RITEAYDA 7 - Bibliyeeda Ghaydit

¹ Ak gwayeesha NG'UTAMIIDA Musa, “Daaha naanung' uurjeewana ASEETA aba heeda Farao, ak Haruneeda was orjeeda geamadu gayghoah sibaneadaang'u.

² Gayrukuta ng'asheega sean earukuneey, ak Haruneeda was orjeeda geamadu gaygwarukusa Farao gideaba siksiina fuga Israeli gaweay gwariteawa ng'eanyiidaanyi.

³ Ak gaydaahang'waay guroorooda Farao nea ghaasaang'ayiichi gwadeagwajeegeasu ea ng'asheegeasu deamdeameadi aba ng'eanyiida Misri;

⁴ ak Farao ea maygooleeyseegwa iit, ak gaydayiin geatindeanyu badayda Misri ak gearuudu lugoodeanyu, nea gearuuni fugeasu was fuga Israeli jeeda ng'eanyiida Misri aba girgweaksiinda haw.

⁵ Abeeda gayghwanal fuga Misri gideaba geawooschi NG'UTAMIIDA, iyaahaakti geatindeanyu dayiin badayda ng'eanyiida Misri, ak gearuuti fuga Israeli aba jeenyaawa.”

⁶ Ak gwasin Musa ea Haruni ng'asheesu, gawuurji gidarukusiinda NG'UTAMIIDA saawa.

⁷ Musa abeeda gaba gweanyeew Seedam, ak Haruni gaba gweanyeew Seedam ea samwagu damanda siipaloola Farao.

Bileangida Haruni

⁸ Ghwalamda NG'UTAMIIDA ak gwayeesha Musa ea Haruni,

⁹ “Inyas gwayeeshiineegwa Farao gideaba, ‘Asina ng'asheega deamdeameadi igadiyeati,’ hean abeeda giyeeshi Haruni, ‘Geani bileangidaang'u ak gijaksi madeeda Farao, ak abeeda gayghoah ichibooda.’”

¹⁰ Hean gawa Musa sea Haruni heeda Farao, ak gwasinda ng'asheega gidarukusiinda NG'UTAMIIDA, ak gwajaksa Haruni bileangidaanyi ng'eanyi aba madeeda Farao ea fugaaschi bea gadiyeeda, ak ghoah ichibooda.

¹¹ Ng'ata gaguursa Farao fuga weaghoodi ea beeneediga, ea meanga Misri, ak eara saawa gwasinda gidida.

¹² Ak gaba siisi jaksa bileangidaanyi ng'eanyi, hean ghoah ichipkeega. Ak ghwanukghuta bileangida Haruni bayiiga nyaawa.

¹³ Hean ghoahang'waay Farao gurooroadaanyi, ak ea mooleeysiiniit saawa, gawuurji gidanyaashta NG'UTAMIIDA.

Lasita nyas fuga Misri Foojeanda

¹⁴ Ghwalamda NG'UTAMIIDA ak gwayeesha Musa, “Farao aahang'waay gurooru, niheawa gwasiksa buuneeda gaweay.

¹⁵ Una heeda Farao sakteayda, damanda miighwahidu eenda ak giimuughu niny aba ghuuta ghealooda, nea giing'waanyi bileangidaang'u ghayi yamwa ghoah ichibooda.

¹⁶ Ak giyeeshi niny, ‘Goojeaknean NG'UTAMIIDA was ASEETA bea fuga Ebraniya headaang'u nea gwayi, “Siksiina fugeasu gaweay, ghaghadoawan aba jeeda dareapcheeda, ak eara ghamneawa ea mii mwasa.”

¹⁷ Gwayi NG'UTAMIIDA, “Aba ng'asheanji gaynalaan gideaba geawooschi NG'UTAMIIDA, ng'ula, gaydalas beega mida jeeda ng'eanyiida Misri aba bileangini mida geatindeanyuun, ak gayghwayamwa beega ghoah foojeanda,

¹⁸ ak gaygameewa ghweayeega mida jeeda Nayli, ak gaygoomealu Nayli, ak gayghaheawa fuga Misri ghwali beega eenda Nayli.”’”

¹⁹ Ghwalamda NG'UTAMIIDA ak gwayeesha Musa, “Eeshiina Haruni, ‘Geani bileangidaang'u ak gimiindi geatindaang'u aba badayda beega Misri, ea ghealooniga nyaawa, ea jeasiinda nyaawa, ea baskweega nyaawa manang'i, ea healatka nyaawa sean bea beega, hean ghwayamwa ghoah foojeanda; ak gayghwayamwa ng'eanyiisean bea Misri ghoah foojeanda, ea haleanjeeda sisna geediga ea gea sisna lagheanga gayghoah foojeanda.’”

²⁰ Gwasinda Musa ea Haruni gidarukusiinda NG'UTAMIIDA, hean gagatkat bileangidaanyi aba madeeda Farao ea fugaaschi bea gadiyeeda, ak ghwalas beega mida jeeda Nayli, ak ghwayamwa beega sean mida jeeda Nayli ghoah foojeanda.

²¹ Ak gameewa ghweayeega mida jeeda Nayli, ak goomealu Nayli, hean ghaheawa fuga Misri ghwali beega leabu Nayli ak ghoah foojeanda ng'eanyiisean bea Misri.

²² Ak eara meanga Misri gwasin gidasunu aba meang'nyeanduumeeda nyaawa, hean Farao ghahang'waanyiit gurooroadaanyi, ak ea mooleeysiiniit saawa, gawuurji gidaghayi nyaashta NG'UTAMIIDA.

²³ Ghwayam geaw Farao ak gawa jeedeaba gheanyi, ak ea mamanyeewana gil ng'asheanji aba gurooroadaanyi.

²⁴ Ak ghaghurghur ghuuteenda Nayli fuga sean bea Misri gagaseada beega jea ghwali, aba gideaba magasa ghwali beega eenda Nayli.

²⁵ Ghang'ata eawooji ispwa ng'eada dea ghayi lasa NG'UTAMIIDA Nayli.