NEHEMIYA 6 - Bibliyeeda Ghaydit

Geamwaal gichea eesima Nehemiya

¹ Iidu nea geerukusa Sambalati, ea Dobiya ea Geshemu was Arabajeanda, ea weajoodiga suurja gideaba naadeaschi ghamarda, ak ea manda heeda nyaraat abit (nea aba damandida ea miidamiinda gidaghuudajeega aba dooshinga),

² hean goojeagu Sambalati ea Geshemu buuneeda heedeanyu nea geeyi, “Beeni eeroonyeena aba jeeda gharang'agi mida ng'eanyiida awiida bea Ono.” Nea abeeda geegasa eesimanean ng'asheanda muy.

³ Ak geajeaksi saawa buuneeda nea geayeeshi, “Geandeawi gadiyeeda haw maydaamu dahidu dararang'aan. Ghwasaan inyas gayghamiinaada gadiyeeda iyaanung'waadi ak ghaararang'aanyi dahidu heedeang'wa?”

⁴ Ak geerugu ng'asheega uurji suh niba ang'wan ak ghaghaay aba ng'asheega uurji giiga.

⁵ Ng'ata goojeagu Sambalati siidaanyi bea gadiyeeda heedeanyu niba muut, nea gweana geadi barawajeanda miyearat aba geatindaanyi.

⁶ Nea ng'asheega sing'oorsa jeeda ea gideaba, “Iiteaba ng'asheesu nighayda aba jeeda eemoojiga ak eara Geshemu gwarugu ng'asheanji, gideaba ang'iing'i ea fuga Yahudi googasayi ayamwa geat, ak ghoah gida eadeasi ghamarda; nea ang'iing'i gigasayi huwa sugoocheanda nyaawa, nih ginyaashta iidi gil.

⁷ Ak ea niyiini sibanga jea gwarukwiida itaang'u aba Yerusalemu nea gwayeena, ‘Yuda gwanda sugoocheanda.’ Ak ghamneawa gammiisa eerukusa sugoocheanda gawuurji gidanyaashta ng'asheesu. Asi beeni ghamneawa eergweaja duwaawi.”

⁸ Hean geajeaksi niny nea geayeeshi, “Manda miidasin ng'asheega uurji suh inyaashiin suh gea isisi saawa gil aba fughareadaang'u.”

⁹ Aba gideaba suh seaniin goomuuweasa nea gwayi, “Gajeanung' gabur geatinga nyaawa aba gadiyeeda, ak maygagadiiy.” Ak ghamneawa, Ea ASEETA, amajeegiida geatingeasu.

¹⁰ Iidu nea geawi jeeda gheeda Shemaya was orjeeda Delaya, was orjeeda Mehetabeli, ghayi siyaat ghealooniga, ak gwayi, “Eeroonyeesiina jeeda gheeda ASEETA, nea jeeda gheeda sibata ASEETA gil, ak gearachi ghuusiga gheeda sibata ASEETA; aba gideaba gajeapka eabwarnyi, eawa gajeapka eabwarnyi.”

¹¹ Ak geayeenyi, “Heapi siida uurjeewean gaygamng'awi? Ak ea ng'eaha dea uurjeewean jea gawa jeeda gheeda sibata ASEETA ghoaghu eaweagaaschi? Aniini maydawa jeeda.”

¹² Hean geajeeng'u nea ghaadaayi gideaba niny moojeakna ASEETA, ak ghwaramoaranda gidameagasiidani aba gideaba Dobiya ea Sambalati fuga adaw gadiyeeda gil.

¹³ Geataw gadiyeeda aba gideaba ghang'udan muuwda, ak geasindunu ak geasinyi riing'eeda, ak gaygwandeawa saawa iita ak gajeegoonan gheawunga munyas, nea geabeashan.

¹⁴ Ea ASEETEANYU apkaada Dobiya ea Sambalati ea gidaweeda gadiyeeda nyaawa, ak eara No-adia was sibaneeda was gatmooda ea sibanga suurja ghayi gasa goomuuwan.

Muudeanooda gadiyeeda

¹⁵ Iidu geahiit deesta ghamarda nea eaweedeaba diktam ea muut gil bea sheeda muut, nea abeeda geadeas eawooji haradam ea damaniyeenya.

¹⁶ Hean nea ghwayiiy weajoodigaasa sean iidi, hean ghabeal eemoojiga sean neaweeseasa nea gabur iheenga nyaawa muuchi aba madeanyaawa; aba gideaba gwajeeng'u gideaba gadiyeeni ghaweat ASEETEANYA.

¹⁷ Ak eawoojigiga goojeaksa fuga hees bea Yuda barawajeega saang'a heeda Dobiya ak eara barawajeega Dobiya ghapka heanyaawa.

¹⁸ Aba gideaba fuga saang'a bea Yuda gweaksa habeawooda niny, aba gideaba niny siyeeda hudeaba Shekaniya gil was orjeeda Ara: nea orjeeda Yehonani gageena hudeaba Meshulamu was orjeeda Berekiya ghoah gatmoadaanyi.

¹⁹ Ak geerugu ng'asheagaaschi miyaasiin aba madeedeanyu, ak gearukusi ng'asheegeasu niny. Ak goojeaksean Dobiya barawajeega nea gagasa dabeal.