RITEAYDA 2 - Bibliyeeda Ghaydit

Jeata Musa

¹ Iidu ghang'eat siispa dooshta Lawi ak ghaghi hudeaba Lawi.

² Iimuchu gagweayiit gatmooda ak gwaji baleanda, hean daah nea baleanda aamiy muuchi, ghafuy sheeh samwagu.

³ Iidu nea mutghoamu ghafuy, hean gageanu sooscheanda sisna muudayga ak ghoanoar aba hideeda ea ganamda; amwahit ghwayiin baleanda jeeda, ng'ata ghwayiin jeeda muudayga mida ghuuta ghealooda.

⁴ Abeeda ghamiinaada huda ghaamwat nea sheagi, ghwadaah gichea gabussa niny nea meadaaha.

⁵ Deagheata ghwararang'aan hudeaba Farao goohuushi aba jeeda eenda, ak ghwadaah huda gadiyeeda nea gwaneayi aba ghuuta eenda; ak ghwadaah sooscheanda aba jeeda nyeega, hean goojeakta huda gadiyeeda gawa ghamwaghaada.

⁶ Hean nea ghwajaat ghwadaah baleanda; nea abeeda baleanda gooyeawda. Ng'ata gwasawana jeadaanyi ak gwayi, “Nih gajea jeabwagi gil aba jeeda diibiga Ebraniya.”

⁷ Ghwalamda huda ghaamwat ak gwayeesha hudeaba Farao, “Gaydawa daguursa huda jea gooreerneey jeebi aba jeeda gadeemga fuga Ebraniya?”

⁸ Ghwalamda hudeaba Farao ak gwayeesha hudida, “Una.” Hean gawa hudida gaguursa gheamata baleanda.

⁹ Ghwalamda hudeaba Farao ak gwayeesha gatmoodida, “Aada jeebi ak guwi areernean, ak gaydagoonyi gidageatidaang'u.” Hean ghwaat gatmoodida baleanda gawa ghoarear.

¹⁰ Iidu gwaheedu baleanda ak ghwaat gatmoodida baleanda heeda hudeaba Farao ak ghoah orjeedaanyi; ak gaguura gheawungaaschi Musa, ak gwayi, “Aba gideaba gwayi ghaanyasi niny ghuuta beega.”

Musa gamng'awsa ng'eanyiida Midiyani

¹¹ Eaweecha nea nihissa heeda Musa, gwarita gawa heeda fugaaschi, ak gang'ula sawanadeeda nyaawa, ak ghwadaah siida Misri nea ghabwar siida Ebraniya, bea jeeda fugaaschi.

¹² Hean goong'weersa meadajeega sean ak ea mwadaaha sih, ak ghabwar siidida bea Misrihiin ak gabuy aba jeeda iseaskweanda.

¹³ Iimuchu nea gwarita eaweeda niirja, ghwadaah fih iyeenya bea Ebraniya nea gabearji, ak gwayeesha siidida adiiysa nirjeaniin, “Ghwasaan anda gibwari siida ghaheang'wa?”

¹⁴ Ghwasha nea gwayeesha, “Gagoonyi ng'eaha hawunda jea ambalaneasa ea argweakiiseasa? Gigasayi nuustanean gida inuusti siida Misrihi?” Hean ghabeal Musa ak gwayi, “Aba huumwa ng'asheanji sinal.”

¹⁵ Hean iiy Farao ng'asheesu, gagasa gwanuus Musa. Ng'ata gamng'aw Musa aba madeeda Farao ak gawa goobiida ng'eanyiida Midiyani; ak goopteada aba ghuuta healadeeda.

¹⁶ Abeeda ashoohoocheanda ng'eanyiida Midiyani gwandeawa haw ispwa, ak ghapka ghwaram beega, ak ghoanyiit simajeega beega jea ghwaleaydaawa hawanyeanda nooga ghwaan.

¹⁷ Hean ghapka jeagiischoodiga ak ghahoan haweegiga, ak ghamiinaada Musa ak ghaweat saawa, ak ghoaleayda hawanda nooga.

¹⁸ Gaweay ama hita heeda ghweanda nyaawa was Reueli gwayeesha, “Anda ean goobean abiikni?”

¹⁹ Ghwalamda saawa ak gwayeesha, “Gwanda siispa Misri weadeasa aba geatinga jeagiischoodiga, ak ea meakghusa nih gwaramu beega ak ghoaleayda hawanda nooga.”

²⁰ Ghwalamda ghweanda nyaawa ak gwayeesha haweagaaschi, “Ak gwanda yeenu? Ghwasaan anda goonung'usi heeda siida? Aguursiina eembuucheewana.”

²¹ Ng'ata ghamwas Musa goobiida gheedeaba siidida, ak ghoadaw Musa hudaanyi siguura Sipora.

²² Ak gwaji baleanda, ak gaguura gheawungaaschi Gershomu, aba gideaba gwayi, “Geawooschi rabascheanda aba ng'eanyiida buuneeda.”

²³ Hean ng'ata eawoojiga saang'a ghami sugoocheanda Misri. Ghwanyas fuga Israeli sawanadeeda aba jeeda soomjeandumeeda nyaawa, ak gooyeawda nea gagasa weeta, ak ghwahita shooka nyaawa bea sawanadeeda heeda ASEETA.

²⁴ Ak ghwayiiy ASEETA shooka nyaawa, ak ghoapkaat ASEETA neajeadaanyi sea Abrahamu, ea Isaka, ea Yakobo.

²⁵ Ak ghwadaah ASEETA fuga Israeli, ak ghwanal ASEETA giduurji saawa.