NEHEMIYA 5 - Bibliyeeda Ghaydit

Ghabasta fuga barbari

¹ Hean ghang'eat shookcheanda haw nea buuneeda ea gadeemga nyaawa aba badayda orjooga ghaamwat was fuga Yahudi.

² Aba gideaba gwanda fuga ayi, “Aseasa ea orjoagaasa ea haweagaasa, geawooschi saang'a; anung' eanyasa booga jea eayaaga, ak geepiidi.”

³ Ak gwanda gea ayi, “Siyiinyi madameagaasa raduutka ea sabiibajeagaasa ea gealgaasa, aba gideaba eanyasa booga aba geejeeda.”

⁴ Nea gwayi suuk, “Siilaaji lapiyeeda jea eeruteawana gwaadeeda sugoocheanda nea geayiinyi madameagaasa raduutka.

⁵ Ak sasanuukaasa gawuurji sasanuuka fugaasa siduupcheewi nea diibigaasa gawuurji diibiga nyaawa; ak aba sareani orjoagaasa ea haweagaasa sinung' gaweay soomjeandumeeda, nea haweagaasa ng'ay ea goola ghoah soomjooga; ak ea mwajeamuusa eaweada aba uurjeengaasa, aba gideaba mwaatkwa gwandeawa madameagaasa ea sabiibajeagaasa.”

⁶ Iidu ghaanyareaschi muuchi iyaayiinyi shooka nyaawa ea ng'asheesu.

⁷ Hean geargweaksi geaw, ak geajali sea fuga mida madeeda buuneeda ea fuga hees. Ak geayeeshi saawa, “Googeandi haleanjeeda ahaada aba heeda buuneeda, aba heeda gilinyoo gwaduupchi nuut.” Ak ghaabwadi geat fuga saang'a gang'uchi saawa,

⁸ ak geayeeshi saawa, “Aseasa aba gidasimuusti silealu fugaasa siduupcheewi was fuga Yahudi, ghayi sishaayda aba heeda fuga eemoojiga; ak agooga googasayi ashaayda fugeagwa ooduupcheewi nea googasayi anung' eashaaha aseasa!” Hean geasiinda, nea manda ng'asheanda sirugu.

⁹ Hean geayeenyi, “Ng'asheanji oosinyiin miimiy. Mamiiseegwa gideaba gajayaada geeshta ASEETEANYA, aba rukunooda ng'asheega munyas bea eemoojiga was weajoodigaasa?

¹⁰ Ak aniini ea fuga eaduupcheewi, ea fugeasu bea gadiyeeda geeleaksi saawa lapiya ea booga. Anung'waada haleanjeedida ahaadaan.

¹¹ Ooteelsiina saawa ghamneawa madameega nyaawa, ea sabiibajeega nyaawa, ea madameega nyaawa bea saytuunajeega ea gealga nyaawa, ea lapiyeedida apughalaan, ea booga, ea difaayi, ea nagheeda oogeandeawi heedeaba saawaan.”

¹² Hean geeyi, “Gajeeteelsiina suh ak ea majeegasa gil aba heanyaawa. Gajeesinda gidinyaashti.” Hean geaguursi ashoohoodiga, ak geayeaksi saawa habeawooda, gwasinda gida heeleesiinda.

¹³ Ak ghaalalakti hang'deanyu nea geayeenyi, “Gagasa ghwalalakta ASEETA gili was sih aba gheanyi aba gadiyeeda nyaawa was gea masina heeleesiini. Asi gagasa ealalaktaaydunu ak ea mandeawana gil.” Ak gwayi fuga sean bwat geat, “Amin” ak geakghambiit NG'UTAMIIDA. Ak gwasinda buuneeda gidaheeleata.

Inyeanda jeeda Nehemiya

¹⁴ Ghang'eada damanda ghayi siloadanan deaw sugoocheanda haw hean ng'eanyiida Yuda, ghang'eada gweaydeaba diktam ea ghwahita gweaydeaba diktam ea damaniyeenya bea sugoocheanduumeeda Artashasta, nea gweaydeaba damaniyeenya, aniini ea fugeasu eaduupcheesi miyeeyaaga hamita sugoocheanda haw.

¹⁵ Nea sugoodiga ghayi bea madeeda asheedeawean ghwanung' ghwasar buuneeda sareenyoojiga hees, ak ghoareat saawa hamita ea difaayi, ak ghawaasa murdeeda shiliingaji haradam. Ak eara fuga nyaawa bea gadiyeeda gwasawan buuneeda. Ak ea measini ng'asheesu aba gheawalmeeda ASEETA.

¹⁶ Hean ghaang'waanyi gadiyeedeaba ghamari, ak ea miidasha ng'eanyiida; ak geabwachi geat sea fugeasu sean bea gadiyeeda aba sinita gadiyeeda.

¹⁷ Eara aba badaydeaba suh aba heeda meeseedeanyu gwanda fih haradam ea damanamughuush was fuga Yahudi ea fuga hees, iisiipuut gea ghayi hidu heedeanya leabu heeda fuga eemoojiga neaweeseasa.

¹⁸ Ak gisiitiing'diing'da aba jeemba eaweecheanjagi heawagi gil ea gisil lah miyaas; ak geesinnean gicha nghaghooda, nibwagi aba jeemba eawooji damanamughuush sheargweega difaayajeega sean; nea aba badaydeaba suh seaniin ea miidamus hamita sugoocheanda haw, aba gideaba soomjeandumeeda ea haw muuchi aba badaydeaba fiisu.

¹⁹ Ea ASEETEANYU, Apkaada ng'asheega easinyi miyaas, aba badaydeaba fiisu seaniin.