RITEAYDA 4 - Bibliyeeda Ghaydit

ASEETA ghoadaw Musa deamdeamanga

¹ Hean ghwasha Musa ak gwayeesha, “Asi ng'ula gwadeepa ea meamwasan ghana ea meeleeysean iit ak gwayi, ‘Migabuseey NG'UTAMIIDA.’”

² Ghwalamda NG'UTAMIIDA ak gwayeesha niny, “Gili mida geatindaang'uun naaha?” Gwayeesha, “Bileangida.”

³ Ghwalamda gicha ak gwayeesha, “Jaksiina ng'eanyi.” Hean gwajaksa ng'eanyi ak ghwayamwa ghoah ichibooda, ak gamng'aw Musa.

⁴ Ghwalamda NG'UTAMIIDA ak gwayeesha Musa, “Ahaakta geatindaang'u ak giing'waanyi shimng'eanda” hean ghoahaakta geadi ak ghoang'waay ak ghoah bileangida aba geatindaanyi

⁵ “Aba gideaba ghamwas gideaba NG'UTAMIIDA ASEETA ghweaniga nyaawa gil, ASEETA Abrahamu, ea ASEETA Isaka, ea ASEETA Yakobo aba gideaba nibussean.”

⁶ Gabiikta gicha NG'UTAMIIDA ak gwayeesha niny, “Iina geatindaang'u daghataang'u.” Hean gageanu geatindaanyi ak ghwayiin daghataanyi, iidu nea gageanda, ging'ulayi geatindaanyi niing'waay udamusuura, ak gaweeshiit ea ghawaar gapkeanda.

⁷ Hean gabiikta ASEETA ak gwayeesha, “Iina geatindaang'u daghataang'u. Ak ghwayiin geatindaanyi daghataanyi.” Hean geanda geatindaanyi, ng'ula nibiikta geatindaanyi ghahaap ea gawuurji saseesean.

⁸ “Gwachi iimwamwasnyi,” aba girugu ASEETA, “ghana iimooleeysiina iit gwadeagooda madeeda, abeeda gwadeepa ghamwas gwadeagoodeaba iyeenya.

⁹ Ak ii meamwasa eara gwadeagwajeesu asiyeenyean, ghana ii meayiinya ghuutaang'u, abeeda gigeanu beesu ng'ay bea eenda Nayli ak giihiisi badayda ng'eanyiida ghajaam, ak abeeda beega igeani eenda Nayli abeeda gayghoah foojeanda aba badayda ng'eanyiida ghajaam.”

¹⁰ Ghwalamda Musa ak gwayeesha NG'UTAMIIDA, “Ea Ng'utamiideanyu, aniini mwammuusi dabalool, nea ghayi ea goola, ghang'eada dea ghayi ibalooli soomjeandaang'u, ak ea mwammuusi dabalool nea ghaarabwaaschi; geawooschi durumwana ng'ushap.”

¹¹ Hean ghwalamda NG'UTAMIIDA ak gwayeesha niny, “Gwasin ng'eaha ghuuta siida? Ak gwasin ng'eaha siida manda ghuuta, ghana siida miy, ghana dea ang'wearda, ghana dea ng'oaw? Neada ea mii aniineeda was NG'UTAMIIDEA?

¹² Asi una ak gajeendeayeena eara aba gichea rukuta ak gaydaanaalnyi gichea baloolana.”

¹³ Ghwalamda ak gwayeesha, “Ea NG'UTAMIIDEANYU geamuscheey ajeakta siinuut.”

¹⁴ Hean ghwanyareas NG'UTAMIIDA aba badayda Musa, ak gwayeesha, “Neada Haruni was orjeeda geamadu bea dooshta Lawi ea mandana? Ghaanali gideaba ghoamu baloolda, ng'ula, gwascheeng'u ghwahidu roonyeadaang'u, ak inyas ghwadaanyi gaygahoosan aba jeadaanyi.

