Esekieli 1 - U TIENU MAAMA TILI 2013

U Tienu yini Esekieli o tuonli po 1—3 U Tienu doagidi Esekieli po

^1-3 I binpiitaadi cinaa damuuli, mini o kopadiciamo Busi bijua, Esekieli, n den ye leni ban den cuo yaa Jufinba ti yonbidi Kebari kpenu jaali po. N den laa ke tanpoli luodi, ke n baa yaa bonlekaala n ñani U Tienu kani. Li den tie o bado Joakini yonbidi binmuuli ŋmaalo damuuli. Lankane Kebari kpenu jaali po, Babilonni yaaba diema nni yeni, ke o Diedo den maadi leni nni, ke o paalu mo jiidi n po.

⁴ N den diidi ki laa ke ku tafaaciangu ñani nujienu po, ki yegi leni tawaciangu, ke u mu yenma lindi ku, ke mi tañigima mo ña ku niinni. Ku siiga nni den co ki ñuliti nani yaa kudi n ñuliti yeni.

⁵ Ku gaanma siiga nni bonfuodanaa den doagidi ki naani leni bi nisaaliba.

⁶ Bi siiga yuakuli den pia nunmunaa leni fiabinaa.

⁷ Bi taana mo den se ŋmaliŋmali ke bi taafaadi mo naani leni a naabila taawoga, ki ñuliti nani ban kpilini yaa kumoandi yeni.

⁸ Bi den pia ti nubuadi ke ti ye fiabu kuli tinga, ki pegidi ki tiegi kuninaa yeni nani bi nunmu leni bi fiabi yeni.

⁹ Bi fiabi joma den siigi miyama. Yuakuli den cuoni ki tiegi wan nua naani ki naa jigi o gbanu.

¹⁰ Bi siiga yuakuli den pia yaa nunmu n tie ne: Ki nisaalinunga, ki yangbannunga u jienu po, li naatonli yaa nunga u ganu po leni jiebani mo yaa nunga.

¹¹ Bi fiabi leni bi nunmu kuli den paadi leni liyala. Yuakuli den pia fiabilie ke i tandi ki siigi ilieli leni fiabilie ke i pini o gbanandi.

¹² Yuakuli den cuoni ki tiegi o nunga n tiegi naanpo. Bi den caa ban den bua naankani kuli, ke laa den tie tiladi ban jigidi bi baa.

¹³ A bonfuoda yeni den naani leni a mukuanmoana. Bi den tie nani i mukaani yene ki den gaandi yaa lenli nni n den ye a bonfuoda yeni siiga. U mu den yendi hali boncianla ke mi tañigima mo den ña mi niinni.

¹⁴ A bonfuoda yeni den caa ki goa tonma nani mi tañigima yeni.

¹⁵ N den diidi a bonfuoda yeni bonŋanla, ki laa ke yaa taana n naani leni a kaanda yeni ye yuakuli kani, tiipo.

¹⁶ A kaanda yeni n den ñuliti maama den naani leni kilisoliti yaa tana, ke ŋani kaandanaa yeni kuli pia nannanyenli. Li den naaninni ke kaandili kuli taagi liyali nne.

¹⁷ A kaanda yeni yaa den cuoni, a den baa yaa cuoni kalinaa yeni kuli nni, ki naa jigidi.

¹⁸ A kaanda yeni n den kpedi maama den pia ti jawaandi. A kaandinaada yeni tugu po den gbie leni i nuni ke i gaani ki lindi akuli.

¹⁹ A bonfuoda yeni yaa den cuoni, a kaanda moko yen baali ba ki cuoni. A bonfuoda yeni mo yaa den yugidi ki naa siigi tinga, a kaanda yeni moko yen yugidi.

²⁰ Bi den caa ban bua naankani kuli, ke a kaanda yeni mo den yegi leni ba, kelima yaa yantiali n den ye a bonfuoda nni yeni n go den ye a kaanda yeni niinni mo.

²¹ Yaa yogunu ke bi cuoni, bi ki se, bi ki yugi, a kaanda yeni mo yen yegi leni ba ki tiendi yeni, kelima a den pia a bonfuoda yantiali a niinni.

²² A bonfuoda yeni yula po, bonla den ye ki naani leni tanpoli, ki ñuliti ki pelini nani mi tanpenpelinma yeni, ki yiini yuakuli yuli po, ki ŋoagini bikuli.

²³ Mi tanpenpelinma yeni tiipo, bi siiga yuakuli den pia fiabilie ke i den naadi ki se ki tiegi leni ilieli. Yuakuli den pia fiabilie ke i pini o gbanandi.

²⁴ N den gbadi bi fiabi n pia yaa fuugu ban den cuoni yaa yogunu, ku den tie nani mi ñincianma yaa fuugu, bi nani U Paaciamu Daano yaa nialu yeni. Laa fuugu den naani leni toagocianli yaa fuugu yene. Bi yaa den sedi, bi yen cedi bi fiabi n guani ki jiidi.

²⁵ U nialu den ña yaala n den liibi bi yula po nani tanpoli yeni,

²⁶ ki naani leni safiri tanli, ki go naani leni li bali kalikaanu. Li bali kalikaanu yeni yuli po, o nilo nannanli den se lipo tanpoli.

²⁷ N den laa ke laa nannanli tuodi ki pelini nani yaa kudi n ñuliti yeni. Li den tie nani u mu n lindi yaala n den naani nani o ciaga yeni po leni tiipo kuli, n den laa la nani mi fantama n yen yendi yaala yeni.

²⁸ Yaa yenma n den lindi den naani leni o taniano ki taaga daali. Li den tie o Diedo kpiagidi doagidima. Min den laa lani, n den baa tiipo ki labini, ki gbadi ke u nialu maadi leni nni.