RITEAYDA 8 - Bibliyeeda Ghaydit

Udagheambagajeamajeega

¹ Hean ghwalamda NG'UTAMIIDA ak gwayeesha Musa, “Una gheeh Farao ak giyeeshi niny, ‘Gwayi NG'UTAMIIDA, “Siksiina fugeasu gaweay gagadiyeesean.

² Ak inyas giheawi siksiina saawa gaweay, ng'ula, abeeda gaydalas moonghajeagaagu sean bea ng'eanyiida aba udagheambagajeamajeega;

³ nea Nayli gayghoah guldeayda udagheambagajeamajeega, ak gayghapka jeedeaba gheang'u, ea ghapka jeeda ghooriidaang'u iroochi, ea uhuuda bulaliidaang'u, ea jeeda gheeda fugaagu bea gadiyeeda, ea dea fugaagu, ea heeda siiwoosacheewa, ea jeeda dabitaang'u siwooliida,

⁴ ak gaygootkwealiiseey udagheambagajeamajeega ea badahuuka fugaagu ea dea fugaagu sean bea gadiyeeda.”’ ”

⁵ Ghwalamda NG'UTAMIIDA ak gwayeesha Musa, “Eeshiina Haruni, ‘Miinda geatindaang'u ea bileangidaang'u aba badayda eeniga ea eeniga manang'i ea baskweega, ak ginung' ghapka udagheambagajeamajeega badayda ng'eanyiisean bea Misri!’”

⁶ Hean ghamiinda Haruni geatindaanyi aba badayda beega Misri, ak ghapka udagheambagajeamajeega ea gwadukuta ng'eanyiida Misri.

⁷ Ak eara meanga gwasindunu aba meang'nyeanduumeeda nyaawa, ak ghwanung' ghapka udagheambagajeamajeega badayda ng'eanyiida Misri.

⁸ Ng'ata gaguursa Farao Musa ea Haruni ak gwayeesha, “Amusa NG'UTAMIIDA gageanda udagheambagajeamajeega aba heedeanyu ea heeda fugeasu, ak abeeda gaydasiksa buuneeda gaweay ghoadaw NG'UTAMIIDA lukghumeeda.”

⁹ Ghwalamda Musa ak gwayeesha Farao, “Aghaambiida geaw aba badaydeanyu ak gaydamus ASEETA aba badahuukeagwa, ea fugaagu bea gadiyeeda ea aba badayda buuneadaang'u, goosha udagheambagajeamajeesu aba headaang'u, ea aba gealgaagu ak gabeachi jeeda Nayli.”

¹⁰ Ak gwayeesha, “Numuji.” Aba gidarukuta Musa ak gwayeesha, “Gagasa gwasa gida inyaashi, ak gagasa nala gideaba manda nuut uurji NG'UTAMIIDA was ASEETEANYA.

¹¹ Gayghang'amwa udagheambagajeamajeega headaang'u ea gealgaagu ea heeda fugaagu bea gadiyeeda ea heeda fugaagu, gaygabeachi jeeda Nayli.”

¹² Hean gaweay Musa sea Haruni aba gheeh Farao, ak gooyeawusa Musa NG'UTAMIIDA aba badayda udagheambagajeamajeesu ghayi eadu aba badayda Faraohiin.

¹³ Hean gwasinda NG'UTAMIIDA gidanyaashta ng'asheanda Musa; ak gameewa udagheambagajeamajeega aba jeeda gealga ea muhealuutka, ea gea jeeda madameega.

¹⁴ Ak geamughuush aba hijagi ea ghoah dilgwajeega, ak goomealu ng'eanyiida.

¹⁵ Daah Farao gideaba ning'wana, ghoahang'waay gurooroadaanyi, ak ea mooleeysiiniit saawa, gawuurji gidanyaashta NG'UTAMIIDA.

Nyooka

¹⁶ Hean ghwalamda NG'UTAMIIDA ak gwayeesha Musa, “Eeshiina Haruni, ‘Miinda bileangidaang'u ak gilasi birjeanda ng'eanyiida, ak gaygwardu nyooka aba ng'eanyiisean bea Misri.’”

¹⁷ Ak gwasinda gidasirukusiinda, hean ghamiinda Haruni geatindaanyi ea bileangidaanyi, ak ghwalas birjeanda ng'eanyiida, ak gwardu nyooka aba heeda buuneeda ea heeda diyeanga, sigeesean bea ng'eanyiida ghwayamwa ghoah nyooka, aba ng'eanyiisean bea Misri.

