Mattayo 3 - Bibliyeeda Ghaydit

Girukwiida Yohaneeda Abaatiisachi

¹ Askwearjoojigiga ghwahidu Yohaneeda Abaatiisachi, ak gwarukwiida ng'asheega ASEETA aba dareapcheeda Yudeya, nea gwayeeniisa;

² “Aduukuunana, aba gideaba sugoocheanduumeeda humng'eeda nineekiit.

³ Aba gideaba nih dea ghayi rugu sibaneeda siguura Isaya gil nea gwayi, “Ghuuta siida nyeara dareapcheeda Asina naweeda Ng'utamiida Ooleapa naweadingaaschi.”

⁴ Nea abeeda Yohana gookweali eaghwada sisna buudeega ngamiya nea gwaratiisa manandaanyi ghealooda; nea hamitaanyi ea deashamga gil ea maleeda dareabeeta.

⁵ Ak gaweesa Yerusalemu, ea ng'eanyiida Yudeyeeda sean, ea darooraka sean bea murdajeega Yordani,

⁶ ak geepaatiisan aba jeedeenda Yordani, nea gwaduukuuna riing'eega nyaawa.

⁷ Hean nea ghwadaah Farisaayajeega saang'a ea Sadukayajeega nea ghapka headaanyi goobaatiisan, ak gwayeesha, “Ea dayeega udang'usheega! Gwareekuseegwa ng'eaha ea amng'awana nyarasta jea ghwahidu?

⁸ Asi ajiila haghweega miisa duukuunooda,

⁹ nea adooyeeniisi geat, ‘Geendeawi ghweandeanya nea Abrahamu’, aba gideaba geayeeshiineegwa, ASEETA ghoamu ghwayam lagheang'su ghoah diibiga Abrahamu.

¹⁰ Ak ghamneawa joomooda ea siyiin guumsheaka geediga, ak geeta maji haghweega miyaasiin gajealach ak geejaksa jeeda beasta.

¹¹ “Geabaatiisananeegwa beega aba duukuunooda, nea dea jea ghwaduupnaan geash gaburdeawean uurda, ak aniini ea mamiisean eara sareenda geakaaschi; niny gaygoobaatiisananeegwa Guroorooda Ghaydit ea beasta.

¹² Niny gidaanyi aleeliida gwanda geatindaanyi, ak gaygoobuus heeda jea gooleelsa, ak gooweamsa ngaanoadaanyi jeeda gijigooda, nea looyda gayghaghwarda aba beasta maygamis.”

Giibaatiisanda Yesu

¹³ Damandida ghwahidu Yesu nea gwaleabu Galilaya ea ghwahita Yordani heeda Yohana, eebaatiisan.

¹⁴ Hean gagasa Yohana ghaheawa nea gwayeesha, “Geagasayi aniini gideaba gajabaatiisan ak giwuni ang'iing'i heedeanyu?”

¹⁵ Ghwasha Yesu nea gwayeesha, “Mwasa ghamneawa; aba gideaba nih gidamiisindaneasa gil sinooda ng'asheega sean doabiiw.” Ak ghamwas Yohana.

¹⁶ Ng'ata giibaatiisanda Yesu, nea gwascheeng'na jeeda beega; hean ng'ula ghwajaada bugusta humng'eeda ak ghwadaah Guroorooda ASEETA nea gwashuubeanda ghariibajeanda, ak goobissa uhuudaanyi;

¹⁷ deagheata, ghwanya ghuuta nyaasha humng'eeda nea gwayi, “Nih Orjeedeanyu aabwariinyi, ahoosanani.”