MIKA 4 - Bibliyeeda Ghaydit

NG'UTAMIIDA gaygoombal ng'eanyiisean aba hoyyoo

¹ Ak eaweeda huuydeanda giijeeda gheeda NG'UTAMIIDA gajeemajeek aba uhuuda giijeega, ak gajeetiing'da uhuuda heayeeniga; ak gayghwaat geeshtaanyi buuneeda,

² ak gayghapka eemoojiga saang'a, ak gwayi, “Apkaani eascheang'da eeweaya uhuuda giijeeda NG'UTAMIIDA, ea gheeda ASEETA Yakobo; ak gayghoanaaleasa naweadingaaschi ak gajeeweelweelana jeeda naweadingaaschi.” Aba gideaba aba Sayuni gaygwarina deaweeda, ea ng'asheanda NG'UTAMIIDA leabu Yerusalemu.

³ Ak gaygoorgweaksa fuga saang'a, nea goowoowsa eemoojiga sheagachi mideawa uurjeenga; ak gajeayam ng'utkeaka nyaawa ghoah mageemboojiga, nea ghwayam ng'utkeaka nyaawa ghoah bargweaka; ak ea manda eemoocheanda jea goong'ooysa eemoochean nuut ng'utaanyi, nea mayghoanaal geat ng'ucheeda earahay;

⁴ nea gaygaba siisi apteada aba guumda sabiiboadaanyi ea guumda shaboogheecheandaanyi, ak ea manda siida jea goomuuw saawa; aba gideaba nih ginyah NG'UTAMIIDA bea lugweega.

⁵ Aba gideaba buuneesean gaygaba nih weah aba gheawunga aseataanyi, aseasa gajeeweaya aba gheawunga NG'UTAMIIDA was ASEETEANYA damanda manda muudeanooda.

Fuga Israeli gaygabiikna soomjeanduumeeda

⁶ Eaweedida gwayi NG'UTAMIIDA, gaydaawaam gea badoojiga nea ghaabwadi geat gea ghayi sihoan, ea gea ghayi easawanyi;

⁷ nea gea badoojiga gaydanung' ghoah gheaptanga; nea gea sijakta ghoah eemeeda mideawa uurda; ak goombal NG'UTAMIIDA saawa aba giijeeda Sayuni ghang'eada ghamneawa ea ghoah damanda manda muudeanooda.

⁸ Ak ang'iing'i, Ea gheeda geaw sideeksa uhuumba nuut bea hawanda, Heayeeda huda Sayuni, gajeapka headaang'u, gayghwahidu dea ambaliischi bea madeeda, sugoocheanduumeeda huda Yerusalemu.

⁹ Ghamneawa ghwasaan anda giijuuri aba ghuuta haw? mindeawani sugoocheanda? Neada deebaneadaang'u ea niroat, ea ghoang'waanyi lajooda gawuurji dea gatmooda aba damanda jeata?

¹⁰ Nyasa lajooda ea sawanadeeda, Ea hudeaba Sayuni, gawuurji gatmooda mida jeeda lajooda; ak ghamneawa gayriteawana jeeda mujiini ak guwi abiidana ng'eanyiida bwara; gajuna ea hita Babeli. Aba hooweani gajeelealneey, aba hooweani gaygootinaneey NG'UTAMIIDA geatinda weajoodigaagu.

¹¹ Ak ghamneawa eemoojiga saang'a ea nibwat geat aba badaydaang'u, nea gwayi, “Gagasa eang'udana ririnnyeanda, ak ghwadaah gheanyangaasa eemeega Sayuni.”

¹² Nea saawa ea mwanala gida ateemsheata NG'UTAMIIDA, nea meanala eara gidagasa gwasin, aba gideaba niimughuushta saawa muschoonga aba ng'eanyi.

¹³ Ng'eada ak gilaji booga, Ea huda Sayuni, aba gideaba gaydanung' ghoah gujaweadaang'u gharinyeanda nea baneaktaang'u ghoah lagheanga oomng'i; ak gaybwara fuga saang'a ea ghoah hayaganga, ak meanang'oocheanduumeeda nyaawa gajadawa NG'UTAMIIDA, nea haleanjeeda nyaawa sean gaba NG'UTAMIIDA bea ng'eanyiisean.