RITEAYDA 16 - Bibliyeeda Ghaydit

Hamita siguura Maana ea udamughuushta

¹ Hean ghang'eada eemeesean bea Israeli ng'eanyiida Elimu, ak geeweay ea eehita dareapcheeda Sini, mida dageascheeda Elimu ea Sinayi, nea eaweedeaba damanamuut gil bea sheedeaba iyeenya aba damanda ghayi rinna Misri.

² Ng'ata ghwaadaghuut eemeesean bea Israeli Musa ea Haruni aba jeeda dareapcheeda,

³ ak gwayeesha saawa, “Ghang'wana ghayi gwanuuseasa NG'UTAMIIDA aba ng'eanyiida Misri, damanda siipiitpiidi ak geayaaji banyeega ea mukaate ea eelang'uuda, mwasamwa gideaba gooyeadu eemeeni ghabwar jalooda aba jeeda dareapcheeda.”

⁴ Ghwalamda NG'UTAMIIDA ak gwayeesha Musa, “Ng'ula, gaydanung' gwaroobaseegwa roopta mukaate jea gwaleabu humng'eeda, ak gaygwarita buuneeda gaweay jarooda galeagasean ghoawaam daghwardeaba eaweecheanjagi ak gaydasim saawa dadaa ea jea ghoang'waay deaweedeanyu ghana manda.

⁵ Ak eaweedeaba lah bea giliwas eawooji ispwa siitiing'diing'deawa gida jea eeyeadu gah, gajea nibiyeenya gil aba gea siiwaam galeagasean.”

⁶ Hean ghwalamda Musa ea Haruni ak gwayeesha fuga sean bea Israeli, “Shing'ada gajanala gideaba NG'UTAMIIDA ghayi gooruunaneegwa ng'eanyiida Misri,

⁷ ak numuji sakteayda gajadaaha giigheambiita NG'UTAMIIDA aba gideaba niyiiy gideaniiksiindi NG'UTAMIIDA. Aseasa geawooschi ng'eaha inyas gooniikseasaan?”

⁸ Ghwalamda ak gwayeesha, “Shing'ada gaygagooneegwa NG'UTAMIIDA banyeega jea ayaaga, ak sakteayda gaygagooneegwa mukaateeyda jea goolang'uudeegwa, aba gideaba NG'UTAMIIDA niyiiy giiniikghteang'wa ooniiksi niny, aseasa geawooschi ng'eaha? Giiniikghteang'wa mamiiseasa, gammiisa NG'UTAMIIDA.”

⁹ Ak ghwalamda Musa ak gwayeesha Haruni “Eeshiina eemeesean bea Israeli, gideaba, ‘Apkaani aneekiisiina madeeda NG'UTAMIIDA, aba gideaba niyiiy giiniikghteang'wa.’”

¹⁰ Damanda duu goobaloola Haruni eemeeda fuga Israeli, hean siing'weersa dareapcheeda, hean geadaah nirdu giigheambiita NG'UTAMIIDA aba jeeda shamooghooda.

¹¹ Ak ghwalamda NG'UTAMIIDA ak gwayeesha Musa,

¹² “Naayiinyi giiniikghta fuga Israeli, eeshiina saawa, ‘Shing'ada gajayaaga banyeega, ak sakteayda gajayaaga mukaate, ak gajanala gideaba geawooschi NG'UTAMIIDA was ASEETEANG'WA.’”

¹³ Iidu nea niiw shing'ada ghapka udamughuushta ea gwadukuta maheemajeanda, nea sakteayda ea nineaweesa rahooda murdajeega sean bea maheemajeanda.

¹⁴ Hean iidu nea ghoabit rahooda, geepuussa ng'eanyi dugusu manang'i uurji mukaate asasi aba jeeda dareapcheeda.

¹⁵ Daah fuga Israeli duguugiga, gaba nih eesha nuut, “Suh naaha?” Aba gideaba meanali gidawas. Ghwalamda Musa ak gwayeesha saawa, “Suh mukaateeyda gooneegwa NG'UTAMIIDA gil jea ayaaga.

¹⁶ Nih diigheanda ghayi rugu NG'UTAMIIDA gil gideaba ‘Gilinyoo ea siida gil dealiima gidabeachi daghwardaanyi jea ghwaak beachi jeeda dahuuda nea geegala mooneeda fuga mida jeeda maheemajeanda.’”