¹⁸ Eara Meanga gwasim ea gagasa gooruuta nyooka aba meang'nyeanduumeeda nyaawa, ak ea mwoamu. Ak ghwanyiit nyooka heeda buuneeda ea diyeanga.

¹⁹ Ghwalamda meanga ak gwayeesha Farao, “Nih geatinda ASEETA, ghoahiimu uurdaanyi.” Ak geahang'waay guroorooda Farao, ak ea mooleeysiiniit saawa, gawuurji gidanyaashta NG'UTAMIIDA.

Ghasheang'anga

²⁰ Hean ghwalamda NG'UTAMIIDA ak gwayeesha Musa, “Ng'eada nea gudea sakteayda duw gil ak giimuughu Farao, damanda beawa eenda, ak giyeeshi niny, Gwayi NG'UTAMIIDA, ‘Siksiina fugeasu gaweay gagadiyeesean.

²¹ Ak inyas ea misiksiini fugeasu gaweay, ng'ula, gaydanung' goobissa saseadaang'u ghasheang'anga ea badayda fugaagu bea gadiyeeda ea buuneadaang'u ea jeeda gealgaagu, ea jeeda gealga fuga Misri gayghwanyiit ghasheang'anga ak eara ng'eanyiisean mida saawa.

²² Eaweedida gaydasach ng'eanyiida Gosheni, mida fugeasu, ak ea maygwanda ghasheang'anga hoowa; ak gaynala gideaba aniini geawooschi NG'UTAMIIDA aba badayda ng'eanyiida.

²³ Ak gaydayiin moonghooda dageascheeda fugeasu ea fugaagu. Ak gwadeagooni gayghwahidu numuji.’”

²⁴ Ng'ata gwasin NG'UTAMIIDA ng'asheandida ghayi bean gwarukusa Musa Faraohiin hean ghapka ghasheang'anga saang'a muuchi jeeda gheeh Farao, ea jeeda gealga fugaaschi bea gadiyeeda, ea jeeda ng'eanyiisean bea Misri ak ghwadatasa ng'eanyiisean aba ghasheang'anga.

²⁵ Hean gaguursa Farao Musa ea Haruni ak gwayeesha, “Aweayeena oatawa ASEETEANG'WA lukghumeeda, ak goopiidi jeeda ng'eanyiida Misri.”

²⁶ Ghwalamda Musa ak gwayeesha, “Mwadoabiiwa gideaba gajeesindunu, aba gideaba gajeesisiina NG'UTAMIIDA was ASEETEANYA lukghumeeda ak geatawji haleanjeeda sisapa geadi bea ghadooweeda, aba badayda ng'asheega munyas bea fuga Misri. Inyas geesinyi lukghumeeda nea geataydi haleanjeeda sisapa geadi bea ghadooweeda aba badayda ng'asheega munyas bea fuga Misri aba madeeda gheanyanga nyaawa, abeeda maygafteasa aba lagheanga?

²⁷ Mayghwashiy gajeeweaya bareanyeeka eawooji samwagu aba jeeda dareapcheeda, ak geesisi lukghumeeda NG'UTAMIIDA was ASEETEANYA, gawuurji gidarukusiindaneasa.”

²⁸ Hean ghwalamda Farao ak gwayeesha, “Gaydasikseegwa aweayeena, asisiina lukghumeeda NG'UTAMIIDA was ASEETEANG'WA aba jeeda dareapcheeda, ak ea adoosheagiichi muuchi. Ak abeeda gomusishewean.”

²⁹ Ghwalamda Musa ak gwayeesha, “Ng'ula, gaydarita jarooda dang'amwa headaang'u ak gaydamwaash NG'UTAMIIDA ghang'amwa heeda Farao ghasheang'ang'su, ea heeda fugaaschi bea gadiyeeda, ea heeda fugaaschi numuji; ak abeeda ea mareengana Farao buuneeda gicha ak ea masiksiina gaweay gwasissa NG'UTAMIIDA lukghumeeda.”

³⁰ Hean gwariteawa Musa heeda Farao ak gawa ghamwaash NG'UTAMIIDA.

³¹ Ak gwasinda NG'UTAMIIDA gidamusta Musa, ak gageanda ghasheang'anga aba heeda Farao, ea aba heeda fugaaschi bea gadiyeeda, ea heeda buuneadaanyi, ak ea meapuuda eara akaleala.

³² Gabiikta gicha Farao ghoahang'waay gurooroadaanyi aba damani, ak ea masiksiina buuneeda gaweay.