NEHEMIYA 9 - Bibliyeeda Ghaydit

Buuneeda ghamwas riing'eega nyaawa

¹ Hean eaweedeaba diktam ea ang'wan bea sheeni ghabwatgeat fuga Israeli nea gooluulda geat nea gookwa hang'weaka guniyajeega, nea gwasaksa birjeanda iheenga nyaawa.

² Ng'ata gooheeli geat fuga Israeli rabasta sean, ak ghamiinaada ak gwaduukuuna riing'eega nyaawa, ea giidiinyeanyeeka ghweaniga nyaawa.

³ Ak gaba nih miinaada aba headaanyi ak geasoamwa gitaabooda deaweedeeda NG'UTAMIIDA was ASEETA nyaawa, ama inyeesa iing'ata gheadi nuwaas aba askweardida geeduukuuna riing'eega nyaawa, nea geabwat NG'UTAMIIDA was ASEETA nyaawa.

⁴ Hean geamiinaada aba deageaw abiita fuga Lawi was geaba Yeshuwa, ea Bani, ea Gadimieli, ea Shebaniya, ea Buni, ea Sherebiya, ea Bani, ea Genani, ak geeyeawusa aba ghuuta haw NG'UTAMIIDA was ASEETA nyaawa.

⁵ Hean ghwalamda fuga Lawi ea Yeshuwa, ea Gadimieli, ea Bani, ea Hashabneya, ea Sherebiya, ea Hodiya, ea Shebaniya, ea Betaliya ak gwayeesha, “Amiinaada ak ghoakghaambiichi NG'UTAMIIDA was ASEETEANG'WA ea ghoah damanda manda muudeanooda. Nea geakghambiit gheawungaagu ghaambiidaat ng'ataawa ghawooda sean ea giigheambiita.”

Mooshta ghawooda bea duukuunooda

⁶ Ghwalamda Esra ak gwayi. “Ang'iing'i guwoosi NG'UTAMIIDA, nea gibwaageaw; nea gibwadi humng'eeda, ea humng'eeda mida humng'eeda, ea lugoadaanyi sean, ea ng'eanyiida ea haleanjeeda sean mida jeeda, ea baskweega ea haleanjeeda sean mida jeesinga nyaawa; nea haleanjeeni seaniin giidiiwi ang'iing'i; nea ghabwannyi lugooda humng'eeda.

⁷ Ang'iing'i guwoosi NG'UTAMIIDA, was ASEETA ghayi iloadi Abramu ak giiruuni ng'eanyiida Uru mida ng'eanyiida Galdayo nea ging'asi gheawunga guureewana Abrahamu;

⁸ ak gidaahi gideaba gurooroadaanyi ea doabiiwaat aba madeadaang'u, ak gisini neajeeda sea niny bea gideaba gajadawa jeataanyi ng'eanyiida fuga Ganaani, ea Hiti, ea Amori, ea Beresi, ea Yebusi, ea Girgashi, ak ginung' gwasa ng'asheandaang'u aba gideaba guwoosi doabiiwaat.

⁹ “Ak ghayi gidaahi sawanaduutka ghweanigaasa aba ng'eanyiida Misri, nea giileeysiit shooka nyaawa aba basooda Shaamu,

¹⁰ ak giihiimu gwadeagwajeega ea ng'asheega deamdeameadi; aba badayda Farao ea fugaaschi sean bea gadiyeeda, ea badayda fugaaschi sean bea ng'eanyiidaanyi, aba gideaba ginali gideaba geesin aba badayda ghweanigaasa; ak ginyaksi geaw gheawunga aba giduurjeata ghamneawa.

¹¹ Ak ginung' ghabwaasha basooda aba bugusta nyaawa, ak gaweay nea gwasik bugusta basooda was ng'eanyiida ghajaam; nea giika eadu geeshta nyaawaan, giibuuti bugusta basooda ak gawuurji lagheaneeda aba jeeda beega mideawa uurda.

¹² Nea mabeachi suh giidoabiiwi saawa aba daraneeda shamooghooda askweari, nea eawa giidoabiiwi aba daraneeda beasta aba gideaba ghoabwaay naweeda nyaawa jea gwasik.

