YOSHUWA 3 - Bibliyeeda Ghaydit

Fuga Israeli ghoaghaawa Yordani

¹ Sakteayda gabay ghang'eat Yoshuwa ak ghabeawa Shitimu, sea fuga sean bea Israeli; ak geahita Yordani, ak geenyo eepiida hoowa heeda mii ghoaghaawa.

² Ng'ata eawooji samwagu ghang'ata fuga hees gwasik bugusta museasooda

³ ak gwarukusa buuneeda nea geeyeesha, “Inyas ghoadaayi sandakwajeanda neajeeda bea NG'UTAMIIDA was ASEETEANG'WA nea ghwasar ashoohoodiga fuga Lawi abeeda ghoang'ami heedoondi ak ghoayaachi geeshta,

⁴ ak gajanala naweeda jea asiga, aba gideaba naweani ghayi mii asiga. Nea gagasa gwanda dageascheeda sandakwajeanda neajeeda ea agooga dageascheeda gaygooyang'da geatin sagalamnyooji iyeenya adiidu gooneekiisi.”

⁵ Ghwalamda Yoshuwa ak gwayeesha buuneeda, “Oamiini geat; aba gideaba numuji NG'UTAMIIDA gaygwasin ng'asheega deamdeameadi aba jeedeang'wa.”

⁶ Ghwalamda Yoshuwa ak gwayeesha ashoohoodiga, “Asareana sandakwajeanda neajeeda, ak goosiikchi madeeda buuneeda.” Ng'ata gageanda sandakwajeanda neajeeda, ak geeweay madeeda buuneeda.

⁷ Ak gwayeesha NG'UTAMIIDA Yoshuwa, “Eanean gaydeambiinyi aba madeeda fuga sean bea Israeli, ak abeeda ghwanal gideaba gidaghayi eandeayeati Musa, gichea dandeayeataneegwa.

⁸ Ak girukusi ashoohoodiga sar sandakwajeanda neajeeda gideaba, ‘inyas ghoahiti ghuuta beega Yordani, abeeda ghoamiinaadi aba jeeda Yordani.’”

⁹ Ak gwayeesha Yoshuwa fuga Israeli, “Apkaana hiji, ayiinya ng'asheega NG'UTAMIIDA was ASEETEANG'WA.”

¹⁰ Ak gwayeesha Yoshuwa, “Biisa gajanala gideaba ASEETA mideawa Eaweega gwanda jeedeang'wa, ak ea mayghwaraay ghahoan aba madeedeang'wa fuga Ganaani, ea Hiti, ea Hafiti, ea Berisi ea Girgashi, ea Amori, ea Yebusi.

¹¹ Ng'ula, sandakwajeanda neajeeda bea NG'UTAMIIDA gayghang'ataawa madeadaang'u buuneesean bea ng'eanyiida ea ghwahita Yordani.

¹² Asi ghamneawa geani headi damaniyeenya bea Israeli gaygaba nih igeani ng'eedeanagi jeeda giliwas eamwa.

¹³ Inyas ghoala ashoohoodiga sar sandakwajeanda neajeeda bea NG'UTAMIIDA, Ng'utamiida bea ng'eanyiisean, ak ghoala beega Yordani, abeeda gayghamiinaada beega Yordani maygagulda, nea beega rarang'aan leabu humng'eeda gaygabassa geat hijagi gawuurji dulgwajeanda.”

¹⁴ Hean nea gwariteawa buuneeda jeesinga maheemajeega nyaawa, ak ghoaghaawa Yordani, nea ghwasar ashoohoodiga sandakwajeanda neajeeda aba madeeda buuneeda,

¹⁵ iidu nea ghwahita fugiga sar sandakwajeandean Yordani, ak ghoala geeshanga ashoohoodiga sar sandakwajeanda beega sileeha (Yordani inyeesa ghwanyiit ea ghwanaawa mareedakaaschi aba damanda lajita booga),

¹⁶ ak beegiga rarang'aana heetiyeadean, hean ghamiinaada ak ghang'eat gawuurji dulgwajeanda nea sheagi, aba Adamu, was mujiineedida neekeewa Saretani, ak beegiga gwararang'eesa basooda Araba was basooda balang'da, ak ghwajaam sean; ak googeawsa buuneeda meatkweeda deaschi Yeriko.

¹⁷ Hean gwasik fuga Israeli sean ng'eanyiida ghajaam, nea ashoohoodiga sar sandakwajeanda neajeeda bea NG'UTAMIIDA ghamiinaada aba heeda ghajaam aba bugusta Yordani, ea gwayi bwak ea ghang'ata eemeesean aba Yordani.