Yakkobo 3 - Bibliyeeda Ghaydit

Ng'ushapta

¹ Fuga eaduupcheewi, adoahuuyi giinealshoodiga saang'a aba gideaba ghoanalli beadi aseaseeni anealshiin jea eanyasa girgweaksiinda haw ea ghwanaawda.

² Aba gideaba aseasa eesa sean iissa gearamwaschi gea saang'a, ama deepa ea mwaramwasta siida wassean aba ng'asheega rugu abeeda siisi ea doabiiwaat, ak ghoamu ghwarat eara saseadaanyi sean.

³ Iissa iisiyiinyi ghealooniga ghuusiga faraasi ak abeeda gwasinneasa mureeda, abeeda geepali sasanuuka nyaawa sean.

⁴ Ang'ula maleambajeega hees ea gwadeenacha naaha iissa ghwaat jeameeda ng'waan, iissa geasaja gidamwanang' muuchi simwanmwana ak googeal siida mwanmwan heeda wassean gasa gawa.

⁵ Asi ng'ushapta gidamwanang' gil ak iissa ghaghwar geaw aba badayda haleanjeeda hees. Dareabeeta eara ea haw iissa ghwaak beasta mwanang'!

⁶ Ak ng'ushapta ea beasta. Nea ng'ushapta ea gidamiidoabiiwaat gil aba jeeda fugaasa, iissa ghang'uda saseesean ririnnyeanda, iissa goong'eesa beasta haleanjeedeaba garayi, ak ghoang'eat jeeda beasta hang'weaniidooda.

⁷ Aba gideaba gilinyoo ea heeluutka diyeanga gil ea dea dariidaka, ea dea diyeanga badiina ng'eanyi ea dea haleanjeeda mida jeeda basooda, geamu eefur, ak ea nigeawiit buuneeda ghoahaaghwa.

⁸ Ak ghanyea manda siida ammu ghoahaaghwa ng'ushapta, was munyinda mwahawda, ak ghwanyiit furooda eatu miyeeda.

⁹ Aba nih geebadiischeesi Ng'utamiida was Ghweandeanya, nea aba nih iissa geamoashti buuneeda, ghayi sisin ea eegala ASEETA.

¹⁰ Aba ghuutida asagiin iissa gwarina ghawooda ea mooshteayda. Fuga eaduupcheewi, ng'asheesu mwahida gideaba gaygwasnu.

¹¹ Gheang'deenda asakalealaan ghoamu gwarina beega inya ea beega ng'weani?

¹² Fuga eaduupcheewi, heapi shaboogheecheanda, ghoamu gwaji gulageecheanda, ghana sabiibu ghoamu gwaji shaboogheeta? Asi gwasunu eara gheang'deenda moammu gooruudu beega matawi ea gea innya.

Weaghuumeeda leabu suuta shamooghuutka

¹³ Nih ng'eaha aba jeedeang'wa mideawa weaghuumeeda ea fughareeda? Aba giibindaanyi miy dahiimna gadiyoojigaaschi aba garbabanda ea weaghuumeeda.

¹⁴ Nea iyoondeawi lajoodeaba ghuut ng'waan ea gasooda shidoodeaba ghaang' aba jeeda gurooruunatkeagwa, adoaghwarji geat ak ghoahuuyi ng'uyyeega aba heeda huumeanda.

¹⁵ Abeeda weaghuumeeni ea maleapna heetiyeada, nih gaba badayda ng'eanyiida, ak ea maba guroorooda, ak gaba meang'nyeandeenda.

¹⁶ Aba gideaba heeda mida lachng'eanyiida ea gasooda shidoodeaba ghaang', gaygwanda mitagheasta ea giliwas ng'ashaan muy nyooh eesina.

¹⁷ Duuku weaghuumeeda leabu heetiyeada gidamadeeda aamiy, nuut gaba weayda, ak ea garbabu, nea iissa gooleeysiit ng'asheega buuneeda, nea gwandeawa haghweega miyaas, ak ea mayamiisachi ghana gwareengani buuneeda.

¹⁸ Nea haghweega doobiiwnata geehisa jeeda weayda nea gwahisa fuga sina weayda.