NEHEMIYA 8 - Bibliyeeda Ghaydit

Esra gwarukusa buuneeda deaweeda

¹ Hean ghabwat geat buuneesean ea gawuurji siyagi aba seamooda mida madeeda beega mida ghuuta dooshta; ng'ata geeyeesha Esra, was ng'oorshoocheanda, gweadu gitaabwajeanda deaweedeeda Musa, ghayi adaw NG'UTAMIIDA fuga Israeli.

² Ak gweadu Esraheeda was ashoohoocheanda diigheanda madeeda fuga bwatgeat, was headiga ea gadeemga ea fuga sean jea ghwayiiy ak ghwanal, nea abeeda ea eaweeda madeeda gil bea sheedeaba ispwa.

³ Hean ghoasoamwa aba madeeda seamooda deascheewa madeeda beega ghang'eada sakteayda ea ghabwarbwara aseeta aba madeeda headiga ea gadeemga ea giika ammu ghwanaliin, ak gooleeysiit buuneesean gitaabooda deaweeda.

⁴ Ak ghamiinaada Esraheeda was ng'oorshoocheanda aba badayda geeta sisin aba gadiyeani; ak ghamiinaada fih suuk aba murdeadaanyi bea geatinda dugwa nea geaba Matatiya gil ea Shema, ea Anaya, ea Uriya ea Hilkiya, ea Maaseya; ak Bedaya, ea Mishaeli, ea Malkiya ea Hashumu ea Hashbadana ea Sakariya, ea Meshulamu ghamiinaada aba geatindaanyi ghaadaam.

⁵ Hean gootin Esra gitaabu aba madeeda buuneesean, aba gideaba gwanda madeeda buuneesean; hean nea gootin ak ghang'eatng'eat buuneesean.

⁶ Ak ghoaghaambiit Esra NG'UTAMIIDA was ASEETA haw; ak ghwasha buuneeda nea gwayi, “Amin, Amin,” nea ghamiinda geatinga nyaawa; nea gabuy iheenga nyaawa ak ghabwat NG'UTAMIIDA nea gakula gheamamuunatka nyaawa ng'eanyi.

⁷ Ak eara Yeshuwa, ea Bani, ea Sherebiya ea Yamini, ea Akubu, ea Shabetayi ea Hodayi, ea Maaseya, ea Gelita, ea Asariya, ea Yosabadi, ea Hanani, ea Belaya, was fuga Lawi, hean ghaweat buuneeda ghwanal deaweeda, ak gaba siisi miinaada aba headaanyi.

⁸ Ak geasoamwa ng'asheega mida jeeda gitaabu, was deaweedeeda ASEETA, nea gang'acha iidiga, nea geerukusa gidawas, ak ghwanal buuneeda gidasisoamwa.

⁹ Nea Nehemiyeeda was sugoocheanda haw, ea Esraheeda was ashoohoocheanda ea ng'oorshoocheanda, ea fuga Lawi ghoanaal buuneeda, nea geeyeesha buuneesean, “Eaweecheanji ea ghaydit aba heeda NG'UTAMIIDA was ASEETEANG'WA; adoogiisanyi nea adooyeawdi.” Aba gideaba fuga sean gooyeawda iisiyiiy ng'asheega deaweeda.

¹⁰ Hean gwayeesha saawa, “Aweayeena heechea aweayeena, ak ghoayaaji gidariishaat nea ghoaleayi difaayeeda inya nea gooyeasi siida mandeawana; aba gideaba eaweecheanji ea ghaydit aba heeda NG'UTAMIIDEANYA; nea adaghang'udeagwa giiseaneega, aba gideaba hooseaneega NG'UTAMIIDA uurdeang'wa gil.”

¹¹ Hean ghwanung' fuga Lawi ghwasiinda buuneesean, nea gwayeesha, “Asiinda aba gideaba eaweecheanji ea ghaydit adoogiisanyi.”

¹² Ng'ata ghang'eat buuneesean gaweay heechea gaweay, ak gweagiischi nea gwaleeshi nea ghoadaw gea mandeawana nea geesin ghweelmeeda haw, aba gideaba siinaal ng'asheega sirukusa saawa.

Ghweelmeeda udahabeaschajeega

¹³ Iimuchu eaweedeaba iyeenya ghapka heeda Esraheeda was ng'oorshoocheanda fuga hees bea gweargwa gealga buuneesean, sea ashoohoodiga ea fuga Lawi, ak ghabwatgeat eanaal ng'asheega deaweeda.

¹⁴ Ak geadaah gideaba geang'waar aba jeeda deaweeda gideaba NG'UTAMIIDA gwarukusa Musa gideaba fuga Israeli deabiidana jeeda udahabeaschajeega ghang'eada ghweelmeeda sheedeaba ispwa,

¹⁵ ak geerukwiida nea geataarda aba jeeda mujiinajeega nyaawa sean ea aba jeeda Yerusalemu, “Aweayeena uhuuda heayeeniga ak gooyeadu damealga saytuunajeega, ea saytuunajeega dareabeeta, ea meaghayga, ea miilayga ea geediga hees jea eesina udahabeaschajeega, gawuurji gida ghayi sing'waarda.”

¹⁶ Hean gwarita buuneeda ak gweadu geediga ak gaba nih ding'da uhuudeaba gheanyi gwadeeksa geaw udahabeascheanda, ea seamoonigaaschi ea seamooniga gheeda ASEETA, ea seamooda mida ghuuta beega mida dooshta ea seamooda mida dooshta Efraimu.

¹⁷ Ea fuga bwatgeat sean leabu giibaleakta gwasin udahabeaschajeega ak goobiida jeesinga udahabeaschajeega; aba gideaba ghang'eada eawoojiga Yeshuwa was orjeeda Nuni ea ghwahita eaweeda fuga Israeli abeeda miyeesindunu. Ak ghoah hooseaneega haw muuchi.

¹⁸ Ak inyeesa galeagasean, ghang'eada eaweeda madeeda ea ghwahita eaweeda huuydean, ghoasoamwa gitaabooda deaweedeeda ASEETA. Nea geesin ghweelmeeda eawooji ispwa; ak eaweedeaba sis ghabwat geat buuneeda gawuurji gida ghayi nyaashta diigheanda.