NEHEMIYA 3 - Bibliyeeda Ghaydit

Deesta museasooda Yerusalemu

¹ Hean ghang'eat Eliashibu was ashoohoocheanda haw sea orjooga ghaamwat duupchi was ashoohoodiga ak geadeas dooshta gisilga. Ak geaghaydiit, ak geayiin gidaghuudajeega ak geakghaydiit ea ghwahita madaloodeaba bughala ea ghwahita madalooda Hanaeli.

² Ak iyahiit niny ghwadeas fuga Yeriko. Ama ahiit saawa ghwadeas Sakuri was orjeeda Imri.

³ Ak ghwadeas orjooga Hasena dooshta ghweayeanda; ak geayiin darearjeeka ea gidaghuudajeega ea gharinga sirat amajeek gidaghuudeeni ea gharingaaschi sirata gidaghuudiin.

⁴ Ama ng'ata saawa ghwadeas Meremoti was orjeeda Uriya, orjeeda Hakosi, ng'ata saawa ghwadeas orjeeda Meshulamu was orjeeda Berekiya, was orjeeda Meshesabeli. Ng'ata saawa ghwadeas Sadoki was orjeeda Baana.

⁵ Ng'ata saawa ghwadeas fuga Dekoyi nea fuga nyaawa hees ghaheawa gwasin gadiyeeda NG'UTAMIIDA nyaawa.

⁶ Ak dooshta ghayi bea garayi ghwadeas Yoyada was orjeeda Baseya ea Meshulamu orjeeda Besodeya; ak geayiin darearjeagaaschi nea geayiin gidaghuudajeagaaschi, ea gharinga sirat goomajeek gidaghuuta, ea gharingaaschi sirata gidaghuudiin.

⁷ Ak ng'ata saawa ghwadeas Melatiya was siida eemeeda Gibeoni ea Yadoni bea eemeeda Meronoti, fuga Gibeoni ea Mispa, ghoahaaghwa sugoocheanda haw bea daroorda Giigheawda Eenda.

⁸ Ng'ata saawa ghwadeas Usieli was orjeeda Harhaya, was gearnoocheanda dahaabu; ng'ata niny ghwadeas Hananiya, was siyagi sina geediga ng'andidi, geadeas Yerusalemu ea ghwahita ghamardida bea jaroodean.

⁹ Ng'ata saawa ghwadeas Refaya was orjeeda Huri, ahaaghwa Yerusalemu meatkweenagi agweena iyeenya.

¹⁰ Ng'ata saawa ghwadeas Yedaya was orjeeda Harumafu deascheeda sea gheanyi; ng'ata niny ghwadeas Hatushi was orjeeda Hashabneya.

¹¹ Malkiya orjeeda Harimu ea Hashubu orjeeda Bahati-moabu ghwadeas hichnuut ea madalooda duwayda beasta.

¹² Ng'ata niny ghwadeas Shalumu was orjeeda Haloheshi, ahaaghwa Yerusalemu meatkweenagi niny ea haweagaaschi.

¹³ Hanuni was fuga mida Sanoa ghwadeas dooshta meatkweeda duukusa moangoachi, geadeas ak geayiin gidaghuudajeega, ea gharinga sirat goomajeek gidaghuuta, ea gharingaaschi sirata gidaghuudiin, ak geadeas geatin bughala bea ghamarda, ea ghwahita dooshta raghwata.

¹⁴ Malkiya orjeeda Rekabu, goombal ng'eanyiida Bet-hakeremu, ak ghwadeas dooshta raghwata; ak ghwayiin gidaghuudajeagaaschi, ea gharinga sirat goomajeek gidaghuudeeni ea gharingaaschi sirata gidaghuudiin.

¹⁵ Ak Shalumu was orjeeda Golhose, ahaaghwa ng'eanyiida Mispa, ghwadeas dooshta mida gheang'deenda ak gwadukuta ak ghwayiin gidaghuudajeega, ea gharingaaschi sirat goomajeek gidaghuudiin, ea gharingaaschi sirata gidaghuudiin, ak ghwadeas ghamarda dabascheanda Shiloya mida murdeeda boostaaneeda sugoocheanda, ea ghwahita neaneachajeega rarang'aada leabu mujiineeda Dawdi.

