NEHEMIYA 2 - Bibliyeeda Ghaydit

Nehemiya gawa Yerusalemu

¹ Aba damanda sindeewa Nisani, bea gweaydeaba diktam nea goombal ng'eanyiida sugoocheanda siguura Artashasta, abeeda gwanda madeadaanyi difaayi, hean geageandi difaayi ak ghaadawji sugoocheanda. Ghamneawa aniini ea meandeawani gurmeahiida aba madeadaanyi.

² Ak gwayeeshiinean sugoocheanda, “Ghwasaan anda gheamamdaang'u ning'ut gurmeahiida, nea mimnyaani? Nih naaha gil ghoaghus gurmeahiida guroorooda!” Hean ghaabeali muuchi.

³ Ak geayeeshi sugoocheanda, “Gagasa ghwanyas sugoocheanda eaweega manda muudeanooda! Gheamamdeanyu mayghang'ut gurmeahiida aba naaha, nea mujiini, heeda was bung'eadinga ghweanigeasu gaba salgheang'da, nea dooshinga ea niduulu beasta?”

⁴ Hean gwayeeshiinean sugoocheanda, “Ak gigasayi musa naaha?” Hean ghaamwaashchi ASEETA humng'eeda.

⁵ Ak geayeeshi sugoocheanda, “Iidaah sugoocheanda gideaba ghwahit, ak ghwanyas siidaang'u bea gadiyeeda baydeayda aba madeadaang'u abeeda giijeaktanean ea dawa ng'eanyiida Yuda, mujiineeda bung'eadinga ghweanigeasu, ak abeeda ghaadeaschi.”

⁶ Ak gwayeeshiinean sugoocheanda (nea goopteada gatmoadaanyi aba murdeadaanyi), “Gayruuda eawooji hada, ak gaybiikni eeju?” Hean ghwadaah sugoocheanda gideaba ghwahit goojeaktanean; ak gearukusi niny damanda.

⁷ Ak geayeeshi sugoocheanda, “Iidaah sugoocheanda gideaba ghwahit, abeeda dagu barawajeega daat heeda sugoodiga hees mida daroorda Giigheawda Eenda, gideaba eesiksean ea dawa ng'eanyiida Yuda;

⁸ ea barawajeanda jea deasa Asafu, was furiischoocheanda dimda sugoocheanda, ak gagoonan geeta jea dasina darearjeeka bea dooshinga hoorgajeega gheeda sibata ASEETA, ea ghamarda mujiini, ea gheeda jea deabiida.” Ak gagoonan sugoocheanda gideamuschi; aba geatinda miy bea ASEETEANYU mida badaydeanyu.

⁹ Hean ghaahidu heeda sugoodiga hees bea darooraka mida dirbeayda Eenda Furati, ak ghaadawji saawa barawajeega sugoocheanda. Ak ghwanung' sugoocheanda dawa nea geadeayeewi fuga hees bea lugooda ea fuga ding'da faraasajeega.

¹⁰ Iidu nea ghwayiiy ng'asheanji Sambalati was siida eemeeda Horoni ea Dobiya was siida gadiyeeda, bea eemeeda Amoni, hean ghang'ut saawa gurmeahiida muuchi aba gideaba nihidu siida jea gwasissa gidamiy diibiga Israeli.

¹¹ Ng'ata geawi Yerusalemu ak geabiidi hoowa eawooji samwagu.

¹² Hean ghaang'eachi eawa, sea fiisu ng'ay sea aniini; ak ea mearukusiini sih ng'asheanji iin ASEETEANYU jeedeanyu jea dasin aba badayda Yerusalemuun. Ak ea meandeawani diyeayda was sean geaghus diyeaydida eandi badaydean.

¹³ Ak geariti jarooda eawa nea geasikchi dooshta gal moangoachi, ak ghaayaachi naweeda weah healadeeda ichibooda ea dahita dooshta raghwata, ak geasawsi ghamarda Yerusalemu gisinyarjeawda ea dooshinga gida niduuldeayda beasta.

¹⁴ Hean geawi ea dahita dooshta gheang'deenda ak geawi ea dahita dabascheanda sugoocheanda; ak ea manda heeda jea gwasik diyeayda eandi badayda.

¹⁵ Hean geawi eawa nea ghaascheang'daawi naweeda moangoachi ak geasawsi ghamarda; ak geabiikti bwadaw ak geawi gah nea geasikchi naweeda dooshta gal moangoachi, ak geabiikti.

¹⁶ Ak fuga hees ea mwanala heeda eawi ghana gideasinyi; nea miidarukusa eara fuga Yahudi, ghana ashoohoodiga, ghana fuga hees, ghana fuga ghayi sin gadiyeeda.

¹⁷ Hean geayeeshi saawa, “Ghoadaayi sawanadeeda sindeawi, Yerusalemu gidabiideata nea gaba salgheang'da nea dooshingaaschi ea niduulu beasta. Apkaani eadeasa ghamarda Yerusalemu, aba gideaba adeapwaaspwaaseasa.”

¹⁸ Ak gearukusi saawa gidamiiyda geatinda ASEETEANYU aba gidanisinnean ea ng'asheega rukunean sugoocheanda. Ak ng'ata geeyi, “Asi eang'eatng'eada ak geadeaschi.” Hean geemajeek geatinga nyaawa aba gadiyeeda miy.

¹⁹ Hean nea ghwayiiy Sambalati was siida eemeeda Horoni ea Dobiya was siida gadiyeeda bea eemeeda Amoni, ea Geshemu was Arabajeanda gabareeweasa reari nea gafooleasa nea gwayi, “Nih ana ng'ashaan gil oosinyiin? Gajaheawana sugoocheanda?”

²⁰ Hean ghaashaayi ghuusiga nyaawa nea geayeeshi, “Gayghaweadeasa ASEETA mida humng'eeda, ak aseasa geawooschi fugaaschi bea gadiyeeda, gajeang'eada ak geadeaschi; ak agooga ea mabeaheegwa gil, ghana gitoobiiwseegwa, ghana ng'asheega siitiiw bea giipkeata aba Yerusalemu.”