¹³ Ak girarang'aani uhuuda Giijeeda Sinayi, ak gibalooli saawa aba humng'eeda ak giidawi saawa deaweedeeda doabiiwaat ea deaweedajeega huumwa, ea digheanyeeka miyaasiin ea digheanyeeka,

¹⁴ nea ginung' ghwanal saawa sabaatoheedaang'u ghaydit nea girukusi saawa digheanyeeka dea deaweeda aba naweeda siidaang'u bea gadiyeeda was Musa.

¹⁵ Ak giidawi saawa mukaateeyda leabu humng'eeda aba jalooda nyaawa nea giidawi saawa beega rinna jeeda lagheaneeda aba muwooshta nyaawa, ak ginung' gaweay saawa jeeda ng'eanyiida jea goombal ghayi iyeaksi habeawooda saawa gideaba gajadawa.

¹⁶ “Nea saawa ea ghweanigaasa ghang'ut ghwarjeeda nea ghoahang'waay iheenga nyaawa ak ea masisiina mureeda diigheanyeekaaschi;

¹⁷ ak ghaheawa gwasissa mureeda, nea moapkaada ng'asheega deamdeameadi ghayi iisini aba bugusta nyaawa; ak ea mararsiina gil ghoahang'waay iheenga nyaawa nea ghwaloat ashoohooda uurji gili jea ghoaghuumda soomjeandumeeda Misri. Ak ang'iing'i guwoosi ASEETA hidaat aba samsiinda, ea dagheerjeanduumeeda ea samsiinda, nea mii wusis nyaras nea mayghwayamwa bariinyeagaaschi, ak ea miigwanung'usa heeda saawa.

¹⁸ Eara damanda sissa geat sanaamu uurji meayda nea gwayi, ‘Nih ASEETEANG'WA gil ghayi aruunaneegwa ng'eanyiida Misri,’ aba damanda ghayi sina ng'asheega hees munyas,

¹⁹ ak ang'iing'i aba dagheerjeanduumeadaang'u haw, mii nung'usiina saawa jeeda dareapcheeda; nea miighang'amwa heeda nyaawa daraneeda shamooghooda adoabiiw saawa aba jeeda naweeda nyaawa askweari, ak eara daraneeda beasta abwaay naweeda nyaawa eawa ea miighang'amwa heanyaawa.

²⁰ Ak giidawi gurooroadaang'u miy ghoanaal saawa, ak ea miweadani maanaheeda jea ghwaak ak giidawi saawa beega aba muwooshta nyaawa.

²¹ Nea giihaaghwi saawa gweanyeew haradam aba dareapcheeda, nea magasa eara gil, nea hang'weaka nyaawa ea miigameewa, ak eara geeshanga nyaawa ea miigoopkeani.

²² Ak ea mabeachi nih giidawi saawa sugoocheanduumeeda ea buuneeda, nea giloadi saawa aba meadajeega sean; hean ghoang'waay hoorgeeda ng'eanyiida sugoocheanduumeeda Sihoni ea dea Heshboni ea ng'eanyiida Ogu was sugoocheanda Bashani.

²³ Nea eara jeata nyaawa ginung' ghoahaada ea gawuurji miinga humng'eeda, nea ginung' gaweay saawa jeeda ng'eanyiida ghayi irukusi ghweaniga nyaawa gideaba gaygaweay jeeda goombal.

²⁴ Hean gaweay jeatida jeeda ak goombal ng'eanyiida, ak gijoari fuga bea ng'eanyiida aba madeanyaawa, nea fuga Ganaani gil, ak giyiini saawa geatinga nyaawa, sea sugoodiga nyaawa ea fuga bea ng'eanyiida, ak gwasima saawa gawuurji gidagasiida.

²⁵ Ak geang'waay mujiineeda sineaweesa ghamarda ea ng'eanyiida mida baruureega, ak goombal gealga nyiit haleanjeeda sean miyaas, ea healatka sighurghur, ea sabiibajeega ea saytuunajeega, ea geediga sean mideawa haghweega; hean geayaak, ak geelang'u ak gwariisha, ak goohoosan geat aba miyindaang'u haw.

²⁶ “Ak ea miigwasineey mureeda nea ghaheawaneey ak gwajaksa deaweedeadaang'u mureeda badahuuka nyaawa, nea ghabwar sibangaagu, ghayi rukwiisa saawa ng'asheega gabiigu saawa headaang'u, ak geesin ng'asheega hees munyas.

