Mattayo 9 - Bibliyeeda Ghaydit

Yesu ghoahaap siida abitu damealga

¹ Gwading'da maleambooda ak ghoaghaawa basooda ak ghwahita mujiineeda nyaawa.

² Hean geeyeassa siida abitu damealga nea geeyeana badayda bulaliida, hean dea Yesu masaweega nyaawa, gwayeesha siidida abitu damealgean, “Nung' gahoosan gurooroadaang'u Orjeedeanyu; sisamsa riing'eagaagu.”

³ Hean gwayi ng'oorshoodiga mwaatkwa aba jeesinga nyaawa, “Siisi goong'eawi ASEETA.”

⁴ Gwajeeng'u Yesu gidabaloolda saawa aba jeesinga nyaawa, ak gwayeesha, “Ghwasaan anda goobalooli ng'asheega munyas aba jeesingeagwa?

⁵ Ea wusis aneeda gideaba geeyi, ‘Sisamseey riing'eagaagu,’ ghana eeyi, ‘Ng'eada ak guwi?’

⁶ Geagasayi anala gideaba, Orjeeda Siida gwandeawa gheambalmeeda aba badayda ng'eanyiida jea gwasamsiina riing'eega”; ak gwayeesha siidida abitu damealgean, “Ng'eada, sareana muundaang'u ak guwi ghoah.”

⁷ Ghang'eat siidida ak gawa gheanyi.

⁸ Daah eemeeda siidida ghang'ut muuwda ak ghoaghaambiit ASEETA ghayi adaw buuneeda gheambalmeeda sunuun.

Yesu gaguursa Matayo

⁹ Damanda ng'ataawa Yesu aba hoowa ghwadaah siisi siguura Matayo nea gwanda jeeda ghooriida siing'oonya gwaadi; gwayeesha, “Eani geeshteanyu.” Ghang'eat ak ghwaat geeshta.

¹⁰ Iidu nea goopteada aba ghoah damanda agiischooda, deagheata ghwahidu fuga saang'a ang'oonyi gwaadi, ea fuga riing'eega ama hidu goobiitpiit sea Yesu ea giinealshoodigaaschi.

¹¹ Daah Farisaayajeega, gwayeesha giinealangaaschi, “Anda giinealshoocheandeang'wa goombuuchi fuga ang'oonyi gwaadi ea fuga riing'eega?”

¹² Iiy niny gwayeesha, “Fuga majeekcheewi magaseadayi meang'nyeanda, geaghus fuga miyeani.

¹³ Asi aweayeena ak ghoanaali geat ng'asheesu, ‘Geagasayi baydeayda nea mii haleanjeeda sisapa geadi bea ghadooweeda.’ Aba gideaba mwaawuni daguursa fuga doobiiweadi, ghaawunyi daguursa gea mideawa riing'eega.”

Iita giiluuldeaydeaba geaw

¹⁴ Hean gaweay heeda Yesu giinealanga Yohana ak gwayeesha, “Ghwasaan anda aseasa ea Farisaayajeega geeluuldi geat, nea giinealangaagu ea mooluulda geat?”

¹⁵ Ghwasha Yesu nea gwayeesha, “Fuga siguursa nyeangiida ghoamu gagutu heareega nea gwandeawa siida geeshi? Gwanda askwearjoojiga jea ghwahidu jea eegeandeawa siida geeshi jeenyaawa, aba damani gaygooluulda geat.

¹⁶ Manda siida jea ghawaasa weasteesh hang'da waas. Aba gideaba weasteesh gayghabwaash hang'dida waasiin ak abeeda gayghoahaada seawadeeda.

¹⁷ Eara buuneeda mayiina difaayeeda miighwaheas jeeda ghadeatka woosi; iisihindunu gaygwanyara ghadeatka, ak gaweay difaayeeda, ak gameewa ghadeatka; buuneeda gwayiina difaayeeda miighwaheas jeeda ghadeatka eashish ak gabaseayu sean.”