¹⁷ Ak gwasindunu fuga Israeli, suuk gooliim gea naawda, nea suuk ghoawaam gea suunyaat.

¹⁸ Iidu nea geeteen aba gidida siiteeniida siguura hoomeeriin, siidida gwachi awaam gea naawdaan ea manda gidabit nea dea awaam gea ng'ay ea manda gidashoay, gaba nih awaam giteena daghwardaanyi.

¹⁹ Ghwalamda Musa ak gwayeesha saawa, “Adiidu ghwalach giliwas siida hamidi ea ghoah sakteayda.”

²⁰ Ak ea manda siisi aleeysiit Musa, fiisu ng'ay ghwalach gidak ea ghoah sakteayda, ak iidu ea niimealu aba gideaba ning'ut ghuughuutka, hean ghwanyareas Musa aba badahuuka nyaawa.

²¹ Inyeesa gilinyoo ea sakteayda gil gaba siisi awaam gidabeachi daghwardaanyi jea ghwaak, ak iidagu daknooda ghwanyar hamitida.

²² Eaweedeaba lah bea jeemba eawooji ispwa, inyeesa geeweamu mukaateeydida nibiyeenya, gaba nih anyiit gidida hoomeeriin nibiyeenya, hean gaweay fuga hees bea eemeeda Israeli gwarukusa Musa,

²³ ghwalamda Musa ak gwayeesha saawa, “Nih gidarugu NG'UTAMIIDA gil gideaba, ‘Numuji Sabaato gil. Ak ea eaweeda fuufta gil nea ghoabwachi gheawungeasu. Abeasha gea jea abeasha, ak ghoawali gea jea eawaala, ak gea jea ghwalagaan sean ootiiwa ea ghoah sakteayda.’”

²⁴ Hean geetiiw ea ghoah sakteayda gawuurji gidarukusiinda Musa saawa, ak ea mii goomealu aba gideaba miighang'ut ghuughuutka.

²⁵ Hean ghwalamda Musa ak gwayeesha, “Eanean ayaaga aba gideaba eanean Sabaatoheeda NG'UTAMIIDA gil, aba gideaba eanean hamidi mwajanyasa aba jarooda.

²⁶ Gajoawaamwa eawooji lah, ama eaweedeaba ispwa ea mwajanyasa aba gideaba eaweeda Sabaatohi.”

²⁷ Eaweedeaba ispwa gaweay fiisu ng'ay jarooda ghoawaam ak ea mwanyasa.

²⁸ Ghwalamda NG'UTAMIIDA ak gwayeesha Musa, “Gajaheawana eang'waanya diigheanyeekeasu ea deaweedajeegeasu ea ghoah eeju?

²⁹ Ng'ula! NG'UTAMIIDA nigooneegwa Sabaato, ak eawooji lah gagooneegwa mukaateeyba eawooji iyeenya, asi daba siisi abiida heeda mida gilinyoo ea siida gil deabiidana ghoah eaweeda Sabaato nea adagagadiiyi.”

³⁰ Hean gafuuf buuneeda eaweeda Sabaato.

³¹ Ak gaguura fuga Israeli hamitida Maana, iing'ulayi gawuurji bukushiida nea iisamu gwasamu mukaateeyda siyeasha maleeda.

³² Ghwalamda Musa ak gwayeesha, “Nih diigheanda ghayi rugu NG'UTAMIIDA gil, gideaba, ‘Ootiiwa bayokchanjagi, ghapka ghwadaah jeacheengeagwa mukaateeyda ghayi aang'aataawaneegwa aba dareapcheeda, damanda earuunaneegwa jeeda ng'eanyiida Misri.’”

³³ Ak ghwalamda Musa ak gwayeesha Haruni, “Geani maghasta ak giyiini jeeda maanaheeda deena jeemba hoomeereenagi, ak giyiini madeeda NG'UTAMIIDA ea ghwahita damanda jeacheengeagwa.”

³⁴ Hean gwasinda Haruni gidida rukusiinda NG'UTAMIIDA Musahiin, ak gageanu ghwayiin madeeda meeseedida bea muuwuunoodean eetiiw.

³⁵ Fuga Israeli ghwaak maana gweanyeew haradam, ea ghwahita ng'eanyiida jea goobiida, ghwaak maana ea ghwahita moonghooda ng'eanyiida Ganaani.

³⁶ (Homerajeanjagi geegala bayookcheew damanamughuush).