RITEAYDA 12 - Bibliyeeda Ghaydit

Basaaka

¹ Ghwalamda NG'UTAMIIDA ak gwayeesha Musa ea Haruni aba jeeda ng'eanyiida Misri,

² “Sheeni gayghoah sheeda jea oong'eeteena sheega, aba heedeang'wa, ak gayghoah aba heedeang'wa sheeda madeeda aba gweayda.

³ Rukusiina fuga sean bea Israeli gideaba inyas eaweedeaba damanamughuush bea sheeni daba siisi geanu gisilleanda aba gealga nyaawa aba mooneeda fugeaba ghoah

⁴ ak iing'ay buuneeda aba ghoah aba agita gisilleanda, ada abeeda daguuyi siida ea giischeewoocheanda neekeewa gheanyi ak gageanu gisilleanda jea eamu agita aba mooneeda buuneeda.

⁵ Gisilleandeang'wa adagwandeawa sirjeeda, ak ea lagweenda gil nea gaba gwanyagi, gajageanana jeeda gisilga ghana jeenooga

⁶ ak gajeahaaghwana ea ghwahita eaweedeaba damanang'wan bea sheeni, damanda jea gwanuusa fuga sean bea Israeli gisilga aba shing'ada.

⁷ Hean gajeegeanu foojeanji ng'ay, ak geayiinaada meadajeega duwaawi bea gidaghuuta ea darearjeeka gealga jea gweagiischeewa saawa.

⁸ Ak gajeayaak banyeega eaweedida, nea sibeash, sea mukaateeyda miyeamwatawiit, geayaak sea nyeanyiida ng'weani.

⁹ Adoayaaji banyeega was hideanda ghana gea siiwu aba beega, geaghus gea sibeash, ghang'eada uhuuda ea geeshanga ea dabita jeeda.

¹⁰ Ak adeepuusa heeda banyeega ea ghoah sakteayda, iideepa gwanda gidasiipuusa heeda ea ghoah sakteayda abeeda gajeaghwarda.

¹¹ Ak gajayaaktunu, gajarada mananuunatkeagwa, nea gwanda geeshangeagwa geeka, nea geatingeagwa gwanda bayiigeagwa, ak gajayeagiischeena nea ghoalamwaji. Aba gideaba Basaakeeda NG'UTAMIIDA gil.

¹² Aba gideaba gaydasik bugusta ng'eanyiida Misri eaweedida, ak gaydabwar duweachajeega sean bea ng'eanyiida Misri, bea siida ea diyeanga, ak geargweaksi aseecheeka sean bea Misri aniini geawooschi NG'UTAMIIDA.

¹³ Ak foojeanda gayghoah giirooraneeda aba heedeang'wa aba gealga oondi, ak inyas ghaadaayi foojeanda, gaydang'ata ea mwanyaseagwa bileangida, ak gwasawaneegwa iyaalaaschi ng'eanyiida Misri.

¹⁴ “Ak eaweecheanji gayghoah giipkeata aba heedeang'wa, ak gajasina ghoah ghweelmeeda aba heeda NG'UTAMIIDA, ea seaygoojigeagwa sean, ak nih gayghoah diigheanda maygamuudean.

Ghweelmeeda mukaateeyda meamwatawiida

¹⁵ Gajayaaga mukaateeyda meamwatawiida eawooji ispwa, eaweeda madeeda bea eawoojisu asispwaan ageandeawana gidamwataw jeeda gealgeagwa, siida wassean jea ghwaak mukaateeyda mwataw ghang'eada eaweeda madeeda ea ghwahita eaweedeaba ispwa, siida sunu ooruuteawana jeeda fuga Israeli.

¹⁶ Eaweeda madeeda gajea eaweeda girgweageeda haw ghaydidi, ea eaweedeaba ispwa eara ada gajea eaweeda girgweageeda haw ghaydidi, ak ea maygwanda gadiyeeda jea eesin eawoojisu aba jeedeaba eawoojisu, geaghus gidamwayghwashiy aba agita, nih gichea abeacheewana sinita gil aba heedeang'wa.

