Mattayo 8 - Bibliyeeda Ghaydit

Yesu ghoahaap siida

¹ Iidu nea ghwararang'aana giijeeda, ghwaat geeshta eemeetuw;

² hean ghwahidu siida bearji udamusuura ak gwatkuy aba madeadaanyi ak gwayeesha, “Ng'utamiida iigasayi giimuusi amiinaan.”

³ Ghoahaakta geadi ak ghawaasa nea gwayeesha, “Geagasayi; miini.” Deagheata ghahaabwa udamusuura.

⁴ Gwayeesha Yeesu niny, “Daaha, adiidu girukusi sih gil; ng'eada una, ak giihiimsi geaw ashoohoocheanda, ak giidaydi haleanjeeda sisapa geadi bea ghadooweeda gawuurji gida ghayi rukuteayda Musa, ak abeeda ghwanal buuneeda.”

Yesu ghoahaap soomjeanda shirikarajeanda haw bea Rumi

⁵ Iimuchu nea gawa Yesu jeeda mujiineeda Gapernaumu, gawa headaanyi shirikarajeanda haw bea Rumi,

⁶ ak gamearmearani nea gwayeesha, “Ng'utamiida soomjeandeanyu gwalil aba ghoah goobitu damealga nea gwasawana muuchi.”

⁷ Gwayeesha niny, “Gaydoan daahaap.”

⁸ Gwayeesha shirikarajeandida hawiin, “Ng'utamiida aniini mamiisean gideaba gaynyuunyi jeedeaba gheenyu; ang'iing'i rukuni ng'asheanda ak ghwahit, ak gayghahaap soomjeandeanyu.”

⁹ Aba gideaba eara aniini geewooschi siida ghayi mida hing'eadayda gheambalmeeda, mida hing'eadaydeanyu shirikara, ama eayeeshi nih, ‘Una,’ gawa, ghana nih ‘Beeni,’ ghwaan, ak eara soomjeandeanyu iyeayeeshi ‘Sina gili,’ gwasin.”

¹⁰ Iiy Yesu ng'asheesu, ghahamng'eanyi ak gwayeesha fuga gwachi aat geeshta, “Aba huumwa geayeeshiineegwa, miidadaah aba jeeda ng'eanyiida Israeli siida mideawa masaweega uurji nih.

¹¹ Asi geayeeshiineegwa, gayghapka fuga saang'a jea gwaleabu heeda ghayeawa ea heeda biyeara ak gaygoobiitpiit ak gweagiischi sea Abrahamu, ea Isaka, ea Yakobo aba jeeda sugoocheanduumeeda humng'eeda,

¹² amadu orjooga sugoocheanduumeeda gajeehisa jeeda misaneeda jarooda; heeda jea gwanda shooka ea giiwiirooda geeshatka.”

¹³ Ng'ata gwayeesha Yesu shirikarajeandida hawiin, “Una; ak gagasa ghoah gidida imwasiin.” Ghahaap soomjeandaanyi bea gadiyeeda aba damandida.

Yesu ghoahaap fuga saang'a

¹⁴ Iidu nea gawa Yesu jeeda gheeh Betaro, ghwadaah gheamata agweaji Betaro nea gwalil aba badayda bulaliida nea gabearji sheagheeda;

¹⁵ ghawaasa Yesu geatindaanyi, ak goosha sheagheeda, ak ghang'eat gagadiiyeesa.

¹⁶ Iidu nea niiw shing'ada geeyeassa fuga saang'a bearji meangeenda; gooruuta meangeenda aba ng'asheanda, ak ghoahaap buuneesean miyeani.

¹⁷ Nih abeeda gayghoahiit ng'asheanda ghayi rugu sibaneeda siguura Isaya nea gwayi, “Ghwasar niny munyasnacheakaasa ak gageanda miyeanyeakaasa.”

Fuga gasa ghwaat geeshta Yesu

¹⁸ Hean ghwadaah Yesu eemeetuw nea gwaneaweesa, ghwanung' ghoaghaaw giinealanga.

¹⁹ Gaweesa Ng'oorshoocheanjagi ak gwayeesha, “Giinealshoocheanda, gaydeadu geashtaang'u heechea una sean.”

²⁰ Gwayeesha Yesu, “Fureayoonga gwandeawa shoomeanga, dariidaka gwandeawa ghoorajeega; nea Orjeeda Siida ea mandeawana heechea ghwayiin uhuudaanyi.”

²¹ Gwayeesha nuut aba jeeda giinealangaaschi, “Ng'utamiida, goonean beata ghanyi dawa dabuy Bwaabwa.”

²² Ak gwayeesha Yesu, “Eani geeshteanyu, nung'waada fuga nimeewa gabuy muscheeka nyaawa.”

Yesu ghwanung' ghahawda siilakghta basooda

²³ Hean nea gwading'da maleambooda gamaseaw giinealangaaschi.

²⁴ Deagheata, ghwahidu siilakghta ng'waan bea basooda, ak gooyuuk maleambooda laweajajeega; nea abeeda gwalil.

²⁵ Gaweay heeda giinealangaaschi ak ghwaheat nea geeyeesha, “Ng'utamiida lealneasa siisheali.”

²⁶ Gwayeesha Yesu, “Anda ning'udeagwa muuwda, Ea fuga mwanang' masawi.” Ghang'eat ak gwareekusa jeameeda ea basooda ak ghahawuda basooda ea gwayi saw.

²⁷ Ghahamng'eanyi buuneeda nea gwayi, “Siisi siida uurjiini, awal gheang'da basooda ea jeameedean?”

Yesu ghoahaap fih iyeenya bearji meangeenda

²⁸ Iidu nea nuwa giigheawda mida ng'eanyiida Gadarene gwaroonyi fih iyeenya bearji meangeenda, nea gwaleabu heeda sibunyiisa buuneeda. Fiisu abeeda ea ng'weani ea eeyi bwak ea ghoawal buuneeda sigoodeaba naweedida.

²⁹ Ng'ula Goojuur nea gwayeena, “Geendeayeesi naaha sea ang'iing'i, Ea Orjeeda ASEETA? Guwuni sawaneasa nea miighwahidu damandeanya?”

³⁰ Abeeda gwanda hawanyeanda ukurmajeega nea sheagi nea ghoajeada.

³¹ Gamus meangiga bea eendean nea gwayeesha, “Iiruutaneasa ginung'waadi eeweaya eapita jeedeaba hawandida bea ukurmajeegean.”

³² Gwayeesha, “Aweayeena.” Gwariteawa fugiga. Gaweay ak ghoabita jeeda ukurmajeega; ak ghoabuutaawa geat rakghraghooneeda ak gwajaksa geat basooda ak goosha sean.

³³ Ghwahal geat haghweadoodiga ak gaweay mujiini ak ghoadaarda iiteaba ng'asheesu seaniin sea iiteaba fugiga bearji meangeendean.

³⁴ Hean gaweay buuneassean bea mujiineeteani roonyeeda Yesu, geeyi bwak ama daah geemus gideaba ng'amwana ng'eanyiideanya.