SAKARIYA 3 - Bibliyeeda Ghaydit

Ghwaramoar Sibaneeda deakta ashoohoocheanda haw

¹ Hean geahiimnaan Yoshuwa was ashoohoocheanda haw, nea ghamiinaada aba madeeda malaykajeanda NG'UTAMIIDA, ak ghamiinaada shataani aba meatkweeda geatindaanyi bea dugwa ghoahaakta niny.

² Ghwalamda NG'UTAMIIDA ak gwayeesha shataani, “Gagasa goowoowseey NG'UTAMIIDA, Ea Shataani! Gagasa goowoowseey NG'UTAMIIDA loat Yerusalemu! Siisi gawuurji bileangida silealna jeeda beasta?”

³ Yoshuwa abeeda ghamiinaada aba madeeda Malaykajeanda nea gaba hang'weaka munyas bea ririnnyeanda,

⁴ Ghwalamda malaykajeanda ak gwayeesha fugiga miinaada aba madeadaanyiin, “Ageanda hang'weakiga munyas bea ririnyeandean,” ak gwayeesha niny “ng'ula neageandeawaneey ng'asheagaagu munyas, ak gaydanung' akweala hang'weaka sheayeeda haw.”

⁵ Ak geayeeshi, “Ayiina weasta miy uhuudaanyi.” Hean geayiin weasta miy uhuudaanyi nea geekwealsa hang'weaka ak ghamiinaada malaykajeanda NG'UTAMIIDA aba murdeadaanyi.

⁶ Ak gwayeesha malaykajeanda NG'UTAMIIDA Yoshuwa.

⁷ “Hean gwayi NG'UTAMIIDA bea lugweega, inyas giyaadi naweadingeasu nea giing'waanyi ng'asheegeasu, abeeda gajambala gheenyu nea giimbali muhealuutkeasu, ak gaydagoonyi gheata jea asiipsiinana fuga miinaada aba hiji.

⁸ Aleaydiit ghamneawa Ea Yoshuwa ashoohoocheanda haw, ang'iing'i ea fugaagu irooroocheewi mida madeadaang'u aba gideaba suh fuga was gwadeagooda miyas gil aba gideaba ng'ula gaydeadu siideanyu bea gadiyeeda siguura Damealeanda.

⁹ Aba gideaba ng'ula lagheaneani aayiinyi madeeda Yoshuwahiin, jeemba lagheaneanagi gwanda gheanyan ispwa, ng'ula gaydang'waar ng'ooruutkaaschi, gwarugu NG'UTAMIIDA bea lugweega, ak gaydageanda ng'asheega munyas bea ng'eanyiini eaweecheanjagi.

¹⁰ Eaweedida, gwarugu NG'UTAMIIDA bea lugweega, gaygaba siisi guursa giischeewoocheandaanyi ak goobiitpiit guumda sabiibu ea guumda shaboogheecheanda.”