiba ahakmemeninan keu ölŋi qahö wuataŋgömakzin.

⁷ Anutunöŋ asakŋaŋgö uruŋe maliga neŋön miaŋgö dop aiakanini asakŋaŋgö uruŋe ahakzin ewö, mönö sutnine urunini jöhöm aŋguba mohok malinga Nahönŋi Jisös Kraistkö sepŋan mönö siŋgisöndoknini pakpak saŋgoŋmakza.

⁸ Urunine siŋgisöndok qahö ahöza, mewö jibinak ewö, mönö nanini tilipköm aŋguinga keu ölŋan urunine qahö kinma. Qahö!

⁹ Siŋgisöndoknini jim miwikŋaizin ewö, yaŋön mönö uruŋi diŋdiŋaŋgö dop jöhöjöhö keuŋi pöndaŋ wuataŋgöba siŋgisön-doknini mosöta ahakmemenini goŋgoŋi pakpak saŋgoŋmakza.

¹⁰ “Siŋgisöndok qahö ahin,” mewö jibin ewö, mönö keu Toŋi oŋgiringa Anutunöŋ muneŋ jiji azi tandök aiga keuŋan urunine qahö kinma. Mewö.