Yohaana 3 - Bibliyeeda Ghaydit

Yesu ea Nikodemu

¹ Asi gwanda siispa Farisaayajeega siguura Nikodemu, nea ghoahaaghwa fuga Yahudi.

² Siisi Gaweesa Yesu eawa ak gwayeesha, “Rabi, aseasa geanali gideaba ang'iing'i guwoosi giinealshoocheanda ak gileabu heeda ASEETA; aba gideaba manda siida ammu gwasin gwadeagwajeesu isinayiin, geaghus siida mideayi sea ASEETA.”

³ Ghwasha Yesu ak gwayeesha niny, “Aba huumwa, aba huumwa geayeeshiineey siida iimeebiikta eeji deaba iyeenya ea mayghwadaah sugoocheanduumeeda ASEETA.”

⁴ Gwayeesha Nikodemu niny, “Iijea eebiikta eeji siida niheedu? Gayghoamu gideaba gaygabiikta jeeda ghaamwat deaba iyeenya ak geeji?”

⁵ Ghwasha Yesu ak gwayeesha, “Aba huumwa, aba huumwa, geayeeshiineey, siida iimeejiilana beega ea Guroorooda ea mayghoammu gawa jeeda sugoocheanduumeeda ASEETA.

⁶ Gissijiila saseeda gaba saseeda, nea gisijiila guroorooda gaba Guroorooda.

⁷ Adihami ng'eanyi aba gideaba geayeeshiineey, ‘Siida geaghus eebiikta eeji.’

⁸ Jeammeeda iissa gagal heeda gasa, ak giyiinyi ghuuta ak ea minali heelleabu ghana heeda gal, ea giduurji siidida sijiila Gurooroodean.”

⁹ Gwayeesha Nikodemu niny, “Ng'asheesu iijeagwasa?”

¹⁰ Ghwasha Yesu ak gwayeesha niny, “Eara ang'iing'i giwoosi giinealshoocheanda Israeli ak ea minali ng'asheesu?

¹¹ Aba huumwa, aba huumwa, geayeeshiineey, aseasa geeruku gida sinalli ak geemuuwu gidaghayi sidaayi; amaduuku agooga ghanyea moamwasi ng'asheega simuuwu.

¹² Asi iyearukuneegwa ng'asheega badayda ng'eanyiida ak ea moamwasi, abeeda iyearukuneegwa ng'asheega mida humng'eeda gajamwastaan?

¹³ Manda siida ghayi nidiyeada ea gawa humng'eeda geaghus Orjeeda Siida ghayi rarang'aana humng'eeda

¹⁴ Gawuurji gida ghayi atoasta Musa ichibooda aba dareapcheeda, gwasunu eara Orjeeda Siida gajeatoastunu.

¹⁵ Abeeda siida jea ghamwas niny gayghwanyas eaweega manda muudeanooda.”

¹⁶ Aba gideaba ASEETA ghabwariiy ng'eanyiida ea eeyi bwak ea ghoadayda Orjeedaanyi asakaleala, ak abeeda siida wassean mwas niny ea mwaroada ak abeeda ghwanyas eaweega manda muudeanooda.

¹⁷ Aba gideaba ASEETA ghayi moojeakna Orjeeda ghwaan ng'eanyiida, ak goorgweaksa ng'eanyiida, geegasa ghwalaalaan ng'eanyiida aba badaydaanyi.

¹⁸ Siida mwas niny majeergweaksa; nea siidida mamwasaan ea ning'ata girgweaksinda, aba gideaba mamwasa gheawunga Orjeeda assakalealla bea ASEETA.

¹⁹ Ak girgweaksinda ea nihi, ghwahidu weeshinda jeeda ng'eanyiida, ak ghabwariiy buuneeda misaneeda ea ghoadaraam weeshinda, aba gideaba sinaweega nyaawa ea munyas.

²⁰ Siida sina ng'asheega munyas iissa ghwasit weeshinda, nea ghanyea mayghoan heedeesh aba gideaba gajiidu geataajiit sinaweagaaschi munyas.

²¹ Nea siidida sina huumeandean gayghoan heedeesh, ak geesikteawa sinaweagaaschi gideaba ghoawal gheang'da ASEETA.

Yesu ea Yohana

²² Iing'ata ng'asheesu gawa Yesu sea ginealangaaschi ea ghwahita ng'eanyiida Yudeya, goobiida hoowa sea ginealangaaschi nea goobaatiisan.

²³ Abeeda eara Yohana goobaatiisan aba Ainoni, neekeewa Salemu, aba gideaba hoowa gwanda beega saang'a; iissa gaweay buuneeda heeda ak goobaatiisan.

²⁴ Aba damandida Yohana miyeayaat ghealooniga.

²⁵ Iidu ghoaptu sheang'nyeeda aba jeeda giinealanga Yohana ea siispa Yahudi aba ng'asheega giimiinnooda.

²⁶ Hean iidu gaweay heeda Yohana ak gwayeesha, “Rabi, siida heeta indeawi aba giigheawda Yordani ghayi imuuwu ng'asheagaaschi eara niny ghamneawa goobaatiisan, nea gaweay headaanyi buuneesean.”

²⁷ Gwayeesha Yohana, “Siida moamu ghwanyas gida wassean geaghus dea siitaw leabu humng'eeda.

²⁸ Nea eara agooga ghoamuuschi amuuwuuni gideaba geayeenyi, aniini meawoosi Gristo, aniini geecheaknean deashoayna niny.

²⁹ Siida mideawa gatmooda bea nyeangiida niny siida geeshi, amaduuku siituupchi siida geeshi, iissa ghamiinaada nea gooleeysiit nea gahoosan muuchi iiyiiy ghuuteaba siidida geeshiin; asi aba sareani hooseaneegeasu niheedu.

³⁰ Gammiisa niny gideaba gajea ghaloamwaat ak ea meawoosi aniini ghaloamwaat.”

Siida leabu humng'eeda

³¹ Siida leabu humng'eeda eahaweewa sean, nea siida mida badayda ng'eanyiida gaba ng'eanyiida, ak gabaloola ng'asheega ng'eanyiida; nea siidida leabu humng'eedean eahaweewa sean.

³² Niny iissa gamuuwu ng'asheega dea ea gea iiy, ak ghanyea manda siida mwas muuwuunoadaanyi;

³³ amadu siidida mwas muuwuunoadaanyiin, abeeda eara niny ea niiroor gideaba ASEETA huumwa.

³⁴ Aba gideaba siida ghayi ajeagu ASEETA iissa gabaloola ng'asheega ASEETA ak ghoadaw guroorooda nea moodeena;

³⁵ Bwaabwa ghabwariiy Orjeeda, ak ea niyiin haleanjeeda sean geatindaanyi.

³⁶ Siida mwas Baleanda gwandeawa eaweega manda muudeanooda; nea siidida moawala gheang'da Baleandean ea mayghwanyas eaweega, abeeda gaygwanda badaydaanyi nyarasta ASEETA.