RITEAYDA 13 - Bibliyeeda Ghaydit

Sajita Duweacheeda

¹ Ghwalamda NG'UTAMIIDA ak gwayeesha Musa,

² “Agwalnean duweachajeega sean, was jeata madeeda aba bugusta fuga Israeli ghang'eada dea siida ea ghoah gea dugwa. Suh geasu.”

Ghweelmeeda mukaateeyda meamwatawiida

³ Ghwalamda Musa ak gwayeesha buuneeda, “Oapkaada eaweeda ghayi ooriteawi aba ng'eanyiida Misri aba gheeda soomjeandumeeda, gooruunaneegwa NG'UTAMIIDA hoowa aba uurdaanyi haw, ak ea adoayaaji mukaateeyda simwatawiit.

⁴ Agooga gooriti nea geeng'usha sheeda, bea damanda heasa boogean.

⁵ Inyas gweaneegwa NG'UTAMIIDA ea ghoahiineegwa ng'eanyiida fuga Ganaani, ea fuga Hiti, ea Amori, ea fuga Hafiti, ea Yebusi, ghayi heeleesa sea ghweanigeagwa gideaba gaygagoneegwa, ng'eanyiida nyiit eanooga ea maleeda, asi gilakweay gagasa oopkeata sheeni ghayi ooriniin.

⁶ Gajayaaga mukaateeyda meamwatawiida eawooji ispwa, ak eaweedeaba ispwa gajea ghweelmeeda NG'UTAMIIDA gil.

⁷ Mukaateeyda meamwatawiida gajeayaak eawoojisu asispwaan, ak mukaateeyda simwatawiit, adeedeaksa headaang'u, eara gidamwataw adeedeaksa headaang'u, ghana heeda wassean aba jeeda ng'eanyiidaang'u.

⁸ Ak gayrukusiina dibiigagu eaweedida, gideaba ‘Geesinyi ghweelmeeda uurji nih aba ng'asheanda nisinnean NG'UTAMIIDA damanda earini aba ng'eanyiida Misri.’

⁹ Ak gayghoah gwadeagooda aba geatindaang'u, nea ghoah giipkeata aba gheanyangaagu, nea gwanda ghuutaang'u deaweedeeda NG'UTAMIIDA aba gideaba gooruunaneey NG'UTAMIIDA ng'eanyiida Misri aba geatinda mideawa uurda.

¹⁰ Asi ghamneawa gajeang'waanya diigheanji galeagasean ea ghoah gilakweay.

Duweacheeda

¹¹ “Inyas gweaneey NG'UTAMIIDA ea ghoahiineey ng'eanyiida fuga Ganaani, gawuurji gidaghayi bean gwarukuteayda nea gwarukusa eara ghweanigeagwa gideaba gaygagoonyi,

¹² abeeda duweachajeega sean gaygaba NG'UTAMIIDA. Ak eara aba jeeda dugwaagu gisiji aba mwadi was heeyda gaygaba NG'UTAMIIDA.

¹³ Ak gilinyoo ea jurukuta jeata madeeda bea digeeda gajatinana dayeenda gisilleanda, ghana iimigassi atina, gayhirja gheata. Ak duweacheeda siida aba jeeda orjoagaagu gajatina.

¹⁴ Ak inyas ghwahidu damanda ak ghoanyaashnyi orjeedang'u gideaba, ‘Gili gideabeadaanyi naaha?’ Gajeeshiina niny, ‘nih geebaysiina gideaba gooruuneasa NG'UTAMIIDA aba geatinda uurdaanyi aba gheeda soomjeandumeeda aba ng'eanyiida Misri.

¹⁵ Damandideani heaweewa Farao gwasikseasa eeweayeena ak ghabwar NG'UTAMIIDA duweachajeega sean bea ng'eanyiida Misri, duweacheeda siida ea dea dugwa. Ak ghoah gideabaysiini daadaw NG'UTAMIIDA duweachajeega sean bea heewga sighus duweachajeega sean bea orjoogeasu gaydeatin.’

¹⁶ Ak ng'asheanji gayghoah gwadeagooda aba geatindaang'u, ak giyiini dageascheeda gheanyangaagu, NG'UTAMIIDA gooruunaneasa ng'eanyiida Misri aba uurdaanyi.”

Daraneeda shamooghooda ea daraneeda beasta

¹⁷ Iidu nea gwasiksa Farao buuneeda gaweay ea moadoabiiwa ASEETA ghwanung' gwasik ng'eanyiida fuga Filisti, earapeadi naweeda lach ng'eanyi, aba gideaba gwayi ASEETA, “Gajiidu ghwayam geat buuneeda ak gabiikta Misri iidaah ng'ucheeda.”

¹⁸ Hean goosiik ASEETA buuneeda naweeda dareapcheeda, neekeewa basooda Shaamu. Ak gwascheeng'na fuga Israeli ng'eanyiida Misri nea nishaash dabita.

¹⁹ Ng'ata ghwasar Musa geaka Yosefu, aba gideaba ghayi Yosefu niyeaksa fuga Israeli habeawooda nea gwayeesha, “Gaygabareaseegwa ASEETA ak ghoasareanyi geakeasu oang'aamwana hiji.”

²⁰ Ak geang'eatng'eat eeweay nea geang'eada Sukoti, ak geewus aba Etamu, mida moonghooda dareapcheeda.

²¹ Inyeesa askweari goosheedeawa NG'UTAMIIDA saawa aba jeeda shamooghooda uurji daraneeda, aba gideaba ghoadoabiiw naweeda nyaawa, nea eawa ghoadoabiiw daraneeda beasta aba gideaba ghoabwaay naweeda nyaawa aba gideaba gaweay askweari ea eawa,

²² daraneedida bea shamooghooda bea askweariin, ea daraneedida bea beasta bea eawean, mii goosiipteawa madeeda buuneeda.