Mattayo 7 - Bibliyeeda Ghaydit

Girgweaksiinda buuneeda

¹ “Adoorgweakiisi buuneeda gajiidu eara agooga geergweakseegwa.

² Aba gideaba gidoorgweakiisiindi buuneeda, abeeda gajeergweaksiinduneegwa agooga, ak gidooteeniidi agooga eara agooga gajeeteeneegwa.

³ Anda ak giing'weersi hararooyeanda mida gheang'da orjeeda geamadu, nea miing'weersiini geeta mida gheang'daang'u ang'iing'i?

⁴ Ghana gajamuusa eeshiindaan orjeeda geamadu, ‘Nung' dageanu hararooyeanda mida gheang'daang'u,’ nea ghana gwanda jeeda gheang'daang'u ang'iing'i geeta?

⁵ Ea orjeeda siida amiitu geaw, nyooh ghanyi asheeda geanda geeta mida jeeda gheang'daang'u, ak abeeda gajamuusa geani hararooyeanda mida gheang'da orjeeda geamadu.

⁶ “Adoatawji gudajeega haleanjeeda ghaydidi, ghana ahisana ukurmajeega sageekeagwa ak ghwadatas, gajiidu gwayamseegwa geat ak ghwaageagwa.

Musa, gassa, guurdeawana dooshta

⁷ “Amusa, ak gajeegooneegwa, agassa ak gajanyasa, aguurdeawana dooshta ak gajeejeaseegwa.

⁸ Aba gideaba siida nyooh gamusiischi gajeataw, ama siida gasiischi gayghwanyas, nea siida guurdeawa dooshta gajeejeasa.

⁹ Heapi gajea ng'eaha aba jeedeang'wa, jea gamus orjeedaanyi mukaate, ak ghoadaw lagheaneeda?

¹⁰ Ghana iimus ghweayeanda, jea ghoadaw ichibooda?

¹¹ Abeeda iyoanali agoogeeda munyas gideaba gajoatawa diibigeagwa haleanjeeda miyaas, ea mayghwaraanya muuchi Ghweandeang'wa mida humng'eeda ak ghoadaw gea miyaasiin fugiga ikaaschi musiin!

¹² Haleanjeeda sean oogasayi gideaba gaygwasineegwa buuneeda, eara agooga asisiina saawa, aba gideaba nih ng'asheanda was deaweeda ea sibanga.

Gidaghuuta mwariis

¹³ “Aweayeena ghoah nea goosku gidaghuuta mwariis; aba gideaba gidaghuuta ea bwara nea naweeda ea bwara dea jea gahuteaweegwa ak aasaang'a fuga jea gwasik gidaghuudeeni.

¹⁴ Gidaghuuta ea mwariis nea naweeda ea mwariis dea jea gagal ghuhooda, ak gajea ng'ay fuga jea ghwadaa.

Geeta ea haghweagaaschi

¹⁵ “Ashageada sibanga ng'uyyeega fuga iissa ghapka heedeang'wa nea niikwa eagweega gisilga, nea aba jih ea suuyeeka ng'weani.

¹⁶ Gajanala aba haghweega nyaawa. Buuneeda ghoamu gabina haghweega sabiibu geeta halaghweenga ghana haghweega shaboogheecheanda heeda ng'eamga?

¹⁷ Gwasunu eara geeta miy gwajiila haghweega miyaas, nea geeta muy gwajiila haghweega munyas.

¹⁸ Geeta miy moamu gwaji haghweega munyas, nea geeta muy ea moamu gwaji haghweega miyaas.

¹⁹ Gili nyooh ea geeta iimaji haghweega miyaasiin gajealach ak geejaksa jeeda beasta.

²⁰ Asi gajanalana haghweega nyaawa.

Aniini moang'wa danaleagwa

²¹ “Mii giliwas sih eeniisean, ‘Ng'utamiida, Ng'utamiida,’ jea gawa jeeda sugoocheanduumeeda humng'eeda, geaghus siida sin gidagasa Bwaabeeda mida humng'eeda.

²² Eaweedida gaygwayeeshiinean fuga saang'a; ‘Ng'utamiida, Ng'utamiida, miyeeramoorana aba gheawungaagu, nea aba gheawungaagu geeruuti meangeenda, ak geesinyi haleanjeeda saang'a deamdeameadi aba gheawungaagu?’

²³ Abeeda gaydayeesha saawa, ‘Aniini moang'wa danaleagwa earahay, ang'amwana heedeanyu, agoogeeda sina ng'asheega munyas.’

Fih iyeenya deekshi

²⁴ “Asi siida wassean nyooh ghwayiiy ng'asheegeasu ak gwasin, gajeegala weaghoocheanda fughareeda, deeksa gheanyi uhuuda harearacheanda;

²⁵ Ghwaroabwan roopta, ak ghwahidu guldeayda, ghwahidu jeameeda ak ghwalas gheedida, ak ea moabeada, aba gideaba sindeetaanyi geedeeksa uhuuda harearacheanda.

²⁶ Ama siida was sean iiy ng'asheesu ikeasuun ak ea masina, gajeegala siida dasha, ghayi deeksa gheanyi uhuuda iseaskweanda;

²⁷ ghwaroabwan, ak ghwahidu guldeayda, ghwahidu jeameeda ak ghwalas gheedida, ak ghoabeada; ak gibeedeaydaanyi aahaw.”

Gheambalmeeda Yesu

²⁸ Iidu nea niihiit Yesu ng'asheesu, ghahamng'eanyi eemeeda aba giinealshoadaanyi,

²⁹ aba gideaba goonealsheata siida mideawa gheambalmeeda, nea mawuurji eara ng'oorshoodiga nyaawa.