MIKA 2 - Bibliyeeda Ghaydit

Ghoorjooda fuga ghabwas gea barbari

¹ Dashageada fuga sina ng'asheega munyas nea gwasina gea munyas aba badahuuka bulaleenga nyaawa! Inyeesa iimuchu nea gaweeshiit, hean gwasin, aba gideaba gwandeawa uurda sinooda aba geatinga nyaawa.

² Inyeesa gwashissa ghaang' madameega, ak ghoang'waay; ea gealga, ak gageanda; inyeesa ghaghabwas siida ea gheanyi, siida ea hearaniischoadaanyi.

³ Asi gwayi NG'UTAMIIDA: Ng'ula, gaydasin ng'asheanda muy aba badahuukeaba fiisu, heeda mwajasaja eara gheatkweakeagwa; nea majaweelweela aba ghwarjeeda, aba gideaba gajea damanda muy.

⁴ Askweardida gajeang'at salaneeda shatooda aba badahuukeagwa, nea geegutu heareega ng'weani nea gwayi, “Aseasa siireadeasa; ak geayam hoorgeeda fugeasu; gidageandeayda aba heedeanyu! Gwalakiisa fuga ang'waanyeasa madameagaasa.”

⁵ Asi maygwanda siida jea gwajakta ghealooda aba loota aba jeeda fuga bwat geat bea NG'UTAMIIDA.

⁶ “Adoorukwiidi ng'asheega”–saawa gwarukwiida– “manda siida jea gwarukwiida ng'asheesu; ak ea mwahineasa baspaseega.”

⁷ Heapi gajeergu ng'asheanji, Ea gheeh Yakobo? Neada Guroorooda NG'UTAMIIDA mudughoamu ghamilikghta? Suh ng'asheagaaschi sinea? Neada suh ea mii ng'asheegeasu miyaasiin hit aba ninyeeda weah nea ghwadoabiiwi?

⁸ Ak ea noang'eachi nea goowuurjeewi weajoocheanda fugeasu inyeesa googeandi hang'da mida badayda hang'weaka fuga ng'ata nea gaba hoyyoo uurji fuga magasa ng'ucheeda.

⁹ Gadeemga fugeasu inyas goohoosi jarooda eang'waamwana gealga nyaawa miyaas; nea diibiga nyaawa manang'i ghoareachi giigheambiiteanyu damanda manda muudeanooda.

¹⁰ Ang'eatng'eada aweayeena, aba gideaba hiji mii heeda jea afuufana; gajooshealana aba ririnnyeanda aba giishealda haw muuchi.

¹¹ Siida iiwea heeda guroorooda ng'uyeega ak gwarugu ng'asheega ng'uyeega, nea gwayi, “Gaydarukuneey iita difaayi ea difaayeeda heeseadi,” abeeda gayghoah siida jea gwarukwiida ng'asheega aba heedeaba fiisu!

¹² Gaydaamughuusheagwa oagasean, Ea Yakobo, gaydaamughuush gheaptanga Israeli; gaydeaweamsa saawa hijagi gawuurji gisilga mida muhealeeda, nea gawuurji hawanda gisilga mida haghweeda, gayghwalach booga aba seang'ayda buuneeda.

¹³ Dea jea ghwajaat naweeda gaygwadiyeada gawa madeanyaawa; gajeenyarja ak geeweay eesik ghuuta dooshta, ak geeweay jarooda. Ak ghang'ata sugoocheanda nyaawa nea gwanda madeanyaawa, NG'UTAMIIDA nyaawa gwanda mwadi.