RUTI 2 - Bibliyeeda Ghaydit

Ruti gagadiiy aba madamnyeanda Boasi

¹ Nea abeeda Naomi gwandeawa siida bea gheawagi sea siyeadaanyi, siida was meanang'ocheanda, bea gheawagi sea Elimeleki, nea gheawungaaschi geeguura Boasi.

² Gwayeesha Rutiheeda was gatmooda eemeeda Moabu Naomi, “Nung' dawa jeeda madamnyeanda dealiim gheaptanga booga daat geeshta siichea gagoonan giilimshooda.” Hean gwayeesha, “Una hudeanyu.”

³ Hean ghang'eat gawa ak gooliimshi aba jeeda madamnyeanda huuydeana fuga gadiyeeda lach booga; ak ghwahita meatkweeda madamnyeanda was dea Boasi, was buweacheanda Elimeleki.

⁴ Ng'ata, ghwahidu Boasi nea gwaleabu Betlehemu; ak gwayeesha fuga lach booga, “Gagasa andeawana NG'UTAMIIDA.” Hean ghwasha saawa nea gwayeesha, “Nung' gagoonyi NG'UTAMIIDA ghawooda.”

⁵ Hean gwayeesha Boasi siida gadiyeeda haweewa fuga lach booga, “Hudi gabeang'a?”

⁶ Ak gwayeesha siida gadiyeeda haweewa fuga lach booga, “Gatmooda eemeeda fuga Moabu gil, hidu nea goodeana Naomi nea gwaleabu ng'eanyiida Moabu.

⁷ Ghwahidu ak gwayi, ‘Geamuscheey nung' dealiim nea ghaamughuushchi gheaptanga abuut fuga lach booga.’ Hean ghwahidu, ak gagadiiy ghang'eada sakteayda ea ghoah ghamneawa, nea mafuufa eara gilimwanang'.”

⁸ Ng'ata gwayeesha Boasi Ruti, “Ghamneawa, aleaydiit, hudeanyu, adiidu guwi giilimshooda aba madamnyaan nuut, nea adiidu ging'ami hiji, abiidana heeda neekeewa haweegeasu.

⁹ Nung' gagal gheanyangaagu madamnyeanda silach, ak giyaadi geeshta. Neada ea mii nearukusi orjooga gideaba adiidu ghoasachi? Ama aknyi muwoash, una heeda healadeeda sileeha beega rama orjooga.”

¹⁰ Hean gwatkuy aba madeadaanyi ak ghwahiiy geaw ea ghwahita ng'eanyi, ak gwayeesha, “Neada ghaanyastiin alooheeda aba madeadaang'u, bwak ea nalaan aniineeda eawooschi rabascheanda?”

¹¹ Ng'ata gwayeesha Boasi, “Haleanjeeda sean isisi gheamata iigweajeewi gidang'eada miyeeda siyeadaang'u sirukuneani sean, ea gidinung'usiindi heeda gweanu ea geamadu ea ng'eanyiidaang'u ak gihidu heeda eemeeda eawoojisu minali.

¹² Gagasa gooheaneey NG'UTAMIIDA giliwas aba gida iisini, ak gagasa gagoonyi giimearda NG'UTAMIIDA was ASEETA Israeli, inyasi giibinda aba jeeda meang'eagaaschi.”

¹³ Hean gwayeesha, “Ang'iing'i gisinnean alooheeda muuchi, ng'utamiideanyu, aba gideaba nihoosanyean nea gibalooli ng'asheega doobiiweadi hudaang'u bea gadiyeeda, nea ghaanali gideaba meabeahi jeeda haweagaagu bea gadiyeeda.”

¹⁴ Damanda agiischooda gwayeesha Boasi, “Beeni hiji, ak giyaagi mukaate, ak ging'uti murmurjeandaang'u difaayi.” Hean goopteada aba murdeeda fuga lach booga, ak gooheaksa booga sibeash; hean ghwaak ea gwalang'u, ak ghwanung'wa heeda mwaatkwa.

¹⁵ Iidu nea gawa gooliimshi, goobalool Boasi fugaaschi bea gadiyeeda, ak gwayeesha, “Anung'waada gooliim eara booga abitpit, nea adiidu goowoowsi.

¹⁶ Ama ng'ata ghoasuung'u gheamughuushcheeksu ng'ay aba jeeda booga, ak ghoanung' gooliim niny, nea adiidu goowoowsi.”

¹⁷ Hean gooliimshi aba jeeda madamnyeanda ea ghoah shing'ada; ak ghwalas booga sean aliimu, ak ghwanyiit giloohaji damanamughuush bea ngaano.

¹⁸ Ng'ata ghwasar ak gawa mujiini; ak goohiimsa ghamasiyeadaanyi gida aliimu, hean gooruudu hamita lach iilang'u ak ghoadaw.

¹⁹ Ng'ata ghwalamda ghamasiyeadaanyi ak gwayeesha, “Gwachi giliimsheewi yeenu? Ak gigadiiyi aba yeenu? Gagasa ghwanyas ghawooda siidida nalnyiin.” Hean gwarukusa ghamasiyeadaanyi gheawunga siida gadiyeesa aba madamnyeandaanyi, ak gwayeesha, “Gheawunga siida eagadiiyi aba madamnyeandaanyi geeguura Boasi.”

²⁰ Ng'ata gwayeesha Naomi gatmooda orjeedaanyi, “Siisi gagasa ghoadaw ghawooda NG'UTAMIIDA, miighaweada alooheadaanyi fuga nimeewa ea gea mideawa eaweega!” Hean gwayeesha Naomi, “Siisi geeduupcheewi, niny buweacheanda neekeeweasa gil.”

²¹ Hean gwayeesha Rutiheeda was gatmooda eemeeda Moabu, “Ng'ula gwayeeshiinean, ‘Gaymideawana soomjoogeasu, bwak ea ghoahiit lajita boogeasu.’”

²² Ng'ata gwayeesha Naomi Rutiheeda was gatmooda orjoagaaschi, “Ghwadoabiiw, hudeanyu, gideaba gajadeayeewana haweagaaschi bea gadiyeeda, inyas guwi madamnyaan nuut gajeewoowseey.”

²³ Hean goobiida murdeeda haweega gadiyeeda bea Boasi ak gooliimshachi ea gagul muudeanooda lajita ngaano; nea gwandeaydooschi sea ghamasiyeadaanyi.