RITEAYDA 11 - Bibliyeeda Ghaydit

Musa gwarugu miyeeda duweachajeega

¹ Gwayeesha NG'UTAMIIDA Musa, “Gudughwashoada bileanginagi jea dalas Farao ea ng'eanyiida Misri, ak abeeda gaygwasikseegwa aweayeena nea ghahoaneegwa ang'amwana hiji.

² Abaloola buuneeda ghamneawa gwayiing'shi, ak gilinyoo ea ng'eedeeda gil, ea gilinyoo ea gatmooda, damusa giischeewoocheandaanyi lagheanga sisiina heelajeega ea dahaabu.”

³ Ak ghoadaw NG'UTAMIIDA buuneeda aba madeeda fuga Misri. Ak ea nalaat Musa ak ea nighayda iitaanyi muuchi aba jeeda ng'eanyiida Misri, ea madeeda Farao ea fugaaschi bea gadiyeeda ea madeeda buuneeda.

⁴ Ghwalamda Musa ak gwayeesha, “Gwayi NG'UTAMIIDA, bugusta eaweeda gaydang'ata dasik bugusta ng'eanyiida Misri,

⁵ ak gaygameewa duweachajeega sean bea ng'eanyiida Misri, ghang'eada duweacheeda Faraoheeda apteada aba uhuuda hoorgeadaanyi bea gheambalmeeda, eara duweacheeda huda gadiyeeda mida murdeeda lagheaneeda ng'ealshooda, ea duweachajeega sean bea dugwa.

⁶ Ak gaygooguuli ng'eanyiisean bea Misri, shookcheanda haw, dea eara heeda ghayi miigwardu, nea maygutgwardu gicha.

⁷ Nea aba meatkweeda fuga Israeli, ea manda gudeeni reakghuta aba badayda siida ghana diyeayda, ak gajanala gideaba NG'UTAMIIDA niheeli fuga Misri ea fuga Israeli.

⁸ Aba suh seaniin fugaagu bea gadiyeeda gayghwararang'aan ghapka heedeanyu, ak gwatkuy aba madeedeanyu nea gwayi, ‘Rini jarooda, ea fuga eadu geeshtaang'u sean.’ Ng'ata nih gaydawa jarooda.” Hean ghabeawa heeda Farao ak gwarita jarooda nea ninyareas muuchi.

⁹ Hean ghwalamda NG'UTAMIIDA ak gwayeesha Musa, “Farao maygooleeyseey iit aba gideaba gayghaghayda ng'asheegeasu deamdeameadi aba ng'eanyiida Misri.”

¹⁰ Gwasin Musa ea Haruni ng'asheesu sean deamdeameadiin aba madeeda Farao, ak ghoahang'waay NG'UTAMIIDA guroorooda Farao, ak ea masiksiina fuga Israeli gaweay gwariteawa ng'eanyiidaanyi.