NEHEMIYA 4 - Bibliyeeda Ghaydit

Nehemiya ghwajoar weajoodigaaschi

¹ Iidu nea ghwayiiy Sabalati gideaba geadeaschi ghamarda, hean ghwanyareas nea gwasawana jeeda muuchi ak gagaja fuga Yahudi.

² Ak gwayeesha aba madeeda fugaaschi duupchi ea lugooda Samariya, “Fiisu bea Yahudi manda uurjeengean gwasin naaha? Gayghwajap hilgweanda? Gaygwasin lukghumeeda? Gajeenung' ghamiinaada lagheanga uurji dulgwajeega ghayi duulu beasta?”

³ Abeeda Dobiya bea eemeeda Amoni ea neekeewa niny, ghwalamda ak gwayeesha, “Huumwa, eara gili ghamneawa sideasiin–inyas gwading'da fureayooda gawa uhuuda gayghwanung' gawa ng'eanyi ghamarda nyaawa bea lagheanga!”

⁴ Aleaydiit, Ea ASEETEANYA, aba gideaba geefooleasa; ak giideelsi machmajeega nyaawa iheenga nyaawa, ak giiruuti nung' eayaat ng'eanyiida giibaleakta.

⁵ Ak ea adifunyi giidiinyeanda nyaawa, nea adigeandi riing'eega nyaawa aba madeadaang'u; aba gideaba niinyareasnyi aba madeeda fuga deekshi.

⁶ Hean geadeaschi ghamarda; ak geeyi bwak ea gwaroonyi ghamarda sean, ak gwaramagu googween iyeenya. Aba gideaba buuneeda gwasin gadiyeeda muuchi.

⁷ Iidu nea ghwayiiy Sambalati ea Dobiya ea fuga Arabu ea fuga Amoni ea Ashdodi gideaba geadeas ghamarda Yerusalemu nea gadiyeeda gawa mwadi nea geedukuta eara seawuutka, hean geenyareas muuchi;

⁸ ak geebalool sean gideaba eapka ng'ucheeda aba Yerusalemu nea geesin ng'ooweata.

⁹ Nea aseasa geamwaashchi ASEETEANYA nea geayiinyi furiischoocheanda eawa ea askweari aba badaydeaba saawa.

¹⁰ Ghwalamda fuga Yuda ak gwayi, “Fuga sareeshi nibur nea gadiyeeda ea gudea haw; ea saang'a mulgweega ghamarda abeeda ak ea mudeamuusa eadeasa ghamarda.”

¹¹ Ak gwayi weajoodigaasa, “Mwajeanala nea mwajeadaaha bwak ea eapkaana bugusta nyaawa ak geabwarji saawa ak ghamiinaada gadiyeeda.”

¹² Hean ghapka fuga Yahudi ascheayi sea saawa ak gwayeeshiineasa niba damanamughuush, “Inyas goobiikni meadajeega sean oondi abeeda gayghapka ghabwareasa.”

¹³ Hean ghaayiinyi buuneeda heeda hiing'aada bea seawadeeda murdeeda ghamarda, was heeda daachi ak ghaanung' goobiitpiit buuneeda nea gaba nih mideayi dea gheanyaawa, sea ng'utkeaka nyaawa, ea ng'utkeaka nyaawa, ea ghuweanga nyaawa.

¹⁴ Ak ghaang'weardi ak ghaang'eachi ak geayeeshi fuga mida madeeda buuneeda ea fuga hees ea buuneeda suurja gea abit, “Adoawali saawa. Oapkaada NG'UTAMIIDA haw, siiwali gheang'da ak goong'uchi aba badayda orjooga giyeang'wa, ea orjoogeagwa, ea haweegeagwa, ea gadeemgeagwa, ea gealgeagwa.”

¹⁵ Inyas ghwayiiy weajoodigaasa gideaba sinyaschi iita, ea gideaba niyaam ASEETA gidagasiida saawa, hean geebiikni sean deekshooda ghamarda ak gaba nih biiksa gadiyeadaanyi.

¹⁶ Ghang'eada damandida, fugeasu bea gadiyeeda, silach bugusta gwasin gadiyeeni, nea gea silach bugusta gicha nibiyeenya ghoang'waay ng'utkeaka, ea igeambooniga, ea ghuweanga ea hang'weaka sirasa daghanuunatka, nea fuga hees ghamiinaada sean aba murdeeda gheeh Yuda,

¹⁷ fugiga deas ghamardean. Ea giika sareeshiin gagatgasa geat sareenda ak gaba siisi gadiiyi aba geatinagi nea geatinda niirja gheang'waanya dabitaanyi bea ng'ucheeda.

¹⁸ Nea fugiga deekshiin gaba nih mideawa ng'utaanyi nea ghoashaash aba damandida deeksheewean. Nea siidida ghuut durumbeatiin abeeda gwanda murdeedeanyu.

¹⁹ Ak geayeeshi fuga mida madeeda buuneeda ea fuga hees, ea buuneeda suurja, “Gadiyeeda aahaw ak aseasa ea sidardi aba uhuuda ghamarda ak gaba siisi sheageewa nuut.

²⁰ Heeda was sean jea ayiinyana ghuuta durumbeati, abeeda ghoapkaanyi heedeanya aba hoowa. ASEETEANYA gaygang'uchi aba meatkweedeanya.”

²¹ Hean geabiidi jeeda, nea fuga silach bugusta nibiyeenya, abeeda ghoang'waay ng'utkeaka, ghang'eada beashata ea goorearu miinga.

²² Ak geayeeshi buuneeda aba damandida, “Daba siisi abiida Yerusalemu sea siidaanyi bea gadiyeeda, ak ghoah furiischoocheandeanya eawa, ak gagadiiy askweari.”

²³ Nea aniini ea fugeasu eaduupcheewi ea fugeasu bea gadiyeeda ea fuga was furiischoodiga eadu geeshteanyu, ea manda aba jeedeanya siida nifwakta hang'weakaaschi, ak gaba siisi ang'waanya geadi dabitaanyi bea ng'ucheeda.