NEHEMIYA 13 - Bibliyeeda Ghaydit

Fuga Israeli gooheeli geat eemoojiga

¹ Eaweedida geasoamwa gitaabooda Musa nea ghwayiiy buuneeda; ak aba jeedida geang'waar gideaba siida Amoni ghana siida Moabu maygawa jeeda fuga bwatgeat bea ASEETA;

² aba gideaba mwoatawi fuga Israeli mukaate ea beega, hean geataw Balaamu lapiya aba badaydeaba saawa gideaba ghamwaashta saawa; ng'ata ghwayam ASEETEANYA mooshteayda ghoah ghawooda.

³ Iidu nea ghwayiiy buuneeda deaweeda, geanung' gooheeli geat fuga sean bea Israeli ea rabasta mida jeenyaawa.

Nehemiya ghwayam geaw

⁴ Heeda miighwahina suh, Eliashibuheeda was ashoohoocheanda, ghayi siloat gang'ula ghushuutka gheeda ASEETEANYA, abeeda ea neekeewa Dobiya,

⁵ abeeda ghayi nideeksa Dobiya ghushadeeda haw ghayi siyiin booga sisaba geadi bea ghadooweeda, ea haleanjeeda sisapa geadi siing'andiita, ea dabita, ea gilagi aba jeeda gilatamanamughuush bea booga, ea difaayi, ea nagheeda, ghayi sirugu gideaba gajeataw fuga Lawi, ea fuga sarmani, ea furiischoodiga dooshta, ea gea jea eataw ashoohoodiga.

⁶ Nea aba damani seaniin aniini ea meandani Yerusalemu, aba gideaba gweaydeaba diktam ea damaniyeenya bea Artashasta was sugoocheanda Babeli hean geaweesi sugoocheanda. Ama ng'ata eawoojisu ng'ay hean geamuschi sugoocheanda beata

⁷ ak ghaahidu Yerusalemu, ak ghaanali ng'asheegiga munyasiin ghayi sin Eliashibu aba badayda Dobiya, ak gwasissa ghushadeeda aba jeeda gheeda ASEETA.

⁸ Ak ghaanyareaschi muuchi, hean geajaksi jarooda dabita sean bea Dobiya, gwariteawa jeedeaba ghushadeeni.

⁹ Hean ghaanung' eepuus ghushuutka; ak ghaadealdi gah dabita gheeda ASEETA, ea booga sisabwa geadi bea ghadooweeda, ea haleanjeeda sisapa geadi siing'andiita.

¹⁰ Ak ghaadaayi gideaba eara fuga Lawi miyeataw gida duukusa saawa; hean fuga Lawi ea fuga sarmani, ghayi sin gadiyeeda, gaba nih fwach gawa madamnyeandaanyi.

¹¹ Hean geajaluudayeewi fuga hees nea geayeeshi, “Ghwasaan anda gheeda ASEETA geenung'usa heeda?” Ak ghaabwadi geat saawa, ak ghaanung' gaba nih biikta hoorgeadaanyi.

¹² Hean gweadu fuga sean bea Yuda gilagi aba jeeda gilatamanamughuush bea booga, ea difaayi, ea nagheeda jeeda heeda siitiiwshacheewa.

¹³ Ak ghayiinyi fuga adiiwshachi jea gang'ula heeda siitiiwshacheewa, nea Shelemiya gil was ashoohoocheanda, ea Sadoki, was ng'oorshoocheanda, ea Bedaya was siida Lawi, ak weedaneeda nyaawa ea Hanani gil was orjeeda Sakuri, ea orjeeda Mataniya, aba gideaba suh ea doobiiweadi; ak ea gadiyeeda nyaawa gil gideaba gwalakiisa fuga nyaawa duupchi.

¹⁴ Apkaadan, Ea ASEETEANYU, aba badaydeaba suh, ak ea adiibuusi ng'asheega miyaasiin ghayi easinyi aba gheeda ASEETEANYU ea aba gadiyeadaanyi.

¹⁵ Eawoojigiga ghaadaayi fuga Yuda muura difaayi eaweeda sabaato, nea suuk ghwasar muschoonga booga ak goodiing'sa badahuuka digeeniga nyaawa; ak eara difaayi, ea sabiibajeega, ea saytuunajeega, ea gilinyoo ea sareenda gil, siyeadu Yerusalemu eaweeda sabaato; ak gearukusi saawa gideaba eaweeda sabaato mwadoabiiwa giileakshooda hamita.

