Yakkobo 2 - Bibliyeeda Ghaydit

Reekusiinda aba badayda shiitmeeda

¹ Fuga eaduupcheewi, adiidu ghoahiimu shiitmeeda nea ghoang'waanyi masaweega Ng'utamiideanya was Yesu Gristo, Ng'utamiida giigheambiita.

² Aba gideaba iiwuh siida mideawa ghuniida dahaabu ea hang'weaka miyaasiin jeedeang'wa nea noabwachi geat, eara siida bwarbwar biissa gaba hang'weaka beareadi,

³ amadu goosisi mureeda siidida akwa hang'weaka miyaasiin ak gooyeeshi, “Apteada ang'iing'i aba hiji,” ak giyeeshi siidida bwarbwariin, “Miinaada ang'iing'i aba hoowa,” ghana, “Apteada aba hiji bea geeshangeasuun,”

⁴ abeeda miyoashiida buuneeda aba jeedeang'wa. Ak ghoahuuyi fuga ajiili girgweaguutka munyas fugheeri?

⁵ Oaleaydiit fuga eaduupcheewi aabwariinyi. Heapi ASEETA ghayi mii ghwaloat fuga barbari bea muunda ng'eanyiida ak ghwanung' gabaruura masaweega nea gwahearan sugoocheanduumeeda ghayi heeleesa fuga bwariiyi?

⁶ Nea agooga ea noojakteaysi mureeda siida bwarbwar. Neada meanang'oodiga ea madiing'siineegwa ng'eanyi agooga, nea goongiireegwa ea ghwaadeagwa madeeda girgweageeda?

⁷ Nea marukunana ng'asheega munyas gheawungiga miyaasiin ghayi sigooneegwean?

⁸ Hean iyoosinyi deaweedeedida bea sugoodigean gawuurji ginyaashta ng'ooruutka nea gwayi, “Bwariiyda giischeewoocheandaang'u gidubwariiydi geaw,” abeeda goosinyi ng'asheanda miy.

⁹ Iidu iyooshiichi buuneeda goosinyi riing'eeda, ak gaygoorgweakseegwa deaweeda ak ghoahuuyi fuga adiiy.

¹⁰ Nea siida wassean iyang'waay deaweedajeega sean amadu gwaruusa ng'asheanjagi niidiiy aba badahuukeaba sean.

¹¹ Aba gideaba siida ghayi ayi, “Adimealuuli,” ghabwada gwayi, “Adinuusi siida.” Earapeadi mii gamealuul ak ea ninuus siida, abeeda ea nihuuwi siida nuus deaweeda.

¹² Asi arukuni ak goosinyi nea goowuurjeewi fuga jea eergweaksiina deaweedeeda jea gweadu giibaldeaba geat.

¹³ Aba gideaba girgweaksiinda mayghabwayda siida mandeawana baydeayda; asi baydeayda iissa ghwajoar girgweageeda.

Masaweega ea gadiyoojiga

¹⁴ Fuga eaduupcheewi, gayghwaloat naaha, iyayi siida geandeawi masaweega ak ea mandeawana gadiyeeda? Masaweegiga ikaaschiin gayghoamu gwalealu?

¹⁵ Iideepa ea dawiish orjeeda giyeang'wa ghanea huda giyeang'wa gil ak ea mandeawana gichea ghwaak bea galeagasean,

¹⁶ ak gwayeesha siyagi aba jeedeang'wa saawa, “Aweayeena nea goobeayi weayda ak goojooyi beasta ak goolang'uuchi,” nea moatawi haleanjeeda gasa saseeda, gayghwaloat naaha?

¹⁷ Asi gwasunu eara masaweega nea gaba geaw iimandeawana gadiyoojiga ea nimi.

¹⁸ Ak gaygwayi siyagi, “Ang'iing'i gindeawi masaweega ak geandeawi aniini gadiyoojiga.” Ahiimnaan masaweagaagu mandeawana gadiyoojiga, ak gaydaahiimneey masaweegeasu aba gadiyoojigeasu.

¹⁹ Ang'iing'i gumwasi gideaba ASEETA ea agi; giidoabiiwi. Eara meangeenda ghamwas nea ghaboadan.

²⁰ Ak gigasayi eahiimneeyi ang'iing'eeda was siida marachi gil, gideaba masaweega iimandeawana gadiyeeda ea maygwaji?

²¹ Ghweandeanya was Abrahamu meatawa doobiiwnata aba gadiyoojiga, aba damanda adaydaawa orjeedaanyi was Isaka iina uhuuda heeda wagiida?

²² Midaahi beadi masaweega ghayi sin adeayi sea gadiyoojigaaschi, ea gideaba masaweegiga geemajeek aba naweedida bea gadiyoojigean,

²³ iidu gwasa ng'ooruutka nea gwayi, “Abrahamu ghayi ghamwas ASEETA, ak geataw niny doobiiwnata”; ak geeguura siituupchi ASEETA.

²⁴ Moadaahi beadi siida sighus eataw doobiiwnata aba gadiyoojiga nea meakghusa masaweega ak ghwahit.

²⁵ Gwasunu eara Rahaboodida hiseadean eara niny meatawa doobiiwnata aba gadiyoojiga damanda deaba rabasta ak gooruuta jarooda aba nawa nuudi?

²⁶ Aba gideaba gawuurji saseeda iimanda guroorooda ea nimi, gwasunu eara masaweega iimandeawana gadiyeeda ea nimi.