¹⁷ Ak gajasina ghweelmeeda mukaateeyda meematawiita, aba gideaba eaweecheanji gearuudu eemeedeang'wa aba ng'eanyiida Misri, asi abeeda gajasina ghweelmeeda eaweecheanji, ea gagul seaygoojigeagwa ak ghoah deaweeda damanda manda muudeanooda.

¹⁸ Sheeda madeeda, iibea eaweedeaba damanang'wan bea sheeda, inyeesa shing'ada ghoayaaji mukaateeyda meamwatawiida, ea ghwahita shing'adeeda eaweedeaba diktam ea agi bea sheeda.

¹⁹ Aba jeemba eawooji ispwa adagoobiida gidamwataw jeeda gealgeagwa, ak siida was sean ak gidamwataw, abeeda gagasa eang'aamwa jeeda fuga Israeli, ea rabascheanda gil ghana ea siida ng'eanyiida gil.

²⁰ Ayaaga gidameamwatawiida, aba heeda oopiidi sean ayaaga mukaateeyda meamwatawiida.”

Basaakeeda madeeda

²¹ Ng'ata gaguursa Musa gweargwa Israeli, ak gwayeesha, “Aweayeena ak ea daba siisi geanu gisilleanda, ahiit mooneeda fugeaba ghoah, ak goonuuschi gisilleanda Basaaka.

²² Ageani damealeanda geeta siguura hisoopo ak ghoopuuti jeeda foojeanda mida jeeda gweeriida ama ng'ata ghoayeashi darearjeanda sea meadajeega sean bea gidaghuuta, ak ea adagwarita sih aba jeedeang'wa gawa jarooda ea ghoah sakteayda.

²³ Aba gideaba gayghang'ata NG'UTAMIIDA ak ghabwar fuga Misri, ak inyas ghwadaah foojeanda aba gidaghuuta abeeda gayghang'ata NG'UTAMIIDA aba gidaghuuta, ak ea maygwasiksa gidida jea ghwadatas buuneedean ghwahidu jeeda gealgeagwa ak ghabwareagwa.

²⁴ Ak gajafura ng'asheanji ghoah diigheanda aba headaang'u ea aba heeda dibiigaagu ea ghoah damanda manda muudeanooda.

²⁵ Ak iyoahiti ng'eanyiida jea gagooneegwa NG'UTAMIIDA uurji gidaghayi ooheeleati, abeeda ghoang'waanyi gadiyeeni.

²⁶ Inyas gwayeeshiineegwa diibigeagwa, ‘Gadiyeeni gideabeadaanyi naaha?’

²⁷ Abeeda gooyeeshi, ‘Nih lukghumeeda basaakeeda NG'UTAMIIDA gil, aba gideaba ghayi gwasik ghuusiga gealga fuga Israeli aba ng'eanyiida Misri, ak ghabwar fuga Misri nea ghoaghu gealgaasa.’” Ak gabuy buuneeda iheenga ak ghabwat.

²⁸ Hean gaweay fuga Israeli gwasin ng'asheanji; gawuurji gidarukusiinda NG'UTAMIIDA Musa ea Haruni, hean gwasin.

Miyeeda duweachajeega

²⁹ Hean bugusta eaweeda ghabwar NG'UTAMIIDA duweachajeega sean bea ng'eanyiida Misri, ghang'eada duweacheeda Faraoheeda apteada aba uhuuda hoorgeadaanyi bea gheambalmeeda ea ghoah duweacheeda siida mida ghealooniga ea ghoah duweachajeega dugwa.

³⁰ Ak ghang'eat Farao eawa, niny ea fugaaschi bea gadiyeeda, ea fuga sean bea Misri; ak gwanda shookcheanda haw ng'eanyiida Misri, aba gideaba manda gheeda mwami siida

³¹ Hean gaguursa Farao Musa ea Haruni eawa, ak gwayeesha, “Ng'eada ak guwi riteawana jeeda fugeasu, ang'iing'i sea fuga Israeli, ak gooweayi aghadoawana NG'UTAMIIDA gawuurji gidinyaashti.

³² Oawaasa noogeagwa ea dugweagwa, gawuurji gidinyaashti, ak gooweayi, ak googoonyean ghawooda eara aniini!”

