Yakkobo 5 - Bibliyeeda Ghaydit

Reekusiinda meanang'oodiga

¹ Asi ghamneawa meanang'oodiga, ooyeawda nea gookuuli aba sawanadeeda jea gwahisseegwa.

² Meanang'oocheanduumeedeang'wa niimealu, nea hang'weakeagwa ea niyaak ng'weerajeega.

³ Lagheangeagwa meeng'meeng'i ea lapiyeedeang'wa ning'ut giirgweatka, nea giirgweatka nyaawa gaygamuuwu ng'asheega badahuukeagwa ak gayghwaak sasanuukeagwa gawuurji beasta. Gooweamsi haleanjeeda heeda ootiiwshacheewi aba eawoojiga huuydean.

⁴ Ang'ula, gidageatinda fuga gadiyeeda lach madameegeagwa, ghayi oaweachi aba milmilanda, ooyeawda; nea shooka fuga lach ea nihita iidiga Ng'utamiida bea lugooda.

⁵ Agooga noopiidi jeeda ng'eanyiida nea goomnyeenyi nea goohoosanyi; ak ea noanung' gwariisha gurooruunatkeagwa aba eaweeda jea ghwahina nuusta.

⁶ Agooga noorgweaksi, ak goonuuschi siida doabiiwaat; nea niny ghanyea miighoadealeagwa.

Milikghteayda ea mooshta ASEETA

⁷ Asi fuga eaduupcheewi, amilikghta ea ghwahita damanda jea ghwahina Ng'utamiida. Ang'ula, siida bwar ng'eanyi iissa gafurda haghweega ng'eanyiida bea sheayeeda haw, iissa ghamilikghta ea ghanyi ghwanyas roopta madeeda ea dea huuydean.

⁸ Eara agooga amilikghta. Oomajeega gurooruunatkeagwa, aba gideaba hinnooda Ng'utamiida nineekiit.

⁹ Fuga eaduupcheewi, adooniikiisi geat, aba gideaba gajiidu geergweakseegwa; ang'ula siida laja girgweaguutka ghamiinaada aba gidaghuudajeega.

¹⁰ Aba gideaba gichea agalana was sawanadeeda ea milikghteayda, fuga eaduupcheewi, oapkaada sibanga ghayi rugu ng'asheega aba gheawunga Ng'utamiida.

¹¹ Ang'ula, geeguuri fiisu fuga mideawa ng'wanaweega aba gideaba ghamilikghta. Ak ea noayiinyi iita milikghteayda Ayubu, ak ea noadaayi gidabaysiina Ng'utamiida gwandeawa baydeayda nea garbabu.

¹² Fuga eaduupcheewi, aba haleanjeeda sean, adiidu giyaagi habeawooda, aba humng'eeda ghana aba ng'eanyiida, ghana aba habeawooda wassean, iyooyeenyi ea gagasa ghoah ea, nea iyooyeenyi manda gagasa ghoah manda, ak abeeda ea moopeedeaysiini jeeda girgweaksiinda.

¹³ Siida ghaheang'wa nibussa sawanadeeda? Gagasa ghamwaash ASEETA. Gwandeawa hooseaneega wassean? Ea dasarmana duumda duumsheesiinda.

¹⁴ Aba jeedeang'wa gwanda siida miyaani? Daguursiina gweargwa ganiisa, ak abeeda ghamwaash ASEETA aba badaydaanyi, ak ghoamwaara nagheeda aba gheawunga Ng'utamiida;

¹⁵ nea mooshta ASEETA aba masaweega gaygwalealu siida miyaan, ak gaygagatkat Ng'utamiida; amadeepa ea nisin riing'eega, abeeda gajeesamsa.

¹⁶ Daba siisi duukuuna riing'eemba nuut, nea gaba siisi mwaash ASEETA aba badayba nuut, ak abeeda geahaabeagwa. Siida doabiiwaat iimwaash ASEETA gwandeawa uurda haw sin gadiyeeda.

¹⁷ Eliya niny siida gil mideawa searoojiga uurji sea gaasa, ak ghamwaash ASEETA muuchi ea maroabwana roopta, ak ea maroabwana roopta gweanyeew samwagu ea shealah.

¹⁸ Gabiikta gicha ak ghamwaash ASEETA ak ghwaroabwan, ak gwaji ng'eanyiida haghweagaaschi.

¹⁹ Fuga eaduupcheewi, siida wassean aba jeedeang'wa iineayi ea gwasheagiida huumeanda ak goodeelu sih nuut gabiigu,

²⁰ abeeda ea danala gideaba siida adeelu siida riing'eeda ea gwarina jeeda ramaseanda naweadaanyi gaygwalealna gurooroadaanyi miyeeda ak gaygwadukuta seang'ayda riing'eega.