MIKA 3 - Bibliyeeda Ghaydit

Mika goowoowsa fuga hees bea Israeli

¹ Ak geayeenyi: Oaleaydiit, fuga hees bea Yakobo ea fuga ambaliischi bea gheeh Israeli! Mamiiseegwa gideaba gajanala doobiiwnata?–

² Agoogeeda inyeesa ghoasichi gea miyaasiin ak ghoabwariinyi gea munyas, agoogeeda inyeesa ghoajeanyi mughoowooda fugeasu, ea banyeega gwaheeli geaka nyaawa;

³ agoogeeda inyeesa ghoayaaji banyeega fugeasu, nea ghoajeanyi mughooka nyaawa, nea ghoalajaadi geaka nyaawa, gawuurji gea jea eawu, nea gawuurji gea mida jeeda dahuuda

⁴ Hean gajeeyeawusa NG'UTAMIIDA, ak ea mayghwasha ghuusiga nyaawa; nea aba damandida gayghafuy gheamamdaanyi, aba badayda ng'asheega nyaawa munyas sin.

⁵ Ak gwayi NG'UTAMIIDA aba badahuuka sibanga nung' goodiiy fugeasu, ayeawda nea gagasa “Hoyyoo” iinyo gwandeawa gichea ghwaak, nea siida was sean mwayiina ghuusiga nyaawa gil abeeda gaygang'uchi.

⁶ Asi gayghoah eawa aba heedeang'wa, ak ea majeehiimneegwa gil, ak gaygamisaniit aba heedeang'wa, ak ea mwajaramooranna. Ak gaygamikteaysa sibanga nea askweari, ak eaweedida gaygamisaniit aba badayda nyaawa;

⁷ ak fuga deaha ng'asheega gaygwahirbaban, nea fuga bara lagheanga gaygabaspasi; ak gaygwadukuta sean ghuusiga nyaawa, aba gideaba ASEETA mayghwasha gil.

⁸ Nea aba aniini ea naanyaschi uurda Guroorooda NG'UTAMIIDA, mideawa doobiiwnata ea giimuusta, jea darukusiina Yakobo giidiinyeandaanyi ea ghoah riing'eeda Israeli.

⁹ Ayiinya ng'asheesu, agooga fuga hees bea gheeh Yakobo ea fuga ambaliischi bea gheeh Israeli, agoogeeda eaheawi doobiiwnatean nea ghoaschoardi gea miyaasiin sean,

¹⁰ agoogeeda oadeaschi Sayuni aba foojeanda ea Yerusalemu aba ng'asheega munyas.

¹¹ Fugaaschi hees gwasin girgweageeda aba gideaba ghwanyas seawshooda, ashoohoodigaaschi goonealshi aba gideaba ghwanyas gidageatinda, nea sibangaaschi gwaramooran ghwanyas lapiya; ak eara aba sareani gayghaghus NG'UTAMIIDA nea geeyi, “Neada NG'UTAMIIDA ea manda bugusteanya? Manda gidamuy jea gwahisseasa.”

¹² Asi aba badahuukeagwa Sayuni gajeabwarda gisibariida madamnyeanda; nea Yerusalemu gayghoah eemeega, ak giijeeda gheeda gaygawuurji gudung'unyeanda aba dareabeeta.