RITEAYDA 10 - Bibliyeeda Ghaydit

Deashamga

¹ Ghwalamda NG'UTAMIIDA ak gwayeesha Musa, “Una gheeh Farao aba gideaba naahang'waanyi gurooroadaanyi ea gurooruunatka fugaaschi bea gadiyeeda, ak gaydaahiimda gwadeagwajeesu ikeasuun aba bugusta nyaawa,

² ak ng'asheanji gayrukwiisiina orjeedaang'u ea orjooga orjeedaang'u ng'asheanda easimi fuga Misri ea gwadeagwajeega easinyi aba bugusta nyaawa, ak gaynala gideaba geawooschi NG'UTAMIIDA.”

³ Hean gawa Musa ea Haruni gheeh Farao, ak gwayeesha, “Gwayi NG'UTAMIIDA was ASEETA fuga Ebraniya, ‘Gayheewacheena ea ghoah eeju, ak ea miyaadi geaw ng'eanyi aba madeedeanyu? Siksiina fugeasu gaweay gagadiyeesean.

⁴ Ak inyas ea misiksiini fugeasu gaweay, ng'ula, numuji gaydanung' ghapka deashamga ng'eanyiidaang'u,

⁵ ak gaygwadukuta badayda ng'eanyiida, ak ea manda eara siyagi jea ghwadaah ng'eanyiida, ak gayghwaak haleanjeeda abit iing'ata roopta ghayi bea lagheanga, ak gayghwaak gilinyoo ea geeta gil ridu aba madamnyeanda was deang'wa,

⁶ ak gayghwanyiit jeeda gealgaagu, ea gealga fugaagu sean bea gadiyeeda, ea gea fuga sean bea Misri, ak giduurji nih ea miighwadaah ghweanigaagu ghana gheamba ghweanigaagu ghang'eada deaghayi hina badayda ng'eanyiida ea ghoah ghamneawa.’” Hean ghwayam geaw ak gwarita jarooda aba madeeda Farao.

⁷ Ghwalamda fuga gadiyeeda bea Farao ak gwayeesha niny, “Siisi gaygoodeawiideasa ea ghoah eeju? Siksiina fiisu gaweay gagadiiyeesa NG'UTAMIIDA was ASEETA nyaawa, mii jeeng'ni gideaba Misri ninyar?”

⁸ Hean gabiikta Musa ea Haruni heeda Farao, ak gwayeesha saawa, “Aweayeena agadiyeesiina NG'UTAMIIDA was ASEETEANG'WA, ak fuga jea gaweay ea geabeang'a?”

⁹ Ghwalamda Musa ak gwayeesha, “Gajeeweaya sea diibigaasa manang'i ea gweargwaasa, ea orjoagaasa ea haweega ea noagaasa ea dugwaasa, aba gideaba gamiiseasa eesisiina NG'UTAMIIDA ghweelmeeda.”

¹⁰ Ghwalamda ak gwayeesha saawa, “Gagasa andeawana NG'UTAMIIDA, iyeasikseegwa aweayeena sea orjoogeagwa manang'i! Ashageada gwanda madeedeang'wa sawanadeeni mwanang'

¹¹ Manda! Aweayeena headiga aghadoawana NG'UTAMIIDA aba gideaba gideagasayi gil.” Ak geahoan aba madeeda Farao.

¹² Hean ghwalamda NG'UTAMIIDA ak gwayeesha Musa, “Miinda geatindaang'u aba badayda ng'eanyiida Misri aba deashamga, ak gayghapka ng'eanyiida Misri, ak gayghwaak booga sean aba jeeda ng'eanyiida, gea ghayi abuut roopta lagheanga.”

¹³ Hean ghamiinda Musa bileangidaanyi aba badayda ng'eanyiida Misri, ak gweadu NG'UTAMIIDA jeameeda leabu gayeew, badayda ng'eanyiida askweari ea eaweesean, iidu nea niiw sakteayda gweadu jeameedida bea sakteaydean deashamga.

¹⁴ Ak ghapka deashamga badayda ng'eanyiisean bea Misri, ak goobissa ng'eanyiisean bea Misri, ak deashamgiga aasaang'a muuchi, eara heeda ghayi miigwardu ak ea maygabiikta gwardu.

¹⁵ Ak gwadukuta ng'eanyiisean, ea gamisaniit ng'eanyiisean, nea ghwaak booga sean mida jeeda ng'eanyiida ea haghweega sean bea geediga abuut roopta lagheanga ak ea moapta eara seendoanagi bea geeta ghana booga jeeda madamnyeanda aba ng'eanyiisean bea Misri.

¹⁶ Hean ghwalamwach gaguursa Farao Musa ea Haruni ak gwayeesha, “Neasissi riing'eeda NG'UTAMIIDA was ASEETEANG'WA ea agooga,

¹⁷ Eaniyean asamsiina riing'eedeanyu, geamuscheegwa eaghus nih asagiin amusa NG'UTAMIIDA was ASEETEANG'WA gageandeawanean miyeeni.”

¹⁸ Ng'ata ghabeawa Musa heeda Farao, ak gamus NG'UTAMIIDA.

¹⁹ Hean ghwayam NG'UTAMIIDA jeameeda ak ghwanung' gwaleabu heeda biyeara jeameeda ng'waan, ak ghaghuuta deashamga ak gaweay jeeda basooda Shaamu, nea meapuuda eara deashamayeanjagi aba jeeda ng'eanyiisean bea Misri.

²⁰ Ak ghoahang'waay NG'UTAMIIDA guroorooda Farao ea masiksiina diibiga Israeli gaweay.

Misaneeda

²¹ Ghwalamda NG'UTAMIIDA ak gwayeesha Musa, “Miinda geatindaang'u ageala humng'eeda, ak gaygamisaniit ng'eanyiida Misri, bwaak ea mudea daah gil.”

²² Hean ghamiinda Musa geatindaanyi nea googeal humng'eeda, ak gwardu misaneeda duu aba ng'eanyiisean bea Misri eawooji samwagu,

²³ ak ea madeaha geat buuneeda, nea manda siida asiipteawa heeda mida eawooji samwagu, nea heeda mida fuga sean bea Israeli ea manda misaneeda.

²⁴ Ng'ata gaguursa Farao Musa, ak gwayeesha, “Aweayeena aghadoawana NG'UTAMIIDA, ooteayeena eara diibigeagwa, nea gisilgeagwa ea noogeagwa goopuusi heeda.”

²⁵ Ghwalamda Musa ak gwayeesha, “Gamiiseasa eara ada eesina lukghumeeda ea haleanjeeda sisabwa geadi bea ghadooweeda sighwarda, ak gajeesisiina lukghumeeda NG'UTAMIIDA was ASEETEANYA.

²⁶ Eara dugwaasa mayghwashiy gajeawaasa, majeepuusiina bwadaw eara buuleeda, mayghwashiy gajeawaasa saawa eabwada NG'UTAMIIDA was ASEETEANYA, ak ea meanali dea jea eabwadana NG'UTAMIIDA geaghus eahita hoowa.”

²⁷ Ak ghoahaang'waay NG'UTAMIIDA guroorooda Farao ak ea masiksiina saawa gaweay.

²⁸ Ghwalamda Farao ak gwayeesha Musa, “Ng'amwana heedeanyu, ng'ula geaw adagudaadaayeay gicha, inyas gutadaanyi gaymeawa.”

²⁹ Ghwalamda Musa ak gwayeesha, “Aba gidanirugu! Maygudu biikta daahaan gicha.”