RITEAYDA 3 - Bibliyeeda Ghaydit

ASEETA gaguursa Musa

¹ Eaweecha ghoahaaghwa Musa hawanda nooga ghweanda gatmoadaanyi was Yetro, was ashoohoocheanda Midiyani, ak ghoahaaghwa hawandaanyi ea gaweay dirbeayda dareapcheeda, ea ghwahita Horebu was giijeeda ASEETA.

² Ak gabussa malaykajeanda NG'UTAMIIDA aba hoowa aba beasta yeada jeeda murunjooda, ang'wearda ghwadaah ghwayeat beasta aba murunjooda nea murunjooda ea mwaaga beasta.

³ Ghwalamda Musa ak gwayi, “Gaydeasiipsa dadaa gwadeagooni hawiin ea murunjooni mwaaga beasteani.”

⁴ Daah NG'UTAMIIDA gidaniyamda geaw ghwadaah gang'ula, gaguursa ASEETA niny aba jeeda murunjooda, “Musa, Musa!” Ak gwayi Musa, “Aniini geandi hiji.”

⁵ Hean gwayeesha, “Adineekiisi hiji, fwakta geeka mida geeshangaagu, aba gideaba hiji imiinaadawiin ng'eanyiida ghaydidi.”

⁶ Gabiikta ASEETA gwayi, “Aniini geawooschi ASEETA gweanu, ASEETA Abrahamu, ea ASEETA Isaka, ea ASEETA Yakobo.” Hean ghafuy Musa gheamamdaanyi, aba gideaba ghoawal ghwadaah ASEETA.

⁷ Ghwalamda NG'UTAMIIDA ak gwayeesha, “Naadaayi sawanadeeda fugeasu mida Misri, ak ea naayiinyi shooka nyaawa, sissa fuga nyaawa hees, ak ghaanali sawanadeeda nyaawa,

⁸ ak ghaararang'aanyi dalealu aba geatinga fuga Misri, ak geascheeng'ni ng'eanyiita ea ghapka ng'eanyiida miy haw, ng'eanyiida gulda eanooga ea maleeda, ea ghwahiita ng'eanyiida fuga Ganaani, ea Hiti, ea Amori, ea fuga Beresi, ea Hifi, ea fuga Yebusi.

⁹ Asi ghamneawa ng'ula, shooka fuga Israeli nihidu heedeanyu, ak ea naadaayi sawanadeeda nyaawa sawan fuga Misri.

¹⁰ Beeni, gaydeajeaktaneey heeda Farao aruuni fugeasu, was fuga Israeli, aba ng'eanyiida Misri.”

¹¹ Ghwalamda Musa ak gwayeesha ASEETA, “Aniini geawooschi ng'eaha jea dawa heeda Farao ak gearuudu fuga Israeli aba ng'eanyiida Misri?”

¹² Ghwalamda ak gwayeesha, “Manda gajeendeayeena sea ang'iing'i ak nih gajea gwadeagooda gil aba headaang'u, gideaba geajeaktaneey: iiruudu buuneeda aba ng'eanyiida Misri, abeeda gajabata ASEETA aba uhuudeaba giijeeni.”

¹³ Ghwalamda Musa ak gwayeesha ASEETA, “Iyaahiiti heeda fuga Israeli ak geayeeshi saawa, ‘Goojeaknean ASEETA ghweanigeagwa heedeang'wa,’ ak ghoanyaashan, ‘Gheawungaaschi ng'eaha?’ Abeeda gaydayeeshaan saawa?”

¹⁴ Gwayeesha ASEETA Musa, “ANIINI GEANDI WAS DIITA BEAN GWANDEAN.” Ak gwayeesha, “Nih gichea rukusiinda fuga Israeli gil, ‘ANIINI GEANDI goojeaknean heedeang'wa.’”

¹⁵ Gabiikta ASEETA gwayeesha Musa, “Rukusiina ng'asheanji fuga Israeli, gideaba, ‘NG'UTAMIIDA, was ASEETA ghweanigeagwa, ASEETA Abrahamu, ea ASEETA Isaka, ea ASEETA Yakobo, goojeaknean heedeang'wa’; nih gheawungeasu gil ea gagul damanda manda muudeanooda, nih gayghoah gichea eepkeateewean ea gagul seaygoojiga sean.

¹⁶ Una ak gibwadi geat gweargwa fuga Israeli, ak giyeeshi saawa, ‘NG'UTAMIIDA was ASEETA ghweanigeagwa, ASEETA Abrahamu, Isaka, ea Yakobo, gabusean ak gwayi, “Naahidu heedeang'wa ak ea naadaayi gisihindaneegwa aba ng'eanyiida Misri;

¹⁷ ak ea neabean dargu gideaba gaydeascheeng'neegwa aba jeeda sawanadeeda fuga Misri, ak gaydeaneegwa ng'eanyiida fuga Ganaani, ea Hiti, ea Amori, Beresi, Hifi, ea Yebusi, was ng'eanyiida gulda eanooga ea maleeda.”’

¹⁸ Ak saawa gayghwayiiy ghuutaang'u, ak gajadeayeewana gweargwa Israeli iyooweayi heeda sugoocheanda Misri ak giyeeshi niny, ‘Siroonyeewi NG'UTAMIIDA was ASEETA fuga Ebraniya, ak ghamneawa geemuscheey eeweaya eawooji samwagu jeeda dareapcheeda eatayda lukghumeeda aba heeda NG'UTAMIIDEANYA was ASEETA.’

¹⁹ Ghaanali gideaba sugoocheanda Misri maygwasikseegwa aweayeena, geaghus aba geatinda hoauur.

²⁰ Ak gaydamiinda geatindeanyu dalas ng'eanyiida Misri aba ng'asheega deamdeameadi sean jea dasisa, ng'ata abeeda gagwasikseegwa aweayeena.

²¹ Ak gaydaweat fiisu aba madeeda fuga Misri, aba gideaba iiweay ea mwaada geatinga mwadaagha,

²² daba gatmooni mus giischeewoocheandaanyi, ea gatmooda was rabascheandeaba gheanyi, dabita sisna gharinga sisina lapiya ea gea sisna dahaabu, ea hang'weaka, ak gajookwealsiina orjoogeagwa ea haweegeagwa, ak gajayaada rabadaneeda aba heeda fuga Misri.”