Yohaana 2 - Bibliyeeda Ghaydit

Nyeangiida mida Gana

¹ Iimuchu eaweeteaba samwagu gwanda nyeangiida Ganeeda mida Galilaya, eara gheamata Yesu abeeda gwanda hoowa;

² nea eara Yesu ea ginealangaaschi ea siguursa ghapka nyeangiini.

³ Iidu nea ning'at difaayi gwayeesha gheamata Yesu niny, “Mudugwandeawa difaayi.”

⁴ Gwayeesha Yesu ghaamwat, “Ea iyya, ang'iing'i geendeayeesi naaha? Damandeanyu miighwahidu.”

⁵ Ghwalamda gheamata ak gwayeesha soomjooga, “Agooga asina gilinyoo gwarugu niny.”

⁶ Abeeda gwanda hoowa sirbaji lah ghayi sisna lagheanga, ak geeyiina beega ahuuniida fuga Yahudi aba giimiinoodeaba geat, aba heesinyeeka jeesinga nyaawa gwalassa galaanajeega diktam ghana diktam ea damanamughuush.

⁷ Gwayeesha Yesu saawa, “Oanyiida sirbajeesu beega.” Hean geanyiit ea ghwanaawnaawda.

⁸ Ng'ata gwayeesha saawa, “Asi aramni ak gooyeasi siida haw ang'aata buuneeda.” Hean geeyeassa.

⁹ Iidu nea gwasamu Siidida ang'aata buuneedean beegiga, ea niyamwa ghoah difaayi, nea abeeda niny ea mwanala heeda leabu, (nea soomjoogiga ghwanyawa ramu beegean ghwanal), gaguursa Siidida ang'aata buuneedean siida geeshi

¹⁰ ak gwayeesha, “Eawoojisu buuneeda inyeesa ghanyi gooshoohu difaayi miyaas; ama daah beadi nileeshi buuneeda muuchi, hean gabiissa gooruudu gea munyas; ang'iing'i nukwa gudumideawana difaayi miyaasiin eara ghamneawa.”

¹¹ Gwadeagooni diita ghayi sin Yesu bea madeedean gil aba Ganeeda Galilaya nea abeeda ghwanung' eadaah giigheambiitaanyi; eara ginealangaaschi hean gabiissa ghamwas niny.

¹² Iing'ata ghang'eat ghwararang'aada gawa Gapernaumu nea goodeayi ghaamwat ea orjooga ghaamwat ea ginealangaaschi; goobiida hoowa askwearjoojisu ng'ay.

Yesu gawa jeeda gheeda sibata ASEETA

¹³ Abeeda gwaneekiidean ghweelmeeda Basaaka bea fuga Yahudi, hean ghwascheang'da Yesu gawa Yerusalemu.

¹⁴ Ghwanyasa jeeda gheeda sibata ASEETA buuneeda; heeda mwashaayda heewga suurja ghwashaayda gisilga nea suurja ghwashaayda ghariibajeega, ea gea nyarja lapiyeeda gadiyeata.

¹⁵ Hean gwasin ghealooda, amahit ghahoan buuneesean mideawa gisilga ea heewga aba jeeda gheeda sibata ASEETA; ak ghoahiida lapiyeeda fuga nyarja lapiya nea goobimbiineada measajeega nyaawa.

¹⁶ Gwayeesha fugiga ghwanyawa sheahiida ghariibajeegean, “Oang'aamwana dugusu hiji; adoonung' ghoah ghooriida Bwaabwa ghooriida siikeakshacheewa.”

¹⁷ Ghoapkaat ginealangaaschi gideaba geang'waar, “Bariinyeegeasu aba gheang'u gayghwaagan.”

¹⁸ Ghoanyaash fuga Yahudi nea gwayeesha, “Gaysina ana gwadeagu jea eadaaha gideaba gisini ng'asheesu?”

¹⁹ Ghwasha Yesu nea gwayeesha, “Anyarja gheawi sibata ASEETEAN ak gaydadeas aba jeemba askwearjooji asamwagu.”

²⁰ Hean gwayeesha fuga Yahudi, “Gheawi sibata ASEETEAN ghayi deestaanyi gageanu gweanyeew haradam ea lah, ak gaydeasa aba jeemba askwearjooji samwagu?”

²¹ Nea abeeda gheeda sibata ASEETA rugu ea saseadaanyi gil.

²² Iidu nea niduuna miyeeda, ghoapkaat ginealangaaschi gideaba ghayi nirugu ng'asheesu, ak ghamwas ng'ooruutka ea ng'asheega ghayi rugu Yesu.

Yesu ghwanal ng'asheega mida jeesinga buuneeda

²³ Damanda mideewa Yerusalemu aba jeeda ghweelmeeda Basaaka, ghamwas fuga saang'a gheawungaaschi iidaah gwadeagooda sin;

²⁴ nea Yesu ea mamwasa fugiga aba gideaba nisikiideawa sean,

²⁵ aba gideaba niny ghwanal buuneassean ak ea magassa gideaba gaygamuuwu sih; aba gideaba niny ghwanal gidamida jeesiida.