¹⁶ Iing'ata niny ak Nehemiyeeda was orjeeda Asbuki, ahaaghwa ng'eanyiida Bet-suri, meatkweenagi agweena iyeenya, ak ghwadeas meatkweeda gal bung'eadinga Dawdi, ea ghwahita dabascheanda ghayi sisin ea gawa gheeda fuga meanyi.

Fuga Lawi deas ghamarda

¹⁷ Ng'ata niny ghwadeas fuga Lawi: Rehumu orjeeda Bani; ng'ata niny ghwadeas Hashabiya, ahaaghwa ng'eanyiida meatkweenagi agweena iyeenya bea Geila, was ng'eanyiidaanyi.

¹⁸ Ng'ata niny ghwadeas fuga nyaawa duupchi: Bafayi orjeeda Henadadi, ahaaghwa ng'eanyiida meatkweenagi agweena iyeenya bea Geila;

¹⁹ ng'ata niny ghwadeas Eseri was orjeeda Yeshuwa, ahaaghwa Mispa ghwadeas hichnuut duukusa siyeeng'deayda sigal ghooriida dabita ng'ucheeda.

²⁰ Ng'ata niny ghwadeas Baruki, was orjeeda Sabayi hichnuut ghang'eada heeda gwanageaw ghamarda ea ghwahita ghuuta gheeda Eliashibu was ashoohoocheanda haw.

²¹ Ng'ata Meremoti was orjeeda Uriya, ea orjeeda Hakosi ghwadeas hichnuut ghang'eada ghuuta gheeda Eliashibu ea ghwahita muudeanooda gheeda Eliashibu.

Ashoohoodiga deas ghamarda

²² Ng'ata niny ghwadeas ashoohoodiga, ea fuga ng'eanyiida awiida.

²³ Ng'ata saawa ghwadeas Benjamini ea Hashubu heeda duukusa gheanyaawa. Ng'ata saawa ghwadeas Asariya was orjeeda Maaseya, ea orjeeda Ananiya meatkweedeaba gheanyi.

²⁴ Ng'ata niny ghwadeas Binuyi was orjeeda Henadadi hichnuut, ghang'eada gheeh Asariya ea ghwahita heeda ghwanageaw ghamarda ea gawa muudeanooda.

²⁵ Balaali orjeeda Usayi ghwadeas meatkweeda duukusa heeda gwanageaw ghamarda ea madalooda duukusa ghooriida mida heetiyeada bea sugoocheanda ea seamooda furiischoocheanda. Ng'ata niny ghwadeas Bedaya was orjeeda Baroshi

²⁶ ak fuga gadiyeeda gheeda sibata ASEETA abiita ng'eanyiida Ofeli ghwadeas ea ghwahita dooshta beega mida heeda ghayeawa ea madalooda Hodu.

Deekshoodiga suuk

²⁷ Ng'ata niny ghwadeas fuga Dekowa hichnuut duukusa madalooda haw ea ghwahita ghamarda Ofeli.

²⁸ Heetiyeada bea dooshta Faraasi ghwadeas ashoohoodiga, ak gaba nih deaschi gheanyi.

²⁹ Ng'ata saawa ghwadeas Sadoki was orjeeda Imeri heeda duukusa gheanyi. Ng'ata niny ghwadeas Shemaya was orjeeda Shekaniya, was furiischoocheanda dooshta ghayeawa.

³⁰ Ng'ata niny ghwadeas Hananiya was orjeeda Shelemiya ea Hanuni baleandeaba lah bea Salafu ghwadeas hichnuut. Ng'ata niny ghwadeas Meshulamu was orjeeda Berekiya heetuukusa ghushadeadaanyi bea gheeda.

³¹ Ng'ata niny ghwadeas Malkiya, was siyagi was gearnoocheanda lagheanga siguura dahaabu, ea ghwahita gheeda fuga gadiyeeda gheeda sibata ASEETA, duuksiinyi sea fuga ageakshachi duukusa dooshta siida haw ea ghushadeeda ghooriida diyeada bea ghwanooda ghamarda.

³² Ak dageascheeda ghushadeeda gheeda diyeada bea ghwanooda ghamarda ea dooshta gisilga ghwadeas gearnoodiga dahaabu ea fuga ageakshachi.