Mattayo 28 - Bibliyeeda Ghaydit

Duunooda

¹ Iimuchu nea ning'ata sabaato, nea ghaghar gayeew eaweeda madeeda bea wiikajeanda, gawa Mariyayda siguura Magdalena ea Mariyaydida bea iyeenyean ghwadaah heeda sibunyiisa buuneeda.

² Hean gwasimgeaw ng'eanyiida muuchi, ak gwashuubean malaykajeanda humng'eeda bea Ng'utamiida leabu humng'eeda amwahit ghoaraakghraakghta lagheaneedida sidukuteawa ghuuta bung'eedean ak goopteadawa.

³ Nea gheamamdaanyi ghawaar dadamandeeda nea hang'weakaaschi ea eashish ghawaar gapkeanda.

⁴ Daah furiischoodigiga ghabeal muuchi nea ghaboadan ea gawuurji fuga nimeewa.

⁵ Ghwalamda malaykajeanda humng'eeda ak gwayeesha gadeemgiga, “Agooga adoabeali; ghaanali gideaba googasayi Yesuheeda heeta singoor.

⁶ Manda hiji aba gideaba niduuteayda gidaghayi rukuteayda. Apkaani adaaha heeda heeta siyiin.

⁷ Asi ahalageat ak gooweayi arukusiina giinealangaaschi gideaba niduuna miyeeda, ak ghamneawa ea niisheedeawaneegwa gawa Galilaya, iyoahiti hoowa gajadaaha. Asi neabean nearukuneegwa.”

⁸ Ghwalamwajaada ghabeawa heeda bung'eeda aba muuwda nea gang'weela muuchi, gwasalda ak ghoadaw giinealangaaschi iita.

⁹ Hean gwaroonyi Yesu sea saawa ak gwayeesha, “Seayu!” Gwaneekiisa ak ghoang'waay geeshanga ak ghaghadoawan.

¹⁰ Ng'ata gwayeesha Yesu saawa, “Adoabeali! Aweayeena ak goorukusi orjoogiyya gaweay Galilaya amahita hoowa gayghwadaahan.”

Iita furiischoocheanda

¹¹ Damanda beawa, ng'ula gwanda furiischoodisu weay mujiini heeda ashoohoodiga hees ak ghoadayda iita ng'asheega sean bunu.

¹² Hean gwaroonyi sea gweargwa ak gabalool, hit geataw furiischoodiga lapiyeeda saang'a,

¹³ nea gwayeesha, “Ayeeshiina buuneeda, ‘Ghwahidu giinealangaaschi eawa nea silili ak gwajagwat.’

¹⁴ Amadeepa ghwanyas iita sugoocheanda bea ng'eanyiida, gajeepaloola niny ak gajeegeandeawaneegwa shata.”

¹⁵ Gageanda lapiyeedida amang'ata gwasinda baloolda gisirukusiinda. Gageawiit iiteaba ng'asheanji aba jeeda fuga Yahudi ea ghoah ghamneawa.

Yesu gabussa giinealangaaschi

¹⁶ Gaweay Giinealangiga atamwanagiin Galilaya nea ghoaburbuur heayeeda ghayi rukusa Yesu saawa.

¹⁷ Hean dea ghaghadoawan, nea mwaatkwa ghamwachmwach jeesinga nyaawa.

¹⁸ Ghwaan Yesu heanyaawa ak goobalool ak gwayeesha, “Sigoonan gheambalmeeda sean aba humng'eeda ea ng'eanyiida.

¹⁹ Asi aweayeena ak ghoanung' ghoah eemoojiga sean giinealanga, nea goobaatiisanyi saawa aba gheawunga ASEETA was Bwaabwa, ea gea Orjeeda, ea gea Guroorooda Ghaydit.

²⁰ Oanaala ghoang'waay ng'asheega sean eagoonyeegwa. Ang'ula aniini geendeayi sea agooga galeega sean ea gagul muudeanooda ng'eanyiida.”