³³ Hean ghwanung' fuga Misri gwariteawa buuneeda jeeda ng'eanyiida nea ghwalamwach geat, nea geeyi, “Inyas ea meeweayeeni gajeemeewa sean.”

³⁴ Ng'ata ghwasar buuneeda dearanga nganooyda nyaawa damanda miyeayiina jeeda gidamwataw ea dabitida sisina mukaateehiin geayiin jeesinga shageeniga nyaawa ak geayiin gheatkweaka nyaawa.

³⁵ Ak gwasinda fuga Israeli gidarukusiinda Musa saawa, ak geegasa aba heeda fuga Misri dabita sisna gharinga sisina lapiya ea dabita sisna dahaabu ea hang'weaka,

³⁶ ghwanung' NG'UTAMIIDA ghwanyas gheamamda fuga Israeli aba heeda fuga Misri, inyeesa gil mus sean geataw.

Fuga Israeli gwariteawa Misri

³⁷ Ghang'eada fuga Israeli ng'eanyiida Ramesi ea ghwahita Sukoti, abeeda mooneeda buuneeda weewa geeshanga ea sagalamnyooji lah nea meeyiita gadeemga ea diibiga.

³⁸ Ghwascheang'da gaweay nea gaguuyi eemeetuw adeayi saawa, ea dugwa saang'a, sea gisilga ea haleanjeeda saang'a.

³⁹ Ak iidu geesin mukaateeyda meamwatawiida sisna dearanga ghayi siyaat damanda sirina Misri, abeeda miyeamwatawiit aba gideaba gwariteawa Misri nea gwajirjir abeeda miyeewu gichea eayaak.

⁴⁰ Fuga Israeli goobiida ng'eanyiida Misri gweanyeew bughalaji ang'wan ea diktam ea damanamughuush.

⁴¹ Mudeanoodeaba gweanyeeksu as bughalaji ang'wan ea diktam ea damanamughuushiin eaweeda riteawa lugooda NG'UTAMIIDA ng'eanyiida Misrihi.

⁴² Eaweedida ghoang'wearu NG'UTAMIIDA, aba gideaba gooruuna saawa ng'eanyiida Misri, ak nih ea eaweeda NG'UTAMIIDA gil, ak gammiisa gideaba gaygoopkeadi fuga Israeli sean ea ghoah seaygoojiga nyaawa.

Gichea ghabeada Sinooda Basaaka

⁴³ Ghwalamda NG'UTAMIIDA ak gwayeesha Musa ea Haruni, “Nih gichea ghabeada sinooda Basaaka gil, rabascheanda adaghwaak hamita Basaaka,

⁴⁴ geaghus gilinyoo ea soomjeanda gil, sishaaha lapiya gayghanyi aada ghasmeahooda ayiila niny, ak abeeda ghwaak hamita Basaaka.

⁴⁵ Ak rabascheanda ghana siida gadiyeeda ak mushaahara, adaghwaak hamita Basaaka.

⁴⁶ Hamita gajeeyeaksa jeemba ghawagi, ak ea adeeruuta banyeega jarooda nea adeehirja geapkeeda.

⁴⁷ Ak dasina ng'asheanji fuga sean bea Israeli.

⁴⁸ Nea iimida buunyeanda mida jeedeang'wa ak gagasa gwasissa NG'UTAMIIDA basaaka, gammiisa ghanyi ghwaat headiga mida gheanyi sean ghasmeahooda eeyiil, ak abeeda gwaneekiit gwasin Basaaka, ak abeeda gaygawuurji sea siida bea ng'eanyiida. Sighus siida miyeayaat ghasmeahooda eeyiil adaghwaak.

⁴⁹ Digheanjagi aba badayda siida bea ng'eanyiida ea buunyeanda mida jeedeang'wa.”

⁵⁰ Fuga Israeli gwasinda ng'asheega gidarukusiinda NG'UTAMIIDA Musa ea Haruni, hean ghoah gisisinda.

⁵¹ Ak eaweedida gooruudu NG'UTAMIIDA fuga Israeli aba ng'eanyiida Misri sea lugoanyaawa.