¹⁶ Eara fuga Diro abiita jeeda mujiini, gweadu ghweayeega ea gilinyoo ea haleanjeeda sean gil bea giileakshooda, ak ghwashaayda aba heeda nyaawa eaweeda sabaato aba heeda fuga Yuda, ea aba Yerusalemu.

¹⁷ Hean geawoowsi fuga hees bea Yuda nea geayeeshi saawa, “Nih ng'asheanda muy uurjiin gil oosinyiin, ak ghoang'udi ririnnyeanda eaweeda sabaato?”

¹⁸ Heapi nih mii gidaghayi sinda ghweanigeagwa aba naweani, ak ASEETEANYA ea mii gweadu ng'asheega munyas sean badaydeanya ea badaydeaba mujiineani? Ak eara gwasa ghoahaachi nyarasta aba badayda fuga Israeli aba gideaba ghoang'udi ririnnyeanda sabaato.”

¹⁹ Iidu nea nihidu misaneeda aba dooshinga Yerusalemu, nea mii ghwahidu sabaato, ak ghaanung' earat gidaghuudajeega nea gearukuti gideaba adeetin ea ghang'ata sabaato. Ak ghayiinyi fiisu ng'ay bea jeeda fugeasu bea gadiyeeda gafur dooshinga, aba gideaba adeeyeadu giliwas sareenda eaweeda sabaato.

²⁰ Hean fuga ageakshachi ea gea shaah haleanjeeda sean siikghaas gwalla jarooda aba Yerusalemu nibwagi ghana nibiyeenya.

²¹ Ak geawoowsi saawa nea geayeeshi, “Ghwasaan anda goolilli aba madeeda ghamarda? Inyas goobiikti gicha gaydaang'waanyeagwa.” Ghang'eada damandida ea mudeapka eaweeda sabaato.

²² Ak gearukusi fuga Lawi gideaba ghoamiidu geat ak ghapka gafur dooshinga, nea ghoaghaydiit eaweeda sabaato. Apkaada eara nih aba jeeda alooheedeanyu, Ea ASEETEANYU, ak gisiksean aba seang'ayda bariinyeagaagu.

²³ Aba jeedeaba eawoojigiga ghaadaayi fuga Israeli nea ghaghi gadeemga eemeeda Ashdodi, ea Amoni, ea Moabu;

²⁴ ea diibiga nyaawa silach bugusta baloola iita Ashdodi, nea meebaloolana iita fuga Yuda, gabaloola iita eemoojiga sean.

²⁵ Ak geawoowsi saawa nea ghaamwaashti saawa nea ghaabwarji mwaatkwa ea dalootiida buudeega nyaawa; nea ghaanung' ghwaak habeawooda aba gheawunga ASEETA nea geayeeshi, “Adoatawji haweegeagwa orjooga nyaawa, ghana gideaba gaygageena orjoogeagwa haweega nyaawa, ghana agoogeesean.

²⁶ Neada Sulemani was sugoocheanda Israeli ea mii gwasin riing'eeda aba badayda gadeemga. Aba jeeda eemoojiga saang'a manda sugoocheanda uurji niny, ak ASEATAANYI ghabwariiy niny ak ghwanung' ASEETA goombal niny fuga Israeli sean; ak geabwada nih ghwanung' gadeemga rabasta gwasin niny riing'eeda.

²⁷ Asi gajeeleeyseegwa iit aba sinoodeaba ng'asheesu sean hees munyasiin oosisi ASEETEANYA aba gheenda gadeemga rabasta?”

²⁸ Ak orjeanagi bea jeeda orjooga Yodaya, ea orjeeda Eliashibu was ashoohoocheanda haw, nea abeeda ea orjeeda agweaji Sambalati gil was siida Horoni; hean ghaahoani niny heedeanyu.

²⁹ Apkaada saawa, Ea ASEETEANYU aba gideaba ning'uda ririnnyeanda ashoohoocheanduumeeda ea neajeeda ashoohoocheanduumeeda ea fuga Lawi.

³⁰ Ng'ata ghaamiidu saawa ea haleanjeeda sean bea rabasta ak ghaanung' gaba nih ang'waay galandaanyi ashoohoodiga ea fuga Lawi, ak gaba nih bea gadiyeadaanyi;

³¹ ea haleanjeeda sisabwa geadi bea ghweenga, aba damanda sirukuna, ea haghweega madeeda. Apkaadaan, ea ASEETEANYU, aba ng'asheega miyaas.