Yakkobo 4 - Bibliyeeda Ghaydit

Duupcheeda sea ng'eanyiida

¹ Gweaduuni ng'ucheeda, ak gweaduuni bearjeeda aba jeedeang'wa? Mii ng'asheegiga bea geawunda gheang'da ng'uchi aba sasanuukeagweani?

² Iissa googasayi haleanjeeda ak ea moondeawani gil; goonuuschi buuneeda. Goolachi ghuut haleanjeeda ak ea mwajanyasa; iissa goobearji nea goong'uchi. Moondeawani, aba gideaba moommusi.

³ Eara amusa ghanyea mwajanyasa, aba gideaba goomunyiichi musooda, ak abeeda goosini gidida oogasayiin.

⁴ Fuga mii doobiiweadi! Moanali gideaba iduupcheewi geaw ng'eanyiida ea nihuuwi weajoocheanda ASEETA? Asi siida wassean gasa gooduupchi geaw ng'eanyiida abeeda ea nisin geaw weajoocheanda ASEETA.

⁵ Ghana oaghanyi gilirugu ng'ooruutka mwadaagha nea gwayi, “Gurooroani abiita jeedeanyean iissa gagasseasa nea ghwalajaneasa ghuudi”?

⁶ Amadu gagoaneasa dagheerjeanduumeeda naawda; nea gwayi, “ASEETA iissa ghaheawa fuga adiing'u geat, ak iissa ghoadaw dagheerjeanduumeeda fuga eada geat ng'eanyi.”

⁷ Asi asisiina ASEETA mureeda. Oateala meang'nyeandeenda, ak gaygamng'aw.

⁸ Aneekiisiina ASEETA ak gaygwaneekiiseegwa agooga. Oamiini geatingeagwa, ea fuga riing'eega, oamiini gurooruunatkeagwa, ea fuga mabwagi.

⁹ Agiisana nea goonyahuushi nea gooyeawdi. Reargeagwa gagasa ghwayamwa ghoah giinyahuushooda, nea ghoah hooseaneegeagwa giiseaneega.

¹⁰ Ayaada geat ng'eanyi aba madeeda Ng'utamiida, ak gaygagatkadeegwa.

Reekusiinda ea girgweaksiinda orjeeda giyeang'wa bea Gristo

¹¹ Fuga eaduupcheewi adoobeerayi geat. Siida beash orjeeda geanyaawa ghana goorgweaksa orjeeda geanyaawa, ghabeash deaweeda nea goorgweaksa deaweeda. Nea iirgweaksi deaweeda abeeda ea muwoosi siida sina deaweeda abeeda ea nihuuwi siida laja girgweaguutka.

¹² Gwanda siyagi goona deaweeda nea goorgweakiisa, ak ghoamu gwalealu ghana gwanuus. Ak guwoosi ng'eaha inyas giirgweaksi gischeewoocheandaang'u?

Reekusiinda aba ghwarjeeda

¹³ Asi apkaani ghamneawa, agoogeeda ooyeenayi, “Askweareani ghana numuji gajeeweaya jeedeaba mujiineani ea mujiineani ak geepiidi gweayda nea geekeakshi ak gooheadeeseasa haleanjeeda”;

¹⁴ amadu ea moanali gichea gapnu numuji. Eaweegeagwa naaha gil? Aba gideaba agooga goowooschi aroosta sidaah aba gheadi nuwaas amang'ata ghwaroat.

¹⁵ Damanda ghwanyawa jea ayeenana, “Iibwariiy Ng'utamiida, gajeewoosa majeekcheewi ak geesinyi gili ea gili.”

¹⁶ Ak gwasunu nukwa ghoaghwarji geat aba ghwarjeedeang'wa. Nea ghwarjeeni sean sunuun eamuy.

¹⁷ Asi siida nal gidadoabiiw sinooda ak ea masina, aba headaanyi niiw riing'eeda.