YOELI 3 - Bibliyeeda Ghaydit

ASEETA gaygoorgweaksa eemoojiga

¹ “Aba gideaba ang'ula, eaweedida, ea damandida, jea deadeelsiina miyeenooda Yuda ea Yerusalemuun,

² gaydabwada geat eemoojiga sean, ak gaydeadu dearareang'sa moangoachiyda Yehoshafati, nea aba hoowa gaydeargweaksa aba badahuuka fugeasu, ea aba badayda hearaniischoodeanyu, was Israeli, ghayi darsa jeeda eemoojiga, ak ghwalajaada ng'eanyiideanyu.

³ Ak gwalaja fugeasu aba guura, ak ghoadaw orjeeda gatmooda hiseada, ak ghwashaayda huda aba difaayi, ak ghwali.

⁴ “Asaha, ama agooga goowooschi naaha aba heedeanyu, ea Diro ea Sidoni, sea ng'eanyoojiga sean bea Filisti? Heapi gajawalneani ghana jea asimanean ng'asheanda wassean? Gaydalamwach nea ghaarabwaaschi ak gaydaaghuumneegwa waliideang'wa gayghoan badahuukeagwa agooga.

⁵ Aba gideaba noogeandi lapiyeedeanyu ea dahaabu was dahaaboodeanyu ak ea noogeandi haleanjeedeanyu miyaasiin sibwariiy ak ghoayaachi jeesinga gealgeagwa oobati aseeta.

⁶ Nea gicha diibiga Yuda ea diibiga Yerusalemu ea neashaaydi aba heeda fuga Yunani, ak goosheagiidi moonghajeega nyaawa.

⁷ Ang'ula, gaydaheat gwariteawa heeda ghayi eashaaydaawi, nea aniini gaydeadeelu waliideang'wa ghwahidu badahuukeagwa agooga.

⁸ Ak aniini gaydashaayda orjoogeagwa ea haweegeagwa, ak ghaayiinyi geatinga fuga Yuda, ak gayghwashaayda aba heeda fuga Sheba, was eemeeda sheagi muuchi; aba gideaba nih ng'asheanda rugu Ng'utamiida.”

⁹ Ang'ula ng'asheesu aba jeeda eemoojiga; ang'ula ng'ucheeda; aheada fuga daruusi; fuga ng'ucheeda daneekiida ak ea dascheeng'da.

¹⁰ Oataanya mageemboojigeagwa ghoah ng'utkeaka, nea ghoah shumghajeegeagwa ng'utkeaka; nea siida ng'arng'ar ea dayi, “Aniini geawooschi daruus.”

¹¹ Alamwaja, abeeni, ea fuga eemoojiga sean mida meadajeega sean, oawaamwa geat; nea aba hoowa ghoararaang'di fugeagwa sean daruusi, ea Ng'utamiida.

¹² Eemoojiga deadiing'diing'da, ak gaweay moangoachiyda Yehoshafati; aba gideaba hoowa heechea deabiida ak geargweaksi eemoojiga sean mida meadajeega seani.

¹³ Asi ageani barda alaja aba gideaba booga niheas; ang'aalda sabiibu gawuurji gidang'ealiida gidasimanmana sabiibu aba gideaba ninyiit nea daramajeega ghwanyiit difaayi ea ghwanaawda aba gideaba niheedu munyinda nyaawa.”

¹⁴ Eemeetuw, eemeetuw, gwanda jeeda moangoachiyda sirgweacha! Aba gideaba eaweeda NG'UTAMIIDA nineekiit aba jeeda moangoachiyda sirgweacha!

¹⁵ ASEETA ea sheeda sinung' gamisaniidi, nea miinga ea mudu gooboong'u.

ASEETA gayghoadaw fugaaschi ghawooda

¹⁶ NG'UTAMIIDA ghwanya daghata aba Sayuni, ak ghwanya ghuutaanyi aba Yerusalemu; ak gwaduumduum humng'eeda ea ng'eanyiida. Nea NG'UTAMIIDA ea heeda mang'awiisa fugaaschi, nea niny ea igeambooda majeek bea fuga Israeli.

¹⁷ “Nih abeeda ea gichea analda gideaba aniini geawooschi NG'UTAMIIDA, was ASEETEANG'WA, abiita Sayuni, was giijeedeanyu ghaydit; ak abeeda Yerusalemu gayghaghaydiit, nea jeadaanyi ea maygwasik rabasta earahay.

¹⁸ “Nea abeeda eaweedida, gayghoabuutpuudu giijeega difaayeeda inya, nea gagulna heayeeniga eanooga, nea eeniga sean bea Yuda gaygooruudu beega saang'a; ak gaygwarina gheang'deenda jeeda gheeda NG'UTAMIIDA, ak ghoaleayda moangoachiyda Shitimu.

¹⁹ “Misri gajeang'amwa, nea Edomu gayghoah dareapcheeda manda sih, aba gidasawanda orjooga Yuda; aba gideaba niihiida foojeanda mandeawana giidiinyeanda aba jeeda ng'eanyiida nyaawa.

²⁰ Duuku Yuda gaygoobiida ng'eanyiida damanda manda muudeanooda, ea Yerusalemu ea ghwahita seaygoojiga sean.

²¹ Nea aniini gaydabwar fuga ahiida foojeanda fuga Yuda; aba gideaba maydanung'waada fuga mideawa giidiinyeanda. Aniini geawooschi NG'UTAMIIDA abiita Sayuni.”