RITEAYDA 6 - Bibliyeeda Ghaydit

¹ Ghwalamda NG'UTAMIIDA ak gwayeesha Musa, “Asi ghamneawa gaydaaha gichea dahinda Farao, aba geatinda mideawa uurda gaygooruuta saawa jarooda, ak aba geatinda mideawa uurda gayghahoana saawa ng'eanyiidaanyi.”

ASEETA gaguursa Musa

² Ak gwayeesha ASEETA Musa, “Aniini geawooschi NG'UTAMIIDA,

³ geabussinyeewi Abrahamu, ea Isaka, ea Yakobo, gawuurji ASEETA hoauur, ak gheawungeasu was NG'UTAMIIDA ea mii danung' ghwanal saawa.

⁴ Ak gaydasin neajeedeanyu sea saawa, ak gaydaadaw saawa ng'eanyiida Ganaani, ng'eanyiida abiida saawa nea gawuurji rabasta.

⁵ Ak ea mabeachi nih naayiinyi sawanadeeda fuga Israeli nung' fuga Misri gwasinda gadiyeeda soomjooga ak ea naapkaachi neajeedeanyu.

⁶ Eeshiina fuga Israeli, ‘Aniini geawooschi NG'UTAMIIDA, ak gaydearuuteawaneegwa jeeda sareeni bea fuga Misriin, ak gaydearuuteawaneey jeedeaba gadiyeeni hang'waay iisini bea fuga Misrihiin, ak gaydalealneegwa aba jeeda soomjeandumeeda nyaawa, ak gaydalealneegwa aba geatinda doabiiwaat ea biissa girgweaksinda haw,

⁷ ak gaydageandaneegwa awoosa fugeasu, ak gaydoaw ASEETEANG'WA, ak gajanala gideaba geawooschi NG'UTAMIIDA was ASEETEANG'WA ghayi aruunaneegwa jeeda gadiyeeda hang'waay bea fuga Misri.

⁸ Ak gaydeaneegwa ea daahiineegwa ng'eanyiida ghayi eayeaksi habeawooda gideaba gaydaadaw Abrahamu, ea Isaka, ea Yakobo, gaydagooneegwa ahearana. Aniini geawooschi NG'UTAMIIDA.’”

⁹ Hean goobalool Musa fuga Israeli ak ea meeleeysiniit Musa, aba gideaba nisawana jeesinga nyaawa aba soomjeandumeeda.

¹⁰ Ghwalamda NG'UTAMIIDA ak gwayeesha Musa,

¹¹ “Una gah ak giyeeshi Farao was sugoocheanda Misri, siksiina fuga Israeli gaweay ng'eang'da nyaawa.”

¹² Ghwalamda Musa ak gwayeesha NG'UTAMIIDA, “Ng'ula, fuga Israeli mooleeysean iit, abeeda Farao gaygooleeysiindanaaniin iit, ak geabwada nih aniini ghaaraanyi dabalool?”

¹³ Ng'ata goobalool NG'UTAMIIDA Musa ea Haruni, ak ghoadaw diigheanda gaweay heeda fuga Israeli ea heeda Farao was sugoocheanda Misri, gwasiksa fuga Israeli gwariteawa ng'eanyiida Misri.

Fuga gheeh Musa ea Haruni

¹⁴ Suh fuga hees gil bea gealga ghweaniga, orjooga Rubeni was duweacheeda Israeli Hanoki gil ea Balu ea Hesroni, ea Garmi, suh fuga gheeh Rubeni.

¹⁵ Orjooga Simeoni, Yemueli gil, ea Yamini, ea Ohadi, ea Yakini, ea Sohari, ea Shauli, was orjeeda gatmooda eemeeda fuga Ganaani, suh fuga gheeh Simeoni.

¹⁶ Suh gheawunga orjooga fuga Lawi gaba nih bea seaygeadaanyi, Gershoni, Gohati, ea Merari, Lawi goobiida badayda ng'eanyiida gweanyeew bughala ea diktam ea damanispwa.

¹⁷ Orjooga Gershoni, Libni gil ea Shimeyi, ea fuga gheanyaawa.

¹⁸ Orjooga Gohati, Amramu gil, ea Ishari, ea Hebroni, ea Usieli, gweanyeeka Gohati abiida badayda ng'eanyiida ea bughala ea diktam ea damasamwagu.

¹⁹ Orjooga Merari Mahli gil ea Mushi, suh fuga gheeh Lawi gil, gaba nih bea seaygeadaanyi.

²⁰ Iidu Amramu ghaghi Yokebedi was huda geenyea ghwaan ak gwaji Haruni ea Musa, Amramu goobiida badayda ng'eanyiida gweanyeew bughala ea diktam ea damanispwa.

²¹ Orjooga Ishari geaba Gora gil ea Nefegi, ea Sikiri.

²² Ak orjooga Usieli ea Mishaeli gil, ea Elisafani ea Sitiri.

²³ Iidu ghaghi Haruni Elisheba, hudeaba Aminadaabu was huda geenyea Nashoni, ak gwaji Nadabu ea Abihu, ea Eleasari ea Itamari.

²⁴ Orjooga Gora, Asiri gil ea Elikana, ea Abiyasafu, suh fuga gheeh Gora gil.

²⁵ Iidu ghaghi orjeeda Haruni was Eleasari hudagi aba jeeda haweega Butieli, ak gwaji Finehasi. Suh fuga hees gil bea gealga ghweaniga fuga Lawi ea fuga gheanyaawa.

²⁶ Nih Haruni gil ea Musa ghayi eesha NG'UTAMIIDA, “Ooruunana fuga Israeli ng'eanyiida Misri sea fuga nyaawa.”

²⁷ Musa ea Haruni geaghayi abalool Farao gil was sugoocheanda Misrihi nea gwayeesha siksiina fuga Israeli gwarina ng'eanyiida Misri.

NG'UTAMIIDA goobalool Musa ea Haruni

²⁸ Eaweedida abaloola NG'UTAMIIDA Musa ea aba ng'eanyiida Misrihiin,

²⁹ Ghwalamda NG'UTAMIIDA ak gwayeesha Musa, “Aniini geawooschi NG'UTAMIIDA, rukusiina Farao was sugoocheanda Misri ng'asheega sean jea darukuneey.”

³⁰ Ghwalamda Musa ak gwayeesha NG'UTAMIIDA, “Ng'ula, aniini mwammuusi dabalool, abeeda Farao gaygooleeysiindanaaniin iit aniini?”