¹⁵ Ak gajabaloola niny nea girukusi niny ng'asheega gwachi jea rukuta, ak gaydaweanyi aba gichea rukuta ak gaydaanaaleagwa gichea asina.

¹⁶ Niny gaygoobalool buuneeda aba badaydaang'u, ak aba headaang'u gayghoah ghuutaang'u ak aba headaanyi gaywuurjeewana ASEETA.

¹⁷ Ak gajeateena geadi bileangini, ak gaysineena gwadeagwajeega.”

Musa gabiikta ng'eanyiida Misri

¹⁸ Iidu gabiikta Musa heeda Yetro was ghweanda gatmoadaanyi ak gwayeesha niny, “Geamuscheey dawa dabiikta heeda orjoogiyya mida ng'eanyiida Misri dadaa ea gudugwandachi.” Ghwalamda Yetro ak gwayeesha, “Una nea gibea hoyyoo.”

¹⁹ Ghwalamda NG'UTAMIIDA ak gwayeesha Musa, aba Midiyani, “Biikta ng'eanyiida Misri, aba gideaba fuga ghayi gaseadayi eaweagaagu nimeewa.”

²⁰ Ng'ata gageanu Musa gatmoadaanyi ea orjoagaaschi ak goodiing'da saawa badayda digeeda, ak gabiikta gaweay ng'eanyiida Misri, abeeda geatinda Musa gwanda bileangida ASEETA.

²¹ Ghwalamda NG'UTAMIIDA ak gwayeesha Musa, “Inyas gibiikti ng'eanyiida Misri abeeda gisini ng'asheesu deamdeameadiin aayiinyi geatingaaguun ak gaydaahang'waay gurooroadaanyi, ak ea maygwasiksa buuneeda gaweay.

²² Ak giyeeshi Farao, ‘Gwayi NG'UTAMIIDA Israeli orjeedeanyu was duweacheeda gil.

²³ Ak geayeeshiineey, “Siksiina orjeedeanyu gawa gagadiyeesean.” Ak inyas giheawi siksiina niny gawa, ng'ula, abeeda gaydabwar orjeedang'u was duweacheeda.’”

²⁴ Damanda mideewa naweeda ghwahita heeda jea gwalla hean gwaroonyi NG'UTAMIIDA niny, ak gagasa ghabwar.

²⁵ Hean gageanu Sipora lagheaneeda ng'aniip ghuut ak gooyiila orjeedaanyi ak gageanu mughoowoodida lajiin ak ghawaasa geeshta Musa nea gwayeesha, “ang'iing'i aba huumwa guwoosi siyeedeanyu bea foojeanda!”

²⁶ Ak ghwanung'wa heeda nea gabwageaw. Hean gwayeesha, “ang'iing'i guwoosi siyeedeanyu bea foojeanda,” aba giiyiilda.

²⁷ Ghwalamda NG'UTAMIIDA ak gwayeesha Haruni, “Una jeeda dareapcheeda roonyeewana Musa.” Hean gawa, ak gwaroonyi niny aba giijeeda ASEETA ak ghwasam gheata.

²⁸ Ak gwarukusa Musa Haruni ng'asheega sean ajeakteawa NG'UTAMIIDA niny, ea gwadeagwajeega sean sirukusa niny gawa gwasin.

²⁹ Hean goodeay Musa ea Haruni ak ghabwada geat gweargwa sean bea fuga Israeli.

³⁰ Ak gwarukuta Haruni ng'asheega sean ghayi rukusa NG'UTAMIIDA Musa, ak gwasin gwadeagwajeega aba madeeda buuneeda.

³¹ Iidu ghamwas buuneeda, hean nea geayiiy gideaba nibareasa NG'UTAMIIDA fuga Israeli, ea gideaba nidaah sawanadeeda nyaawa, hean gabuy iheenga nyaawa ak geaghadoawan.