Huda siida haw ea Gatmooni waas weeleeda Yesu

¹⁸ Damandida rukuna ng'asheesuun, ghwahidu siisi haw bea eemeeda Yahudi ak gwatkuy aba madeadaanyi ak gwayeesha, “Nimi hudeanyu ghamneawa. Beeni eeweaya iina geatindaang'u uhuudaanyi ak gaygwaduudu.”

¹⁹ Ghang'eat Yesu ea giinealangaaschi ak ghwaat geeshta.

²⁰ Ng'ata ghwaan Gatmoanagi beardooschi miyeanda areemi foojeanda gweanyeew damaniyeenya gweadu geeshta ak ghawaasa weeleeda hang'daanyi;

²¹ aba gideaba gwayi aba jeadaanyi, “Iyaawaaschi weeleeda hang'daanyi gaydaahaap.”

²² Ghwasach ghaat Yesu ak ghwadaah ak gwayeesha, “Hudeanyu hoosana, niihaapnyi masaweega iimwaschaan.” Ghahaap gatmoodida aba damandida.

²³ Ng'ata gawa Yesu jeedeaba gheedida bea sugoocheandean. Hean ghwadaah eemeeda saang'a mida gea ayeawda nea gagutu heareega,

²⁴ gwayeesha, “Ang'amwana hiji, aba gideaba huda miighami gabeachi ruweanga.” Geebara reari.

²⁵ Iidu nea siing'aamwa buuneeda hoowa, gawa Yesu jeeda ghooriida ak ghoang'waay geatinda huda ama ng'ata ghang'eat.

²⁶ Gageawiit iiteaba ng'asheanji aba jeedeaba ng'eanyiita seaniin.

Yesu ghoahaap fih iyeenya ng'oowi

²⁷ Ghabeawa Yesu hoowa nea damandida beawaan, ghwaat geeshta fih iyeenya ng'oowi, nea goojuur nea gwayeesha, “Orjeeda Dawdi eaniyean bwaydaneasa.”

²⁸ Weah Yesu jeeda gheeda gamaseaw fugiga asiyeenya ng'oowiin ak ghoanyaash gideaba, “Ghoamwaschi gideaba ghaamuuschi daahaabeagwa?” Ghwasha saawa nea gwayeesha, “Geamwaschi Ng'utamiida.”

²⁹ Hean ghawaas gheanyanga nyaawa nea gwayeesha, “Aba giteena masaweegeagwa gagasa anyasa.”

³⁰ Ghwajaada gheanyanga nyaawa. Ama ng'ata gwareekusa Yesu nea ghoang'waaniit, nea gwayeesha, “Adiidu goorukusi eara sih ng'asheanji.”

³¹ Ghang'eatng'eat Saawa gaweay ak ghoabwaash iita Yesu fugeaba ng'eanyiita seaniin.

Yesu ghoahaap siida manda ghuuta

³² Ak gwayeesha, Aweayeena Hean gwariteaysa ak gaweay jeeda ukurmajeega.

³³ Hean siiruuta meangeenda gabalool siidida. Ghaham ng'eanyi eemeeda nea gwayi, “Ng'asheanda sunu miyeadaaha aba jeeda ng'eanyiida Israeli.”

³⁴ Nea Farisaayajeega saawa gwayeena, “Gooruuta meangeenda aba uurda dea haweewa meangeenda.”

Yesu ghabwayda buuneeda

³⁵ Gwaneayeewa Yesu jeeda mujiinajeega sean ea gharang'weaka nea goonealshi aba jeesinga ghoorajeega nyaawa siinealshacheewa ikaanyaawa nea gwarukwiida Giijasta miy bea sugoocheanduumeeda, nea ghoahaap geeyoonung'weaka sean ea gili nyooh ea sawanadeeda.

³⁶ Hean dea eemeetuw nea gabadageat ghabwayda aba jeadaanyi aba gideaba ghwadaah gwateemban gawuurji gisilga nyaah jeagiischoochean.

³⁷ Ghwalamda ak gwayeesha giinealangaaschi, “Booga aasaang'a, ak eang'ay fuga gadiyeeda;

³⁸ asi amoasha Ng'utamiida bea booga goojeagu fuga gadiyeeda ghapka ghwalach boagaaschi.”