RITEAYDA 5 - Bibliyeeda Ghaydit

Musa ea Haruni aba madeeda Sugoocheanda Misri

¹ Ng'ata gawa Musa ea Haruni heeda Farao ak gwayeesha, “Gwayi NG'UTAMIIDA was ASEETA Israeli, ‘Siksiina fugeasu gaweay, gwasinnean ghweelmeeda aba jeeda dareapcheeda.’”

² Ghwalamda Farao ak gwayeesha, “NG'UTAMIIDA ng'eaha, jea dayiiy ghuutaanyi ea dasiksa fuga Israeli gaweay? Aniini NG'UTAMIIDA mwaanali, ak ea maydasiksa fuga Israeli gaweay.”

³ Hean gwayeesha, “Siroonyeewi ASEETA fuga Ebraniya, asi geemuscheey eeweaya eawooji samwagu aba jeeda dareapcheeda, ak geesisi NG'UTAMIIDA was ASEETEANYA lukghumeeda aba gideaba adiidu ghabwareasa aba dawni ghana ng'uta.”

⁴ Ghwalamda sugoocheanda Misri ak gwayeesha saawa, “Musa ea Haruni ghwasaan anda gajageandeawana buuneeda heeda gadiyeeda nyaawa? Ang'eada aweayeena ea sareendeang'wa!”

⁵ Ghwalamda Farao ak gwayeesha, “Ng'ula fugeaba ng'eang'i ghamneawa aasaang'a ak ghamneawa gajanung' gafuufa gadiyeeda nyaawa!”

⁶ Hean aba damandida ghoadayda Farao diigheanda aba heeda fuga miineadayda fuga gadiyeeda ea fuga ahaaghwa saawa,

⁷ “Adagudoatawji buuneeda nyeega sisna mwatafwaari, anung'waada gaweay saawa gagakiisa geat.

⁸ Ak mooneeda mwatafwaareeda sin anung' gwasin mooneeda deena giika nea adoasuunyi eara gilimwanang', aba gideaba fiisu gaba ghaleehu inyeesa goojuur nea gwayi, ‘Asikseasa eeweaya eatawa ASEETEANYA lukghumeeda.’

⁹ Eatawa fiisu gadiyeeda hang'waay muuchi jea gwasawan ea mwanyasa gheata jea gooleeysiit ng'asheega ng'uyeega.”

¹⁰ Hean gwarita jarooda fuga miineadaysa fuga gadiyeeda ea fuga ahaaghwa buuneeda ak gwayeesha buuneeda, “Gwayi Farao, ‘Maygutagooneegwa nyeega.

¹¹ Aweayeena daba siisi weah gagakiisa geaw aba gideaba gadiyeedeang'wa mayghwasuunya eara gilimwanang'.’”

¹² Hean ghwadarda buuneeda aba ng'eanyiisean bea Misri, ak geawaam ramda mida hoorgeeda gwachi bea nyeega.

¹³ Ghwanung' fugiga miineadaysa buuneedean ghwalamwach buuneeda gadiyeeda nea gwayeesha, “Oahiida gadiyeedeang'wa, gawuurji gideaba eawoojisu iimida nyeega.”

¹⁴ Ak fuga ahaaghwa fuga Israeli ghayi iin fuga miineadaysa gadiyeeda bea Farao badayda nyaawa, hean geabwar nea geepearsa, “Ghwasaan anda miyoahiida gadiyeedeang'wa bea heeta ea ghamneawa, asinda mwatafwaari gideaba eawoojisu.”

¹⁵ Hean gaweay fuga ahaaghwa fuga Israeli heeda Farao ak gooyeawda nea gwayeesha, “Ghwasaan anda gihindineasa aseasa soomjoagaagu.

¹⁶ Soomjoagaagu miyeataw nyeega, ak geebisa eeyeeshiineasa, ‘Asina mwatafwaari!’ Asi ng'ula, geabwar soomjoagaagu, nea ramaseanda gaba fugaagu.”

¹⁷ Ghwalamda ak gwayeesha, “Goobeayi ghaleehu, goobeayi ghaleehu, ghoah gidooyeeni, ‘Sikseasa eeweaya eatawa NG'UTAMIIDA lukghumeeda.’

¹⁸ Aweayeena ghamneawa, agadiyeena nea manda nyeega jea eegooneegwa, ak ghabwada nih mooneeda mwatafwaari gajea giika.”

¹⁹ Hean ghwadaah fuga ahaaghwa fuga Israeli gideaba nihang'oonyiidi Ng'asheega, nea geeyeesha, “mayghoashoanya mooneeda mwatafwaari eara suh ng'ay, aba gadiyeeda galeagasean.”

²⁰ Iidu nea geebiikna heeda Farao geeroonyi Musa ea Haruni hean ghoamuughu saawa,

²¹ ak geeyeesha Musa ea Haruni, “Gagasa ghwadaheagwa NG'UTAMIIDA ak ghwalach girgweageeda, aba gideaba noanung' eemunyasiita aba madeeda Farao ea soomjoagaaschi, ak ghoayiinyi ng'uta geatingaaschi ghabwareasa.”

Musa gooyeawusa Ng'utamiida

²² Hean gabiikta Musa gicha heeda NG'UTAMIIDA, ak gwayeesha, “Ea NG'UTAMIIDA ghwasaan anda gisisi ng'asheega munyas fiisu? Ghwasaan anda giijeaktanean?

²³ Ghang'eada deaghayi eaweewi heeda Farao ak geabalooli aba gheawungaagu ea nisima fiisu ng'asheega munyas, ak ea mii aruuni fugaagu earahay.”