Mattayo 6 - Bibliyeeda Ghaydit

Giinealshooda weeta fuga barbari

¹ “Ashageada adiidu goosinyi alooheedeang'wa aba madeeda buuneeda nea goobaysiini ghwadaheagwa saawa, aba gideaba iyoosindunu ea mwajanyasa giimearda aba heeda Ghweandeang'wa mida humng'eeda.

² “Asi ang'iing'i iidaydi haleanjeeda iiweadi fuga barbari adiidiing'u geaw ak gisindi gidasiniida fuga amiitu geat aba jeesinga ghoorajeega siinealshacheewa ea ghuusiga naweadinga, gagwarsa buuneeda. Aba huumwa, geeyeeshiineegwa suh ninyas giimearda nyaawa.

³ Asi ang'iing'i iidaydi haleanjeeda iiweadi fuga barbari eara geatindaang'u ghaadaam adaghwanal gissin geatindaang'u bea dugwa.

⁴ Haleanjeadaang'u iiweadi fuga barbari adaydaawana makcheameeda, ak Ghweandaang'u deaha makcheamuutka gay gooheaneey.

Giinealshooda mooshta ASEETA

⁵ “Asi iyoamwaashchi ASEETA, ea adoowuurjeewi fugiga amiitu geadiin; saawa ghabwariiy ghamwaash ASEETA nea ghamiinaada aba jeesinga ghoorajeega siinealshacheewa ea ghuusiga naweadinga, ghwadaah buuneeda. Aba huumwa, geayeeshiineegwa, nigeawiit ghwanyas giimearda nyaawa.

⁶ Nea ang'iing'i iimwaashi ASEETA, guwi jeeda ghooriidaang'u hoowa bea gahiin ak giradi gidaghuuta ak gimwaashi ASEETA aba heeda Ghweandaang'u mida makcheameeda; ama abeeda Ghweandaang'u deaha makcheamuutka gaygooheaneey.

⁷ “Agooga iyoamwaashchi ASEETA ea adoochuurayi awuurjeewana fuga eemoojiga; saawa ghaghay gili jea gooleeysiit aba ng'asheega nyaawa saang'a.

⁸ Asi adoowuurjeewi saawa, aba gideaba Ghweandeang'wa ghwanal gidoogasayi nea miyoomusa.

⁹ Asi amwaashtunu ASEETA: Ghweandeanya mida humng'eeda, Gheawungaagu eakghaambiida.

¹⁰ Sugoocheanduumeadaang'u nung' ghwahidu, Gidigasayi gagasa eesin, aba hiji bea ng'eanyiidean gawuurji gisisiniida aba hoowa bea humng'eedean.

¹¹ Gooneasa Askweareani daghwardeanya;

¹² Samseasa siileenigaasa, gawuurji gidasisamiisiindi fuga mideawa siileenigaasa.

¹³ Adiigealeasa jeeda simsimda, ak giighuuhaneasa gidida muyiin.

¹⁴ Aba gideaba iyoosamiisi giidiinyeanyeeka buuneeda, eara Ghweandeang'wa mida humng'eeda gaygwasamseegwa agooga;

¹⁵ ama moosamiisiini giidiinyeanyeeka buuneeda, eara Ghweandeang'wa maygwasamseegwa giidiinyeanyeekeagwa.

Giinealshooda iita giiluuldeaydeaba geaw

¹⁶ “Nea iyoolluuldi geat, ea adoowuurjeewi fuga amitu geat, saawa iissa gookaroomnyi gheamamuunatka nyaawa ghoahiimu geat ghwadaah buuneeda gideaba niiluulda geat. Aba gideaba geayeeshiineegwa suh ninyas giimearda nyaawa.

¹⁷ Asi iiluuldi geaw, giyeashi uhuudaang'u ak giihuuni gheamamdaang'u,

¹⁸ ea mwanala buuneeda gideaba giiluuldi geaw ak ghwanal Ghweandaang'u mida makcheameeda. Abeeda Ghweandaang'u ammu ghwadaah makcheameeda gayghoamwaarnyi.

Meanang'oocheanduumeeda humng'eeda

¹⁹ “Adootiiwsi gheaseedeang'wa badayda ng'eanyiida ammu ghwaak muguyga ea giirgweatka nea ghapka mareanghooga ak gwanyarja ak gwajagwadiin,

²⁰ asi ootiiwa gheaseedeang'wa aba humng'eeda heeda moamu ghwaak muguyga ea giirgweatka, ghana gwanyarja mareanghooga ak gwajagwat.

²¹ Aba gideaba heeda mida gheaseadaang'u heeda jea gwanda gurooroadaang'u.

Gheaboong'nyeanda saseeda

²² “Gheaboong'nyeanda saseeda gheang'da gil. Ama majeek gheang'daang'u, abeeda eara saseadaang'u sean gajea eesh;

²³ ama mii majeek gheang'daang'u, abeeda eara saseadaang'u sean gaygwanda jeeda misaneeda. Abeeda weeshindida mida jeadaang'uuni iimisana, ada misaneani gajea mii misaneeda!

ASEETA ea baruureega

²⁴ “Manda siida ammu gagadiiyeesa fiisu hees iyeenya. Aba gideaba gayghwasit agi nea ghabwariiy niirja, ghana ghoang'waay geat sea nih ak gafool niirja. Majoamuusa agadiyeesiina ASEETA ea baruureega.

²⁵ “Aba sareani geayeeshiineegwa, adoodeawiisi eaweegeagwa, aba gichea ayaaga ghana gichea aleaha, ghana gichea ookwealsiina sasanuukeagwa. Heapi eaweega mwang'ala hamita, nea saseeda ea mwang'ala hang'weaka?

²⁶ Ang'ula dariidaka mida humng'eeda: mahisiida nea malacha booga gabiissa ea meaweamsiina gijigoonga, eara saawa ghoarear Ghweandeang'wa mida humng'eeda. Heapi agooga! Moang'ali saawa?

²⁷ Ng'eaha gil aba jeedeang'wa ammu goodeawiit geaw ak ghoahaat geawundaanyi eara ea geatinagi gil?

²⁸ Ama hang'weaka ghoanung' goodeawiideegwa nea naaha? Oopkaada deakghweeda mida dareabeeta, gida heetiideayda; ea masina gadiyeeda nea mamanmana;

²⁹ ak geayeeshiineegwa, eara Sulemani aba jeeda miyeenoadaanyi sean miyeekwa muuchi ea gawuurji deakghweanagi aba jeedeaba suh.

³⁰ Asi iinung' ASEETA gookwealsheatunu nyeega mida dareabeeta, mida askweareani ama muchu ea niyaak beasta, heapi maygookwealshooweegwa muuchi agooga ea fuga mwanang' masawi?.

³¹ Asi adoodeawiichi nea gooyeenyi, ‘Gajeayaaga naaha?’ ghana ‘Gajealeaha naaha?’ ghana ‘Gajeekweala naaha?’

³² Aba gideaba haleanjeeni gagaseadayi fuga eemoojiga; aba gideaba Ghweandeang'wa bea humng'eeda ghwanal gideaba googasayi suh seaniin.

³³ Anyo ghanyi oosheeda agassa sugoocheanduumeadaanyi ea doobiiwnataanyi, ak abeeda gajeehoaneegwa haleanjeeni seaniin gajea geagwa.

³⁴ “Asi adoodeawiisi ng'asheegeaba numuji, aba gideaba numuji gaygwadeawiisa geaw. Giliwas eaweecha ghoahiit deawiitmeadaanyi.