RUTI 3 - Bibliyeeda Ghaydit

Ruti gagasa siyeeda

¹ Ng'ata gwayeesha Naomiheeda was ghamasiyeadaanyi Ruti, “Hudeanyu, mang'wana geagakuuneey siyeeda, ak abeeda gihoosani?

² Ak ghamneawa ea mii nukwa Boasi was buweacheandeanya nea gindeaydooscheewi haweagaaschi bea gadiyeedeani? Ng'ula, eaweani ghoaleal ngaano aba heeda siileeliisa.

³ Ahuusheena ak giyeershi, ak giikweali hang'weaka miyaasiin ak guwi heeda siileeliisa ngaano; adiidu giihiimsi geaw bwak ea ghoahiit agiischooda ea leeshooda.

⁴ Hean iihit, giiroori heeda lila; ak guweesi ak gijaadi hang'da mida geeshangaaschi ak giwiili geawi; ak gaygwarukuneey gichea sina.”

⁵ Hean gwayeesha, “Ng'asheega sean irukuneani gaydasin.”

⁶ Ng'ata gwararang'eesa heeda siileeliisa booga ak gwasin gidarukusiinda ghamasiyeadaanyi.

⁷ Iing'ata nea niyeagiischi Boasi nea gwaleeshi, nea gurooroadaanyi ea nihoosan, gawa ak gawiil geaw aba uhuuda raghwata siileeliisa booga. Hean gagwalgwaleesa ak ghwajaat hang'da geeshangaaschi, ak gawiil geaw.

⁸ Bugusta eaweeda ghwayam geaw siidida ak ghwadaah, gatmooda lil aba murdeadaanyi!

⁹ Hean goobearsa, “Ang'iing'i ng'eaha?” Hean gwayeesha, “Aniini Ruti gil, hudaang'u bea gadiyeeda; akwealsiina hang'daang'u bea badayda hudaang'u bea gadiyeeda; aba gideaba guwoosi buweacheanda neeki.”

¹⁰ Hean gwayeesha, “Gagasa gagoonyi ghawooda NG'UTAMIIDA, hudeanyu; nisini alooheeda aba huuydeanda burdeawa dea ghayi bea mwadi, nea aba nih ea mii aada geeshta gheareemanga barbari ghana gea was meanang'oodiga.

¹¹ Asi ghamneawa hudeanyu, adibeali, gaydasineey gidanyooh gasa sean, eara fugeasu bea mujiini ghwanal gideaba guwoosi gatmooda doabiiwaat.

¹² Nea ghamneawa ea huumwa gil gideaba geawooschi buweacheanda neekeeweey, nea iing'ata gwanda buweacheanda neekeeweey muuchi.

¹³ Lila aba hiji eaweani, ama sakteayda, inyas gaygwasineey gidadoobiiwsa buweacheanda, abeeda ghwadoabiiw, nung'waada gwasin; ama inyas ghwaraay gwasineey gidadoobiiwsa buweacheanda, abeeda gidabiideata NG'UTAMIIDA, gaydasineey aniini gidadoobiiwsa buweacheanda. Lila ea gamuchu.”

¹⁴ Hean gwalla murdeeda geeshangaaschi ea gamuchu, ghang'eat gawa damanda manda siida nal nuut, ak gwayi Boasi, “Adiidu geanal gideaba gwanda gatmooda nihidu heeda siileeliisa booga.”

¹⁵ Ng'ata gwayeesha, “Eani eaghwada badaydaang'u ak giing'waanyi.” Hean ghoang'waay ama ng'ata goodeesa badayda eaghwadaanyi gweeraji lah bea ngaano, ak ghwanung' ghwasar; ama ng'ata gawa jeeda mujiini.

¹⁶ Ng'ata ghwahita heeda ghamasiyeadaanyi, ak gwayeesha, “Gwayiin hudeanyu?” Hean gwarukwiisa Ruti ng'asheega sean sissa siidida,

¹⁷ hean gwayeesha, “Gagoonan gweeraji lah, ak gwayi, ‘Adiidu giyaadi geatinga gajeami heeda ghamasiyeadaang'u.’”

¹⁸ Ng'ata gwayeesha, “Asi ameasa hudeanyu, bwak ea nala gichea ghoah ng'asheanji, aba gideaba siisi maygoopteada, gayghoahiit ng'asheanji askweareani.”