²⁷ Ak aba seareani ghoah gidiyiisi saawa geatinda weajoodiga nyaawa, geanung' gwasawana saawa; ak aba damandida bea sawanaduutka nyaawaan, hean gooyeawuseey ak giileeysiit saawa nea gindi humng'eeda; nea aba baydeaydaang'u haw giidawi saawa lealeanooda leabu saawa aba geatinda weajoodiga nyaawa.

²⁸ Iidu nea niihiit fuufta, gwasin ng'asheega munyas gicha aba madeadaang'u, hean ginung'waadi saawa goobiida geatinda weajoodiga nyaawa, amang'ata goombal saawa ak iidu nea gabiigu ak gooyeawuseey hean giileeysiit aba humng'eeda ak giweadi saawa nyaamoana aba baydeaydaang'u.

²⁹ Ak gireekusi saawa aba gideaba gabiiksa saawa deaweedeadaang'u. Hean ghwanaawa nea mooleeysiiniit diigheanyeakaagu, ak goodiiy aba badayda deaweedeadaang'u, nea siida jea ghoang'waay gaygoobiida, ak goodiing'da haluuleeka nyaawa nea ghoahang'waay iheenga nyaawa nea masisiina mureeda.

³⁰ Nea nimilikghti gweanyeeka saang'a aba badaydeaba saawa, ak ea nireekusi saawa aba gurooroadaang'u aba naweeda sibangaagu; ak ea mooleeyseey iit. Ak aba nih ginung' goobissa saawa geatinda fuga eemoojiga suurja.

³¹ Nea aba baydeaydaang'u haw ea mii nung'waada saawa goosha ghana nung'usiina heeda saawa; aba gideaba ang'iing'i guwoosi ASEETA mideawa dagheerjeanduumeeda ea baydeayda.

³² “Asi ghamneawa, ASEETEANYA, aahaw nea gwandeawa uurda nea ASEETA siiwali, dea ang'oonyi neajeeda ea bariinyeega huumwa, gidasimwandi sean aseasa ea sugoodigaasa, ea fugaasa hees, ea ashoohoodigaasa, ea sibangaasa, ea ghweanigaasa, ea fugaagu sean, ghang'eada damanda sugoodiga ng'eanyiida Ashuru ea ghoah ghamneawa ng'asheesu adeenung' ghoah gea manang'i.

³³ Ak ang'iing'i guwoosi doabiiwaat aba badaydeaba ng'asheesu sean sinyaschiin; aba gideaba ang'iing'i gisini gea huumwa, nea aseasa geesinyi gea munyas;

³⁴ Ak sugoodigaasa, ea fugaasa hees, ea ashoohoodigaasa, ea ghweanigaasa, ea mwaang'waanya deaweedeadaang'u nea mooleeysiiniit diigheanyeakaagu ea reekusiindaang'u iidawi saawa.

³⁵ Aba gideaba miigagadiyeeseey aba jeeda sugoocheanduumeenyaawa aba alooheadaang'u haw iidawi saawa, ea ng'eanyiita haw bea baruureega iidawi saawa aba madeanyaawaan; ak ea miighwanung'waada sinooda gadiyoojiga nyaawa munyas.

³⁶ Ng'ula aseasa askweareani geewooschi soomjooga aba ng'eanyiida ghayi iidawi ghweanigaasa gahoosasa nea ghwaak haghweagaaschi ea haleanjeadaanyi miyaas, ng'ula aseasa geewooschi soomjooga.

³⁷ Ak baruureagaaschi gageanda sugoodiga iyiini badahuukaasa riing'eegaasa; ak gwandeawa uurda eara aba sasanuukaasa ea aba dugwaasa aba gidagasiida saawa, ak aseasa geendi jeeda sawanadeeda haw.”

Buuneeda ghwayiin neajeeda giirooraneeda

³⁸ Aba gideaba aba badaydeaba suh seaniin geesinyi neajeeda huumwa, ak geang'waarji, nea fugaasa hees, ea fugaasa bea Lawi, ea ashoohoodigaasa ghwayiin neajeeda nyaawa giirooraneeda.